Isaiah 59

1Dagɛ la Na'ayenɛ ka tare la paŋsɛka n fan' ya bahɛ bii a toba n ka wone. 2Ge ya be'em n beŋe yamam la Yenɛ. Ya toonbe'ero la zuo te Na'ayenɛ sogɛ a nɛŋa te ya yi'ira te a ka kɛleha ya la. 3Ponpɔrɔŋɔ seko n sagom ne ma'an n ze'ete ya nɔɔrɛ poan yɛhera na. Ya nu'dibila woo tare tona la be'em, ge te ziim lerom ya nu'uhe wa zan'an. 4Se'em ka dole som. Se'em ka tɔgɔre a yele la birikinte. Ya dekɛ ya mɛhe bo la nɔkpe'enyooro la ponpɔrɔŋɔ. Ya ne nyɔkɛ la daaŋɔ poorɛ, ta dɔgɛ be'em. 5Ya wɛkerɛ la kanpɛɛnhe gɛla, ge wogora valeŋa paareŋa. Se'em woo n obe gɛla la ne ki me. Gɛla la deyema me han wɔnregɛ, kanpɛn'a n yehere na pa'aha. 6Ba paanrehe la te ba wogora la kan ta'an dɛna futo, ba kan ta'an dekɛ ba pin' ba mɛhe. Ba tooma dela toonbe'ero, ge te ete seko te ba eta la kɔ'ɔn dɛna la gbirigere la zaba etegɔ ma'an. 7Ba iŋhe n kete bɔta be'emtooma. Ba kanbele me koora nɛresɛba n ka tare tuure. Ba tɛn'ɛha woo dela be'em tɛn'ɛha ma'an, ban doohe zen'an woo tole bilam ne sagom me. 8Ba ka mi' sunma'ahom sore la. Narehom ka boe ba zen'an. Se'em woo n dole ba sore ka tare sunma'ahom. 9Narehom zaan mɛ la tomam. Tontɔɔ vom pon ka pɔnra tomam, na. Tomam eere nɛɛhom, ge lika ma'an te to nyɛta. To eere la te nyɛ sɛla n ane pɔi, ge te kɔ'ɔn kena la lika poan. 10Tomam yare ɛɛra tu'una mɛ to sore la zuo wo fɔa n babele dangoon kaara. Wontɛɛŋa to lu mɛ ana wo to bo la lika poan. Tomam bo la nɛre kpe'eŋo zen'an la ge ane wo to ki me la. 11Tomam kaahere me wo sanheŋa la, fabela wo dayene la. Te tɛn'ɛhe ne te to wan nyɛ ne narehom la faanrɛ ge, aai, ba zaan me la tɔ. 12Se'ere n sɔe la, tomam tuure la zo'e mɛ gan'an hom nɛŋan. Tomam mɛŋa be'em la n sagom tɔ. Daarɛ wo to be'em tooma bo boe mɛ la to. To mi' to be'em n an se'em. 13Tomam mɛŋa n zagahɛ hɔ, ge bire to pɔya bahɛ hom Na'ayenɛ. Tomam sunya n pan'ahe tɔ, te to parom. Ge toora basɛba, ge muguha ba, ge bire te pɔya bahɛ hom Yenɛ. 14Sɛla n ka nare n ete zan'an woo. Narehom keŋɛ zaan me. Ba dige yelemɛŋɛrɛ yetɔgom deto la poan me. Ba zɛnkɛ birikinte lobe bahɛ la kenkɛleŋa ha. 15Nɛra woo kɔ'ɔn parona mɛ. Se'em woo n nya ne ta bahɛ be'em ne lebege la nɛre kɛgeŋɔ. Na'ayenɛ n baŋɛ te narehom ka le bɔna la, la ka pee a poa. 16Sɛla n daane a suunre gaŋɛ dela a ka nyɛ se'em n wan maalɛ yele la. Bala zuo te a mɛŋa tom faanrɛ toonɛ, te a mɛŋa fa'a naanɛ la tara en. 17Tontɔɔ naanɛ n de a pɛɛn tɛ'ɛlega, ge te faanrɛ me dɛna a zaba sapibire leregere la sunsunyiim n de a futo te a a yɛ'. 18A yeti a yɔ ba la ban tom sɛla. A wam yɔ a diŋdoma me la sunsunyiim, ge yɔ a bɛ'ɛba sɛba n boe ko'om nɔɔrɛn la me la leregere. 19Teŋse'ehe n boe nɛŋa wa wan zɔta Na'ayenɛ yu'urɛ la dabeem la se'em n boe dapɔya bɔba wan nyɛ a pɛnka. Enŋa wan wa'ana la paŋa gbirige ba me wo sabeeo ko'om n uure na la. 20Nɛre Se'em N Yɔ' Fan' ya wan wa'an Zion teŋa na. A wan fan' Yakob yaahe se'ehe woo n yehe ba mɛhe be'em poan la bahɛ. 21Na'ayenɛ yeti, Nɔɔrɛ se'ere te n biŋera la ba n wana: Mam Sea sɛka n boe ho zuo wa, la mam yelehom sebo te n dekɛ eŋɛ ho nɔɔrɛn wa, kan malom yehe ho nɔɔrɛn wa, bii ho kɔma nɔɔrɛn, bii ho kɔma me kɔma nɔɔrɛn, pɔhɛ zina kɔ'ɔn yɛ'a na.

will be added

X\