Azakɩ 1

1Mam Yames n de se'em n tone bɔ'ɔra Na'ayenɛ la to Daana Yesu Krista la. Mam golehɛ gɔŋkona po'oha yamam Yenɛ nɛreba la n yeregɛ bɔna teŋa wa zan'an la. 2N sɔɔnrɔ, ya han nyɛta namehegɔ yema yema, dekɛ ya dɛ te la dɛna zusoŋɔ. 3Se'ere n sɔe la ba han makɛ yan nam Na'ayenɛ se'em la behɛ, la bahɛ te ya tana ŋmibera mɛ. 4Ya han sakɛ din'inhen suunre la, Na'ayenɛ wan bahɛ te ya etegɔ woo de'a etesoŋɔ gee kan koŋe yelesonɛ. 5Ya se'em n ka mi' sɛla n de som bii be'em sohɛ ya Na'ayenɛ, gee a wan pee poorɛ bo ya. Se'ere n sɔe la, enŋa n bo'ore nɛra woo gee ka ganhera. 6Ge ya han sohɛ Na'ayenɛ sɛla, sakɛ ya la ya sunya zan'an gee da tɛn'ɛha boyi' boyi', gee se'em n tɛn'ɛhe boyi' boyi' ane wo ko'mi'inhe n ŋmɛ'ɛra la. 7Nɛra enŋa daana da tɛn'ɛha te a wan nyɛ' sɛla Na'ayenɛ zen'en. 8Se'ere n sɔe la, a tare la potɛn'ɛra ayi', a ka ze'a bɔberɛ yenɛ n ete sɛla woo. 9Bahɛ te n sɔɔn se'em n de naha yele nɛreba te Na'ayenɛ n soŋɛ en. 10Ge te sɔɔn se'em n de bontata yele nɛreba te a ka tare sɛsɛla. Se'ere n sɔe la, bontata la wan ki' 11wo wontɛɛŋa n ne woŋɛ mɔɔ te ko ki' se'em la. Te puru ne zɔngɛ gee te ko soŋa la ne sagom se'em la. Bala, bontata han pon tona a tooma gee la ken na te a wan ta ki'. 12Nɛra han nyɛ' namehegɔ ge dɛna birikina paɛ ba'ahegɔ, a tare popeelom. Enŋa daana n seren de Na'ayenɛ nɛra gee te Na'ayenɛ me wan yɔ' en. Yɔɔrɛ la dela vom sebo n bo saazuo ha te Na'ayenɛ daa yeti a wan dekɛ bo sɛba woo n nɔŋɛ en la. 13Nɛra han bɔta te a tom toonbe'ero, a da yeti la dela Na'ayenɛ n bahɛ en te a yeti a tom toonbe'ero la. Se'ere n sɔe la, Na'ayenɛ ka bote toonbe'ero ge me kan bɔta te a bahɛ te nɛra me tom toonbe'ero. 14Ge la dela nɛra koŋkoma'ahom n ne tare en yɛ'ɛha be'em poan. 15A koŋkoma'ahom la tare la be'em kena na, te be'em la me zɔ'ɔra pa'aha nya tara kum kena na. 16N sɔɔnrɔ, da bahɛ ya te sɛla pan'ahɛ ya. 17Na'ayenɛ se'em n bo saazuo ha la n bo'ore to sɛla woo n ane soŋa te to nyɛta la. Enŋa n maalɛ sɛla woo, a me dagɛ ŋmɛlema Na'ayenɛ. 18La dela Na'ayenɛ mɛŋa sunboolom te a bahɛ te to baŋɛ a yelemɛŋɛrɛ yɛla la te bala te to wan dena a kɔma. A eŋɛ dena wa te to dena sɛba n de yia n wan bɔna sɛla woo te a maalɛ la nɛŋa. 19N sɔɔnrɔ, sɛba te n nɔŋɛ la, baŋɛ ya dena soŋa te nɛra woo kɛleha yetɔgom kalam ge ka zɛɛra yetɔgom me kalam, da eta sunsunya kalam kalam. 20Te sunsunya ka bahɛ te to eta sɛla te Yenɛ bɔta te to eta la. 21Bala, bahɛ ya be'em la woo n bo ya etegɔ poan la gee zagahɛ yelebe'ero la woo n bo ya zen'en la. Sirihe ya mɛhe Yenɛ nɛŋa ge gorɛ a yɛla la te a dekɛ eŋɛ ya potɛn'ɛra poan la. Yeledena n tare paŋa wan ta'an fan' ya bahɛ. 22Ge mini ya dena wa. Da kɔ'ɔn kelehe ya kelehego ma'an ge ete ya sɛla te Na'ayenɛ yɛla la bɔta te ya eta la. Ya han ka eta la, ya pan'ahe la ya mɛhe. 23Nɛra se'em han kɛleha yɛla la ma'an ge ka eta a, a ane wo nɛra se'em n dekɛ beheŋa beha a mea nɛŋa 24ge nya han keŋɛ a tamɛ en ane se'em la. 25Nɛra han kɛleha pa'alegɔ soŋɔ n faanre nɛreba baha la soŋa soŋa ka malom gɔ'ɔra ge han tara a eta ge ka tamena sɛla woo te a wona. Enŋa daana wan tara popeelom la n ete sɛla la. 26Se'em han dekɛ a mɛŋa te a po'ohɛ bɔ'ɔra la Yenɛ ge ka tana a zɛleŋa tara, enŋa daana pan'ahe la a mea gee te a po'ohegɔ la ka tara vɔnrɛ. 27To Sɔ' Na'ayenɛ n bote te nɛreba dɔla en se'em n wana. A bote to soŋora keebehe la pɔkɔnpa sɛba n namehe ge me da bahɛ te teŋa wa woo nɛreba sagom tɔ.

will be added

X\