Azakɩ 2

1N sɔɔnrɔ wa n sakɛ bo to Daana Yesu Krista n de na'ahegɔ daana la, da tare ya ninkɔɔre i la nɛreba. 2Magahɛ wo nɛreba bayi' han wa'an ya lagaŋɔ zen'en na te ayema dena bontata tara lɔgɔsonɔ gee te ayema me dena naha ka tara sɛla, 3te ya han po'ohɛ bontata la soŋa soŋa ge bo en zen'soŋa te a zin'ire ge yele naha la te a zin'ire teŋa. 4Ho han eŋɛ bala, ho bahɛ te ayema n gana ayema ge te ho potɛn'ɛrɛ me bɔgɔha nɛreba. Ho han eta bala la ho yelehego la dela potɛn'be'o yelehego. 5N sɔɔnrɔ sɛba te n nɔŋɛ, baŋɛ ya dena wa, nɛreba basɛba ta'an dena nahadoma nananawa ge te Yenɛ loe ba te ba sakɛ bo en la ba sunya zan'an ge yele ba te a wan bo ba yire saazuo ha, ban nɔŋɛ en la zuo. 6Ge te yamam ka na'ahere nahadoma. Ge bane n bala pɛnregera ya kena naba yire. Dagɛ bontateba la? 7Ge bontateba la me n sagone Krista yu'urɛ sonɛ la te nɛreba tara dɛ yi'ira ya la. 8Ba golehe Yenɛ gɔŋɔ la poan yeti, Nɔŋɛ ho tadaana wo hom nɔŋɛ ho mɛŋa se'em la. Ya han seren dɔla pa'alegɔ wa n ze'ele Yenɛ sɔ'ɔlom na la, ya ete soŋa. 9Gee ya han bɔgɔha nɛreba bɔ'ɔra na'ahegɔ, ya tone la be'em. Lana pa'alɛ te ya ganlom la pa'alegɔ la. 10Ho han pon le dɔla pa'alegɔ la woo gee koŋe deyema, ho tue pa'alegɔ la zan'an mɛ. 11La dela Yenɛ n yeti, Da tom kabonhe. Enŋa mea n le yeti, Da ko' nɛra. Bala ho han ka tom kabonhe ge pon ko' nɛra, ho ganlom pa'alegɔ la. 12Bala, da tamɛ ya te Yenɛ wan gankɛ ya behɛ nya ya seren dole a pa'alegɔ la n ka bahɛ te ya tona be'em la bii ya ka dole. 13Nɛra han ka tara a tadaana giinle, Na'ayenɛ han ta gankera, a me kan tara a giinle. Ge nɛra han tara a tadaana giinle, a wan baŋɛ te Na'ayenɛ han ta gankera, a wan tara a giinle gana n wan gankɛ en se'em la. 14N sɔɔnrɔ, nɛra han yeti enŋa sakɛ bo Na'ayenɛ ge ka eta Na'ayenɛ n bote a eta sɛla la, la ka tare vɔnrɛ. A han yeti a sakɛ bo Na'ayenɛ bala, Na'ayenɛ wan fan' en bahɛ? A sakɛ dena kan ta'an fan' en bahɛ. 15Magahɛ wo ya po'ohɛ tadaana n de boraa bii pɔka dena naha bɔta dia bii lɔgɔrɔ wa'an ya zen'en na te ya soŋɛ en 16te ya ayema yele en yeti, Na'ayenɛ wan soŋɛ hɔ bo ho sɛla te ho bɔta la, ge ka bo en, la tare vɔnrɛ? 17Wana wa dela boyena la hon sakɛ bo Na'ayenɛ. Nɛra han yeti enŋa sakɛ bo Na'ayenɛ gee me ka eta sɛla n nare, a sakerɛ la dela yoo. 18Bala, nɛra ayema ta'an yeti, Hon yeti hon sakɛ bo Yesu la ho suunre zan'an ge te etesoŋɔ ka tara yele la, mam me yeti etesoŋɔ n ane soŋa. Etesoŋɔ han kana, nɛra kan baŋɛ te ho sakɛ ya la ho ka sakɛ. Ho etesoŋɔ n wan bahɛ te nɛreba baŋɛ te ho sakɛ ya la ho suunre zan'an. 19Ya sakɛ la ya sunya te Na'ayenɛ deyena ma'an n boe. Ya han mina bala, la ane soŋa. Ge mini ya te ponpan'ahadaana soŋoreba me mi' bala, gee te dabeem tara ba. 20Wane te ya de'a gɔɔnɔ bala? Ya ka mi' te nɛra han yeti enŋa sakɛ bo Na'ayenɛ la a suunre zan'an ge ka eta sɛla n an soŋa, la ka tare vɔnrɛ? 21Tɛnre ya to yaaba Abraham yele. Sɛla n sɔe te Na'ayenɛ yuun dekɛ en yi' yelemɛŋɛrɛ nɛra la dela n yuun yeti a kɔrɔgɛ a dayɔa Isaak bo Na'ayenɛ la zuo. 22Dɛna pa'alɛ te Abraham saŋan la, sakerɛ la etesoŋɔ dole la taaba. A yuun dekɛ la etesoŋɔ pa'ahɛ a sakerɛ poan te la de'a ma'an. N yuun eŋɛ bala la, la yuun pa'alɛ te a seren sakɛ mɛ la a suunre zan'an. 23Bala te sɛla te ba yuun golehɛ Yenɛ gɔŋɔ la poan la yuun eŋɛ sera: Abraham nam Na'ayenɛ te Na'ayenɛ yi' en tontɔɔ nɛra. Bala te nɛreba daa yi'ira en Na'ayenɛ zɔ'. 24Bala, wana pa'alɛ te nɛra etesoŋɔ n bahɛ te Na'ayenɛ yi'ira en yelemɛŋɛrɛ nɛra, ge la dagɛ la n sakɛ bo Na'ayenɛ se'em la ma'an. 25Le tɛnre ya Arahab se'em n yuun de yaloma la yele, te la wone mɛ la Abraham denɛ la. Israel boraahe n yuun keŋɛ a zen'en te a yuun soŋɛ ba pa'alɛ ba sore deyema te ba doohe zɔ' ba diŋdoma la zen'en. N yuun eŋɛ dena wa zuo te Na'ayenɛ yuun dekɛ en yi' yelemɛŋɛrɛ pɔka la. 26Wana wa woo pa'alɛ te nɛra han yeti enŋa sakɛ mɛ ma'an ge ka eta etesoŋɔ, a sakerɛ la dela yoo. La ane wo nɛra vo'ohom n ba'ahɛ te a ki' se'em la.

will be added

X\