Azakɩ 4

1Bene n sɔe te ya ŋmɛ'ɛra nɔkpɛ'ɛma ge zabera? Yan bote sɛla n ka ane soŋa la zuo n sɔe te ya zabera la taaba. 2Yan bote lɔgɔseto ge ka nyɛ' la n sɔe te ya bɔta te ya koora nɛreba ge te ya nini tɛnta la nɛreba lɔgɔrɔ. Ya me kan ta'an nyɛ' la. Bala n sɔe, te ya ŋmɛ'ɛra nɔkpɛ'ɛma ge zabera la. Sɛla n sɔe te ya ka tara la dela ya ka belom Na'ayenɛ. 3Ya han belom Na'ayenɛ sɛla ge ka nyɛ' la, yan belom te ya eŋɛ sɛla la n ka ane soŋa. Ya bote la sɛla n peere ya poya ma'an. 4Yalomdoma wa! Ya ka mi' te nɛra han nɔŋɛ teŋa wa lɔgɔrɔ, enŋa la Na'ayenɛ ka som taaba. La dela sera te nɛra han dɔla teŋa wa lɔgɔrɔ la bahɛ te enŋa la Na'ayenɛ dela diŋdoma. 5Na'ayenɛ yele a gɔŋɔ la poan te Sea sɛka te a dekɛ kɛn'ɛhɛ tɔ la yuune mɛ. La dagɛ sera? 6Ge Na'ayenɛ soŋore to. Bala n sɔe la yeti, Na'ayenɛ zagahɛ pa'ale mɛŋa doma ge zo'oha sigehe mɛŋa doma. 7Bala, sirihe ya mɛhe Na'ayenɛ zen'en. Zagahɛ ya sagona la ge a wan zɔ' ge bahɛ ya. 8Vuruge ya lɛm Na'ayenɛ te a me wan vuruge lɛm ya. Pee ya ya nu'uhen ge duuhe ya suunre, birikɔgɔhe wa. 9Bahɛ ya te ya suunre sagom ge te ya fabela ge kɛla ya toonbe'ero la zuo. Bahɛ ya te ya yelɔ'ɔrɔ dɛna kaahega ge te ya popeelom de'a ya fabelegɔ. 10Sirihe ya ya mɛhe teŋa Na'ayenɛ zen'en te a me wan tebege ya saazuo. 11N sɔɔnrɔ, da zɛrɛgerɛ ya taaba. Ho han zɛrɛgerɛ ho sɔɔn bii ho gankɛ en, ho gankerɛ pa'alegɔ la. Ya han gankera pa'alegɔ la, ya ka nana a, ge ya gankere a mɛ. 12Ge Na'ayenɛ ma'an n de se'em n tare paŋa bɔ'ɔra nɛreba pa'alegɔ la ge gankera nɛreba yɛla. Enŋa n tare paŋa tana faanra nɛreba baha ge le tara paŋa sagom na ba. Gee yamam dela bane zɛrɛgera ya taaba. 13Behɛ ya kalam, yamam sɛba n ne yɛta te daanden daarɛ ya wan keŋɛ teŋkana ta zin'ire yuunɛ da' lɔgɔrɔ koohe nyɛ' yɔɔrɔ la. 14Yan tɔgɔre bala la ya mi' sɛla n wan eŋɛ ya? Ya mi' ya vom n ana se'em? Ya vom ana wo zun'uhe n guluge na la, te la han eŋɛ fiin ba mɛlom mɛ. 15La sontii ya ne ton yeti, Na'ayenɛ han soŋɛ tɔ, te to paɛ daan denɛ to wan eŋɛ la bala bii bala. 16Ge ya pa'alɛ la ya mɛhe ge ŋmɛ'ɛra nyɔn'ɔnrɔ la yan bote ya eŋɛ sɛla la. Nyɔ' ŋmɛ' kaŋa taaba dela be'em zen'en na. 17Bala, nɛra han mina sɛla n nare te a eŋɛ ge ka eŋɛ, a ka ton soŋa.

will be added

X\