Isaiah 61

1Daana Na'ayenɛ Sea n perɛ mam. Na'ayenɛ loe mam mɛ, sɔ' mam la kaam te n tɔgɛ a yelesoma la bo taromdoma. A loe mam te n tebɛ sɛba sunya n sagom, ge bo sɛba n boe paka deo poan la vo'ohogo, ge la n yehe ba lika poan bahɛ. 2A loe mam te n mɔɔlɛ Na'ayenɛ ninbɔn'zɔrɛ yu'urɛ la, la te Yenɛ leregere dabaherɛ la ge bogolɛ sɛba n kele sunya. 3N duuhe sɛba n boe Zion teŋa poan kɛla la nintam, te n yɛɛhɛ ba namehegɔ bahɛ ge tee dekɛ na'am muŋa vugule ba, ge yehe ba fabelegɔ la bahɛ, ge son ba nyeema kaam, ge yehe sunsagaŋɔ baŋa la bahɛ, ge dekɛ pɛka yooma yɛ ba. Ba yu'urɛ wan yi'ira la toolom tia, tia sɛka te Na'ayenɛ mɛŋa borɛ te enŋa soŋa wan bɔna ba poan. 4Ba wan malom mɛ' teŋa la n gbi' lebege daboo gan'an yuuman yuuman ha la. Ba wan mɛ' teŋhe daboto te nɛreba yuun gbi'. 5Saama wan behɛ ya piihe. Ba wan kɔɔra ya samana ge me tona bɔ'ɔra ya tiihe vatɔ poan. 6Ge te yamam mɛhe wan dɛna Na'ayenɛ malemadoma, tona bɔ'ɔra Yenɛ. Teŋhe zan'an lɔgɔrɔ wan dɛna yamam bonɔ, ya wan tara popeelom la ba lɔgɔrɔ la. 7Ba daa dela sɛba te nyanɛ di ba' gaŋɛ, ge nananawa, n wan dekɛ birikinte kan'ehe ba, ge bahɛ te kan'an sige ba zuo na, te ba tara popeelom te bo ka tara ba'ahegɔ. 8Mam Na'ayenɛ nɔŋɛ la narehom. Ge n suunre ka bote fan' la be'emtooma la fiin me. Mam birikintɛ zuo mam wan yɔ' ba ge eŋɛ nɔbiŋere n ka tare ba'ahegɔ la ba. 9Teŋhe nɛreba woo wan mi' ba yaahe ge ba wan tare yu'urɛ. Sɛba woo n nyɛ ba wan mina te mam Na'ayenɛ bo ba zo'o'hogɔ ba bɔŋa poan. 10Mam poorɛ pee mɛ la n Na'ayenɛ. Mam sea nyeena mam Yenɛ la. Se'ere n sɔe la a dekɛ la faanrɛ futo pile mam, ge dekɛ tontɔɔ vom futo yɛɛlɛ mam. Te n ana wo boraa n ye pɔgɔdire la ana wo malemadaana la. Mam ane wo pɔka n nyɛ ka sanlema yɛ'a se'ere ele la. 11Daana Na'ayenɛ wan bahɛ te tontɔɔ la pɛnka yooma bule yehe na wo bonbula n bule teŋa yɛhera na se'em la. La wan bule yehe teŋhe wa woo poan na la.

will be added

X\