Azakɩ 5

1Bontateba wa, kelehe ya. Pɔhɛ ya fabelegɔ la kaahega. Se'ere n sɔe la, la ken na te ya wan ta nyɛ' namehegɔ. 2Ya tarega la zan'an wan sagom ge te bonmɔgɔla me mɔgɛ ya fusonɔ la. 3Ya sanlema la ya sanlenpeela la di la teŋa zeem. Te teŋa zeem bona wa dela aseradaana bo ya. Bo wan di ya iŋa wo bugum la. Se'ere n sɔe la, ya kelom biŋera lɔgɔrɔ bɔ'ɔra ya mɛhe ba'ahegɔ dabeha wa poan. 4Nɛreba la te ya dekɛ ba te ba tona ya va'am poan la, kele mɛ. La to Daana Na'ayenɛ se'em n sɔe sɛla woo behera la, te a wom. Se'ere n sɔe la, ya dekɛ ba te ba ton bo ya ge te ya ka yɔ' ba. 5Ya dekɛ sɛla woo te ya tara la nya eta la sɛla woo te ya mɛhe bɔta. Ya diihe ya mɛhe kanregera wo dunhe te nɛresɛba ne uuge te ba kanregɛ te ba ko' se'em la. 6Ya gankere ge koora nɛresɛba n tare boorɔ la, ge te ba ka gu'ura ya. 7Bala, n sɔɔnrɔ, din'inhe ya suunre ge la ya gura te to Daana Yesu Krista ta lebena. Behɛ ya kaara n ne din'inhe suunre se'em gura te saa nii te a dia maalɛ se'em la. 8Yamam me din'inhe ya suunre ge sɛ' ze'ele gura. Se'ere n sɔe la, Yesu pɔnre lebega na. 9Da gɔngene ya la taaba yɛla. Ya han eta bala, Na'ayenɛ wan gankɛ ya. A me kɔ'ɔn ze'a la ya zen'en. 10N sɔɔnrɔ, doohe ya nɔtɔgɔheba la n yuun nyɛ' namehegɔ ge yuun din'inhe ba suunre se'em la. 11To mi' te ba yuun nyɛ' namehegɔ kekeko ge daa kelom tara popeelom. Ya le wom Yob n yuun nyɛ' namehegɔ kekeko se'em, ge yuun din'inhe suunre de poan. Te Na'ayenɛ yuun nɔŋɛ ba se'em la n yuun zɔ' ba ninbɔn'ɔn ge yuun le soŋɛ ba se'em. 12N sɔɔnrɔ, sɛla n gane zan'an dena. Da pɔte ya Yenɛ bii teŋa wa zuo, bii sɛla woo n boe teŋa wa zuo. Ya han bɔta te ya yeti, Ɛɛn, yele ya te Ɛɛn, ge ya han le bɔta te ya yeti, Aai, yele ya te Aai, ge da pɔte ya. Ya han pɔta, Na'ayenɛ wan gankɛ ya ge te ya kan di' boorɔ. 13Nɛra han bɔna ya poan ge bɔna yele poan, a daana sontii a belom Na'ayenɛ. Nɛra han bɔna ya poan ge tara popeelom, a daana sontii a yoon yooma pɛngɛ Na'ayenɛ. 14Nɛra han bɔna ya poan te ban'ahe tara en, a daana yi' lagaŋɔ zuodoma te ba wa'ana. Ba han wa'ana, ba sohe Yenɛ bo en ge sɔn' en la kaam. 15Ba han nam Na'ayenɛ ge belom en, a wan bahɛ te nɛra la ban'an bahɛ ge te a ihege. Ban'ara la han tara la be'em, Na'ayenɛ wan di' suguru bo en. 16Bala, yeti ya ya be'em bɔ'ɔra taaba ge belone ya Na'ayenɛ bɔ'ɔra taaba te bala te Na'ayenɛ wan soŋɛ ya ge tebɛ ya. Tontɔɔdaana po'ohegɔ tare la toolom. 17Eliya yuun dela asaala wo tomam n de se'em wa. A yuun sohe Na'ayenɛ la ninmɔ'ɔrɛ te saa ka ni, te saa yuun seren ka ni yuuma atan' la ŋmarehe seyoobe. 18Te a yuun le sohe Na'ayenɛ te saa ni, te ka yuun daa ni, te nɛreba yuun nyɛ' dia. 19N sɔɔnrɔ, nɛra han bɔna ya poan yelegera a mɛŋa Na'ayenɛ sore poan, tare ya en lebe bini. 20Baŋɛ ya dena wa: hon se'em han ton toonbe'ero ge te hon se'em tare en lebe yelemɛŋɛrɛ sore la poan na, a daana wan fan' a sea kum poan bahɛ. A han eŋɛ bala, a wan bahɛ te Na'ayenɛ dekɛ a yelebe'ero kekeko bahɛ, ge Na'ayenɛ wan di' suguru bo en.

will be added

X\