Isaiah 7

1Saŋsɛka te Uzia dayɔa Yotam me dayɔa Ahaz dɛna Yuda naba, te Aram teŋa naba Arezin, naɛ la Aremalia dayɔa Peka n behere Israel teŋa la, te ba keŋɛ te ba zabɛ la Yerusalem teŋa wa, ge ba ka nyaŋɛ ka. 2Te la ta lu naba David yire wa poan te Aramdoma tiihom la Epraim te ba zabɛ la ba, te naba Ahaz la a nɛreba la zan'an pabegɛ wo saabeeokeŋɔ n lobere tiihe la. 3Te Na'ayenɛ yele Isaiah yeti, Hom la ho dayɔa Sear Yasub wa yehe nananawa to'ohɛ naba Ahaz. A boe la sɛba n peere woka guno la zen'an, zin'an boko seko te ko'om zɛ'ɛta bɔka sɛka n boe zuin ha dɔla ko poan kena teŋa la poan na la, a zin' la boko koŋɔ fehegan ha. 4Ta yele Ahaz yeti, Da bahɛ te ho paleŋa ɛngera. Ana baanlam. Da tara dabeem la Arezin. Aram la Aremalia dayɔa wa n ane wo dɔɔ bila ayi' n guli, te ba suunre n ba' nyii la hɔ wa. 5Aram la Epraim la Aremalia dayɔa la maahom la ho be'em gura hɔ, 6yele ba mɛhe yeti, Bahɛ ya te to sagom Yuda, to pige sagom zabɛ nyaŋɛ ka, ge bahɛ te Tabeel dayɔa la dɛna naba behera ka. 7Ge Daana Na'ayenɛ la yeti, Dena wa kan wa'ana. De kan tom. 8Damaskus teŋa yeen dɛna la Aram teŋkantɛ, te ka naba Arezin me yeen dɛna nɛresaala. Yooma pihiyoobe la anuu poan, Epraim teŋa me wan yee suram kan dɛna teŋa. 9Samaria yeen dɛna la Epraim teŋkantɛ, te naba la n de Aremalia dayɔa la me yeen dɛna asaala. Ho me han ka sakɛ dena wa, ho me kan yuue. 10Te Na'ayenɛ le tɔgɛ bo Ahaz yeti, 11Sohɛ sɛla Na'ayenɛ ho Yenɛ wa zen'an. Sohɛ sɛla n boe teŋa teŋa bii zuin zuin ha ge a wan pa'alɛ hɔ. 12Te Ahaz yeti, Mam kan sohɛ sɛla bii n makɛ Na'ayenɛ behɛ. 13Te Isaiah yeti, Naba David yiredoma wa, kelehe ya. Yamam magahɛ nɛresaaleba suguru behɛ la ka seke. Ya nya wan magahɛ la Yenɛ wa suguru behɛ? 14Bala zuo, Daana la mɛŋa wan bo ya danlehom sebo. Behɛ ya, pɔgɔsa'a kanherɛ wan nyɔkɛ poorɛ dɔgɛ bodibila, segɛ ka yu'urɛ Imanuel. 15Se'em ma'an te bia wa ta mina be'em zagaha ge lɔɔha som la, ka wan dita la iilom la seerom ma'an. 16Se'em ma'an te bia wa ta mina be'em zagaha ge lɔɔha som la, nadoma bayi' wa teŋhe wa te ya zɔta wa wan lebege daboo. 17Na'ayenɛ wan bahɛ te daaŋɔ sige yamam, la ya nɛreba, la ya sɔ yire poan na. La dela daaŋseko n ka tabelɛ wa'ana, se'em ma'an te Epraim yelege a mɛŋa yehe Yuda poan. Na'ayenɛ wan bahɛ te Asiria teŋa naba wa'ana zabɛ la ya. 18De daarɛ, Na'ayenɛ wan peebe, te pɛɛntɛɛnreba ze'ele Mizraim teŋse'ehe n zaan na wo zun'uhe la, la te basɛba me ze'ele Asiria teŋa bibige na wo sim la. 19Ba zan'an wan wa'ana sige boko woo poan, ge kɛn' taŋa yoko woo poan la tuntuuro woo la bɔgɔhe woo poan. 20De daarɛ, Daana la wan yɔ baraga te ka ze'ele mɔgɔrɛ yakenɛ ha. La dela Asiria naba la, te ka siie ya zuto, la ya na'ma kɔnberɔ, la ya tɛɛhe. 21De daarɛ, nɛra kan bɔna ya poan tara gaŋɛ nagabila, la boohe seyi', 22ge dunhe sena wa wan bɔ'ɔra iilom zo'e zo'e, te iilom la dɛna ya dia. Se'em woo n yee teŋa la poan saŋkaŋa poan, wan dita la iilom la seerom ma'an. 23De daarɛ, zen'sɛka te tiihe va'am ne bɔna wan da' ne paɛ sanlenpeelega kpila tuhure la. Bilam nya wan lebege la gɛnra la gɔn'ɔhe ma'an. 24Nɛreba wan kena bini la ba tiini tɛɛnra nɛnɔ. Se'ere n sɔe la, zen'an la wan kpanrɛ mɛ la gɛnra la gɔn'ɔhe. 25Ge han dɛna zɔya se'a zuo te ya tabelɛ kɔɔra a zuo la kunya la, ya kan le veehe bini, gɛnra la gɔn'ɔhe la dabeem zuo. Zen'sena wan wan lebege dunhe ɛɛa zen'an, zen'sɛka te piihe wan ɛɛra fai.

will be added

X\