Isaiah 9

1Daaŋɔ kan le paɛ sɛba sunya n pon sagom la. A daa sigehe Zebulun la Naptali teŋhe la teŋa. Ge la kene na, a wan tare na'ahegɔ bo Galilee n bo saama teŋa, n lɛm ko'kantɛ wa, la Yordan kolaa. 2Sɛba n kene lika poan la nya nyɛ la nɛɛhom kantɛ. Nɛɛhom n nɛɛ bo sɛba n boe lika poan la. 3Hom n yalegɛ teŋhe wa, ge pa'ahɛ se nyeema. Ba nyeene la ho nɛŋan wo nɛreba n kɛ'ɛre dia ge nyeena se'em la. Ba nyeene wo pɛɛntɛɛnreba n fan' lɔgɔrɔ tɔnta taaba ge nyeena se'em la. 4Wo hom yuun nyaŋɛ Midian se'em la, bala mea te ho kɔ' yɔgɔhɔga sɛka n yɔgɛ ho nɛreba wa la, la kuto seto n page ba bɔgɔrɔ zuo la, la muguhego kpa'aherɛ la n gan' ba zuo la. 5Pɛɛntɛɛnreba tagara se'a n ne bɔna zaberɛ poan nɛɛra wɔnta la, la fuo ba zaba futo la n ne lerom la ziim la zan'an wan dekɛ nyɔ' bugumen wo bontoola la. 6Se'ere n sɔe la, ba wan dɔgɛ bia bo to. Ba bo to la bodibila, ge te teŋbehega paŋa bɔna ka zuo. Ka yu'urɛ wan yi'ira la Kan'an Keregadaana la Yenɛ Kanrɛ la Avɔe Wuuha Sɔ la Sunma'ahom Nabia. 7Ka paŋa la ka sunma'ahom pa'ahere la bala ka tare tɛka. Kaŋa n wan sɔe naba David na'am gɔŋɔ la behera a teŋa la. Ka wan sɛ teŋa la, te yelemɛŋɛrɛ la tontɔɔ vom bɔna bala ma'an la yɛ'ɛha. Pɛɛntɛɛnreba Na'ayenɛ la ninmɔ'ɔrɛ n wan tom wana wa. 8Daana la tom la sɔɔleŋa bahɛ Yakob zuo. Ka sige Israel zuo mɛ. 9Nɛreba la woo baŋɛ ya. Ge te Epraim la Samaria teŋadoma pa'ale ba mɛhe, ge ŋmɛ'ɛra ba nyɔn'ɔnrɔ yeti, 10Tɔnɔ n lu, ge tomam wan lebehe dekɛ la kuga soma mɛ'. Ba me le yeti, Kenkanhe te ba ŋma bahɛ, ge tomam wan tee sɛ la mɔlɔsomɔ tiihe. 11Bala zuo te Na'ayenɛ dekɛ diŋdoma Arezin teŋa tuunle ba na, ge gbirige ba diŋdoma to'ohɛ ba. 12Aramdoma n boe dapɔya bɔba la, la Pilistidoma n boe zanɔya bɔba n wa'ana vole Israel. Ge wana zan'an la, Daana la suunre ka ma'ɛn, te a kelom namehera ba. 13Ge nɛreba wa ka ŋmɛregɛ lebe se'em n damene ba wa zen'an, ba ɛ Pɛɛntɛɛnreba Na'ayenɛ wa. 14Bala, Na'ayenɛ wan ŋmaɛ zuo la zoorɛ woo Israel poan bahɛ. A wan ŋma tisonhe la tiyooro zan'an daanyenɛ bahɛ. 15Keendoma la birikindoma la n de zuo, te nɔtɔgɔheba sɛba n pa'ale ponpɔrɔŋɔ la dɛna zoorɛ. 16Sɛba n behere nɛreba wa la bahɛ te ba tue mɛ. Ba bahɛ te ba bɔregɛ mɛ. 17Bala zuo, Daana la ka tare nɛŋa la ba bonbilipaalehe bii a zɔta keebehe bii ba pɔkɔnpa ninbɔn'ɔn. Ba zan'an ka dole Yenɛ, ba dela be'emdoma, te ba woo nɔya yetɔgom dɛna yabega. Ge la wana woo la, Daana la suunre ka ma'ɛn, a kelom namehera ba mɛ. 18Toonfɛn'ɛha seren taɛ mɛ wo bugum la dita gɛnra la gɔn'ɔhe. Bo taɛ mɛ wo bugum n taɛ mɔen zen'se'ehe en kpanrɛ paɛ paɛ la, dita te zun'sɔbelegɔ tu'ura. 19Pɛɛntɛɛnreba Na'ayenɛ la sunsunyiim wan bahɛ te teŋparɛ wa tulugɛ, te saaleba lebege bontoola bo bugum. Nɛra ka tare a sɔɔn giinle. 20Nɛra woo wan faanra a tadaana, ge zabera la taaba zuɔ la gɔbega. Nɛra woo wan obe a mɛŋa bidɔka. 21Manase wan ɔbera Epraim, te Epraim ɔbera Manase vɔna. Bama bayi' la wan ta naɛ taaba zabɛ la Yuda teŋa. Ge la wana woo la, Daana la suunre ka ma'ɛn, te a kelom namehere ba.

will be added

X\