Isaiah 63

1Ane n bala ze'ele Bozra teŋa n boe Edom teŋa poan kena na te mɔlɔgɔ lerom a fuo wa? Naba kane n bala nɛɛra kilikima kena na la paŋa bala wa? La dela mam se'em n de Daana n nyaŋɛ zaberɛ la, ge yeti n fan' bahɛ. 2Bene te ho futo lerom la mɔlɔgɔ bala wo nɛra n bone bini ŋmɛkera tiihe dia daam? 3Mam ma'an n boe tiihe dia daam ŋmɛkerɛ la poan, nɛnɛra ka boe ze'ele teŋhe wa kayena wa'ana soŋɛ mam. Mam ŋmɛkɛ teŋhe me la n sunsunyiim te mam lɔgɔrɔ la lerom la ba ziim. 4Se'ere n sɔe te mam eta bala la dela, n bote n lerege me. Saŋa la paɛ ya te n fan' n nɛreba wa. 5Nɛre ka boe soŋɛ mam. Te mam behɛ te la eŋɛ mam pakerɛ. Mam mɛŋa paŋa n bo faanrɛ, te n mɛŋa sunsunyiim la n bo ma paŋa 6Mam suunre nyie ge nɛ la na'ma teŋhe la, te ba nyu mam sunsunyiim la buge, ge te ba ziim ka'ɛ teŋa wa zuo. 7N wan porɛ Na'ayenɛ zo'ohogɔ la, sɛla woo te nɛreba pɛngɛ la en. N wan yeti Na'ayenɛ etegɔ woo yele se'em la. Na'ayenɛ eŋɛ to Israeldoma som, a ninbɔn'zɔrɛ la a zo'ohogɔ la poan se'em la. 8A yeti, La dela yelemɛŋɛrɛ, ba dela mam nɛreba. Ba dela dayɔse'ehe n nane mam. Bala zuo te a dɛna ba faanra. 9Te ba daaŋɔ dɛna a daaŋɔ, te a soŋora se'em n boe a nɛŋan la fan' ba bahɛ. A nɔŋerɛ la a ninbɔn'zɔrɛ la zuo te a fan' ba bahɛ. A dekɛ ba la a bɔkɔ poan yuum se'a n lo le ha la. 10Ge la bala zan'an la, ba wa bire la ba pɔya bahɛ en, ge sagom Na'ayenɛ Sea la suunre. Bilam te a lebege ba diŋdaana, zabɛ la ba. 11Bilam te a nɛreba la tɛɛn lan yuun ane ba se'em Moses la nɛreba la nya sɔkera yeti, Se'em n tare bama doohe ko'keŋɔ la poan dooe na la a duŋkeena la bɛɛ? Se'emdaana n daa bahɛ te a Sea bɔna la ba la bɛɛ? 12Se'emdaana n daa dekɛ a paŋa kɛn'ɛhɛ Moses zuɔ nu'o poan, ge bahɛ te ko'om la yelege boyi', ge bo a mɛŋa nyaŋerɛ se'ere n ka tare ba'ahegɔ la bɛɛ? 13Se'em n daa tare ba doohe ko'kantɛ la teŋa tole la bɛɛ? Se'em n daa boe ba poan te ba kpe'em zɔta wo yeho n zote sore zuo ge ka peta na'ma la bɛɛ? 14Na'ayenɛ Sea la daa bo ba la vo'ohogo wo nii n boe bɔn'ɔn poan fai se'em la. Hom n daa gu ho nɛreba la se'em tare yu'urɛ sonɛ na ba ho nɛŋa se'em n bala. 15Ze'ele ho fa'a soŋa yire la ha sure behɛ sɛla n ete to wa. Hom ka le bɔta tomam? Ho paŋa la bɛɛ? Ho ninbɔn'zɔrɛ la te ho tareya bɔ'ɔra to la bɛɛ? 16La tomam sɔyaaba Abraham la Israel zagahɛ tomam mɛ. Ge la bala zan'an, hom Na'ayenɛ de tomam Sɔ. Hom n de tomam Sɔ la Se'em N Yɔ' To'e tomam pɔhɛ yuumai yuumai ha. 17Na'ayenɛ, bene te ho bahɛ te tomam tuuna ho sore wa poan, ge kanbɛ te sunya ka bɔta te to nana hom? Bahɛ te ho sunboolom yizuto lebege ho mɛŋa tomam ho yamehe zuo. 18Ho nɛreba wa sɔe ho toolom zen'an la la dabeha fiin wa, ge te to diŋdoma la wa'ana fan' sagom ho toolom yire la mɛ. 19Tomam dela ho nɛreba pin'ileŋɔ na, ge ho ka tabelɛ sɔna ba. Ba ka tabelɛ yi' ba te ba dela ho nɛreba.

will be added

X\