Isaiah 60

1Ihege la ho nɛɛ. Ho nɛɛhom la paɛ na. Na'ayenɛ soŋa la nɛɛrɛ baha la ho zuo na. 2Behɛ, lika ma'an n pin' teŋparɛ wa. Lika kantɛ n pin' asaala woo n boe ka zuo, ge Na'ayenɛ soŋa n nɛɛre bahera hom zuo. 3Teŋhe wan nyɛ hom nɛɛhom la wa'an na. Nadoma wan nyɛ ho peelom la wa'ana. 4Gorege behɛ ho mɛŋa kae. Nɛra woo lagahere kena ho zan'an na la. Ya dayɔɔhe n bala ze'ele zan'an n zaaɛ kena lɛbera na la, ge te ba gorom ho pɔyɔɔhe la wo kɔma la tara lɛbera na la. 5Ya han nyɛ wana, ya nɛhe wan di. Te ya sunya pee, te ya nyeena. Ba wan zi teŋse'ehe n boe ko'kantɛ yakenɛ ha la lɔgɔrɔ tare na bo ho. Ba wan zi teŋhe lɔgɔrɔ tare na bo ho. 6Yogoma wan perɛ ho teŋa wa. Midian la Epah teŋa yogoma paalehe la wan wa'ana perɛ ho teŋa wa. Ge te sɛba woo n ze'ete Sheba teŋa kena na la wan kena ge tare sanlema, la nyuŋo soŋɔ digilom sɛba pɛngɛ mam n de ho Na'ayenɛ la. 7Nebaiot la Kedar piihe la zan'an wan pe'e na bo la hom ge ba wan dɛna bo'olom lɔgɔrɔ bo mam kaanbegɔ zen'an la zuo, ge Na'ayenɛ wan bahɛ te a Yire tara na'ahegɔ gana zan'an. 8Bene n bala ziira tɔla wo saa saŋgbanɛ wa, ɛnkera bala wo dayene n ɛnkere yɛ'a de teko poan wa? 9Ho nɛreba la basɛba boe la teŋse'ehe n boe ko'om nɔgbɛman ha gura mam. Tarsis teŋa ɔɔnrɔnɔ kanra pon deŋɛ nɛŋa ta tara ho dayɔɔhe la n boe teŋse'ehe n zaaɛ la poan kena na, la ba sanlema la sanlenpeelega te ba na'ahɛ Na'ayenɛ n de ho Yenɛ yu'urɛ la, la Israel Fa'adaana la. Se'ere n sɔe la, mam n perɛ ho mɛ la soŋa. 10Saama wan malom mɛ ho dangɔɔma la. Ba nadoma wan tona bɔ'ɔra hɔ. N ŋmɛ ho me la sunsunyiim, ge n nya wan to'e ho la n ninbɔn'zɔrɛ. 11Ho nayahe kan malom ta'an yo yu'uŋɔ bii wontɛɛŋa, la wan yu'ɛ bala te teŋhe nadoma tara ba nɛreba kɛn'ɛra na la ba lɔgɔrɔ 12Teŋsɛka bii sɔ'ɔlom sebo n ka sakɛ te ka bɔna ho nu'uhen nyɛ sagaŋɔ. 13Lebanon teŋa tiihe soma dɔɔsonɔ la zan'an wan zina bo ho. Ba wan zi dɔɔrɔ la na dekɛ maalɛ mam Toolom Yire la, n me wan bahɛ te mam po'ohegɔ yire la n de mam na'arɛ tagalegɔ zan'an la tara soŋa. 14Sɛba n yuum yaɛ hɔ ge muguha hɔ la yaahe wan wa'ana pɔnrɛ na'ma ho nɛŋan, ge yele ho yeti, Hom n de Na'ayenɛ teŋa la. Hom n dela Zion, Israel Fa'adaana la. 15La ban pon yaɛ hɔ, ge zagahɛ ho, te nɛra pon ka dɔla ho poan tɔla la, Mam wan perɛ hɔ lo soŋa ma'an, ho wan lebege teŋa te n wan tara yu'urɛ, ge tara popeelom saŋa woo. 16Ya wan mɔgɛ teŋhe bin'ihom la nadoma bin'ihom. Ho wan baŋɛ ti mam, Na'ayenɛ n de ho faanra. Mam Se'em N Yɔ' Bahɛ, Yakob Paŋadaana la. 17Hom n tare dɔɔrɔ la kuga eta sɛla la, n wan tee nyɔgom, la kuto bo ho ge tee sanlema, la sanlenpeelega bo hom n tare nyɔgom, la kuto eta sɛla. N wan bahɛ te sunma'ahom la narehom dɛna ho naba, la ho kema. 18Gbirigere, la sagaŋɔ, la gbi'a tooma yuŋo bɔna ho beene wa poan. Ho wan segɛ ho dangɔɔma yu'urɛ Faanrɛ, ge segɛ ho nayahe la me yu'urɛ Pɛnka. 19Ho kan ɛɛra wontɛɛŋa, la ŋmarega nɛɛhom le yɛ'ɛha. Mam ho Na'ayenɛ la n wan dɛna ho nɛɛhom. Ho Yenɛ wa wan nɛɛra bɔ'ɔra, ge bahɛ te ho nyɛ na'ahegɔ. 20Ho wontɛɛŋa ka le tara lua, bii ho ŋmarega tara sika, Na'ayenɛ wan dɛna ho nɛɛhom yɛ'ɛha. Ho ninbɔn'ɔn dabeha la wan ba'ahɛ. 21Ho nɛreba wan dɛna tontɔɔdoma sɔe teŋa la bɔna yɛ'ɛha. Bama n de mam tiihe te mam borɛ te ba pɛngera mam. 22Yire se'ere n boe ya poan te de nɛreba ka zo'e, wan wi'ɛ kɛn' tuhure, te se'em n ka tare paŋa ya poan, wan kpe'em wo gbegenɛ la. Saŋa la han ta paɛ, n wan tom yele dena wa kalam te la ka tɔna.

will be added

X\