Isaiah 66

1Na'ayenɛ n yele se'em n wana: Saazuo n de na'am koka, te teŋa zuo dɛna mam na'arɛ tagalegɔ zan'an. Bene yire te ya wan ta'an mɛ bo mam? Mam vo'ohogo zan'an wan bɔna la bɛha? 2Sɛla woo n boe wan wa, mam n maalɛ. Na'ayenɛ yele se'em n bala. Se'em te mam nɔŋɛ n wana, se'em n sigehe a mɛŋa sea poan, ge zɔta mam yelehom. 3Ge se'em n kaanbɛ lɔlega ane me wo a ko' la nɛra la. Hom me se'emdaana n kaanbɛ pehego ane me wo nɛra n kɔ' baa nyugela la. Se'em n kaanbɛ boom bo'olom ane me wo nɛra n dekɛ dea ziim kaanbera. Se'em n nyɔn' ko'ɛnka ane me wo nɛra n kaanbɛ baga la. Ba loe la ba mɛhe sɔya, te ba poya pee la toonfɛn'ɛha se'a te ba tona wa. 4Mam han yi' ba, ba ne sina me kan lebehe mam. Mam n ka bote sɛla la, ba mi' te la ka ane soŋa, ge ba ton nɔŋɛ la yele aŋa etegɔ. N wan yɔ ba wo lan sone te n yɔ ba se'em. N wan bo ba namehegɔ te ba zote. 5Yamam sɛba n tare dabeem la Na'ayenɛ yelehom la, kelehe ya. Ya sɔɔnrɔ sɛba n yaɛ ya, ge zagahɛ ya mam yelehom wa zuo la yeti ya, Na'ayenɛ han seren bɔna me la hɔ, a pa'alɛ a paŋa te to nyɛ. A bahɛ te ho tara popeelom te to behɛ. Ge la ban yeti bala mea zan'an la, nyanɛ wan di. 6Kelehe kaahe seto n sigere teŋa la poan ha wa. Kelehe voole se'ere n ze'ete Yenɛ Yire la poan na wa! La dela Na'ayenɛ la n namehere a diŋdoma la ge tanhera. 7Hom tabelɛ wom te ba yeti pɔka n dɔgɛ bia ba'ahɛ ge nya virige? 8Ane n tabelɛ wom yele dena taaba bii ane n tabelɛ tɛn'ɛhɛ te sɛla bala wan ta'an eŋɛ? Teŋa boe kɔ'ɔn mɛ daarɛ deyena poan bii ba dekɛ saŋa peka peka kɔ'ɔn me ka? Yerusalem ane me wo pɔka n boe bini te a virige te bia bala lu na la. 9Na'ayenɛ n de se'em n bo'ore dɔgom. A wan bahɛ te Zion dɔgɛ kɔma zo'e zo'e. Yenɛ la n tɔgɛ. 10Yamam sɛba n nɔŋɛ Yerusalem ge daa bɔna ninbɔn'ɔn poan la en la, nya de'em la popeelom. 11A wan tara ya, ge pan'aha ya wo ya mɛhe madoma la, tara tara te ya suunre ta ma'ɛn. Ya wan di a soŋa la tegɛ la popeelom. 12Na'ayenɛ la yele biŋe te a wan tare teŋhe lɔgɔsonɔ na perɛ Yerusalem teŋa, ge bahɛ te Yerusalem teŋa tara. Zion wan diihe ho la a mɛŋa bin'ihom, ge buga hɔ a mɛŋa bɔgɔrɔ poan. Tara ho gan'ata a mɛŋa na'ma zuo. 13N wan pa'aha ho bilam wo pɔka n pa'ahe ka bia se'em la. 14Ho han ta nyɛ te wana wa ete, ho wan de'em de'eŋɔ. Ho paŋa la puhe kalam ho zan'an gana mɔɔ n puhure se'em bɔn'ɔn poan la. Te nɛra woo wan nyɛ baŋɛ te Na'ayenɛ la seren boe me la a tontoneba la, ge a suunre nyiire mɛ la a diŋdoma. 15Na'ayenɛ la sigere me na la bugum, te a zaba yiri la kɔ'ɔn pɛbegera wo sabeeo la. A suunre n ihege wo bugum la te a namehɛ a diŋdoma la la bugum. 16Na'ayenɛ wan dekɛ bugum la a dabeem so'a la gankɛ nɛra woo. Sɛla te Na'ayenɛ wan kɔrom la wan zo'e gaŋɛ kan ta'an kaanlɛ. 17Sɛba woo n yehe ba mɛŋa ze'ele, kena samana poan na'aha se'em n daa boe ba teŋasoka te ɔbera dea nɛnɔ la dayuuro la ganleŋɔ di sɛka woo te Na'ayenɛ ka bɔta la, wan ba'ahɛ sagaŋɔ zan'an la poan. Na'ayenɛ n yele. 18Mam mi yan ete sɛla, la yan tɛn'ɛhe sɛla ya sunya poan! Saŋa la paɛ ya te n kan'ahe teŋa woo, yetɔgom woo la nɛra woo la ba nyɛ mam Na'ayenɛ soŋa n ane se'em. 19N wan pa'ale ba mam paŋa n ane se'em, n wan tare sɛba n vo'e la keŋɛ Tarsis la Pul la Lud, teŋsɛka n tare pɛɛntɛɛnreba, la Tubal la Yavan, teŋse'ehe n zaaɛ bɔna ko'om teŋasoka ha la ta bahɛ ba bini. N wan tom ba te ba keŋɛ teŋhe n nan ka wom mam toonsoma wa yele la poan ta mɔɔlɛ a bo ba. 20Ba wan tare ya sɔɔnrɔ sɛba n boe teŋsena wa poan na bo mam te ba dɛna nyɔ'an bo'olom bo mam Na'ayenɛ. Ba wan ban' yiri la toroto la toroto sese'ehe la yiribonhe la yogoma zuto zo'e kena na wo Israel kɔma n ne zo'e se'em la, tara bo'olom somɔ kena na te ba bo mam n po'ohegɔ yire la poan. 21N wan loe bama basɛba te ba dɛna malemadoma la Levidoma. Na’ayenɛ yelel se’em n bala. 22N me le pon yele biŋe te saŋa woo ya wan tara yaahe te yu'urɛ kan malom ba'ahɛ wo saazuo paalega la, la teŋa paalega la te mam maalɛ te ba ka malom tara ba'ahegɔ se'em la. Na'ayenɛ yele se'em n bala. 23Ŋmarega pɔhega daarɛ woo, la Vo'ohogo Daarɛ woo, nɛra woo wan wa'ana na'ahɛ mam. Na'ayenɛ yele se'em n bala. 24Mam nɛreba la wan yehe ta doohe behɛ nɛresɛba n bire ba pɔya bahɛ mam la n ki gan'an se'em. Zunzunya sɛba n boe bini la ka malom kiŋira. Nɛra kan pon bɔta te a beha ba iŋhe la.

will be added

X\