Isaiah 58

1Voole yelehom wa, da sina. Yele mam nɛreba ba be'em n an se'em. Yele Yakob yire ba be'em yele. 2Daarɛ woo ba eere mam mɛ, ge ana wo ba mɔ'ɛ la nini bɔta te ba zamehɛ mam pa'alegɔ la. Ba ete wo ba dela teŋa n bote ka tona yelesoma la. Ba ete wo ba bote ba nana la Yenɛ ze'elego la. Ba sokere mam la sɛla n de yelemɛŋɛrɛ, ge ban po'ohere Yenɛ, ba bote te Yenɛ bo ba zen'enhe. 3Bene zuo te tomam zagahɛ to mɛhe te hom ka behɛ nyɛ tɔ? Bene n sɔe te tomam sigehe te mɛŋa te hom pon ka baŋɛ te to eŋɛ sɛla? Behɛ, daanse'ere daarɛ te ya yeti ya lo ya nɔɔrɛ la, ya tone la yan bote se'em, faanra ya tontoneba. 4Te la ta paɛ zan'an te ya sunsunya nyie te ya bɔta te ya ŋmɛ' taaba ya nɔlorɛ la poan. La dagɛ sɛla te ya wan pon tɛn'ɛha te Na'ayenɛ wan kelehe ya nɔlorɛ dena wa taaba poan. 5Nɔlorɛ dena wa taaba te mam bɔta? Te nɛra yeen dekɛ daanyenɛ ma'an sigehe a mɛŋa? Nɔlorɛ dela nɛra yeen suuta a zuo wo keho? Bii ho yeen gan'an teŋa bilina? Bala te yamam tara yi'ira nɔlorɛ wa? Wana te yamam yeti daan dena dela daanse'ere te Na'ayenɛ loe wa? 6Mam n loe ge bɔta nɔlorɛ se'ere taaba n wana: ya lorege potɔɔ fan' zonregɔ la bahɛ, ge pakɛ muguhego yɔgɔhɔga n bage sɛba zuto la bahɛ ge fan' sɛba n boe namehegɔ poan la bahɛ. 7Dekɛ ya ya dia tɔnrɛ la sɛba kom n done, ge bo sɛba n de taromdoma me gan'ahegɔ zen'an. Bo sɛba eere beele futo te ba yɛ, ge da zagahɛ ho sɔɔn. 8Bala te ya bugum la wan nɛɛ lika la poan, ge te ho tebegɔ wa'an kalam na te ho tontɔɔ vom la ya bɔna ho nɛŋa kena, te Na'ayenɛ soŋa la nya dɛna ho sɛla n gure ho. 9Te ho nya han yi, Na'ayenɛ la wan lebehe ho. Ho wan kaaha bɔta soŋorɛ te a yele ho yeti, Mam wana. Ya han bahɛ muguhego tooma la, la nu'uhe pa'ala taaba la, la yan yehere taaba fehe la, 10ge ya bɔ'ɔra sɛba kom n done dia te ba dita, ge bo se'emdaana n boe muguhego poan n bote sɛla, ho bugum la nya wan nɛɛ lika la poan, ge te ho yu'uŋɔ lebege wontɛɛŋa. 11Na'ayenɛ wan gura hɔ zan'an woo te ho bɔna, ge bo ho sunboolom n de sɛla. A wan bo ho iŋma'ahom, han pon bɔna la pɔgɔtia n de sɛla. Ho wan ana wo zɛɛnrɔ te ba borɛ bahera ba ko'om te ba ana soŋa se'em la. Ho wan ana wo ko'niho n ka malom keenha la. 12Ho wan malom mɛ' yire se'a woo n aanhom yuuman yuuman ha lebege dabooro la. Ho wan malom mɛ' deemen ɛɛnba la. Ho yu'urɛ wan yi'ira la dangoon maala. Se'em n malom maala teŋhe sɔya. 13Ho han ka tara kena zen'an n wan ganlom Vo'ohogo Daarɛ la, ge me ka eta ho mɛŋa n bote se'em mam toolom daarɛ la poan, ge ho han bahɛ te Vo'ohogo Daarɛ la ana soŋa ho zan'an, ge na'aha Na'ayenɛ fa'a dabaherɛ la, ge ka kena hom bote zan'an dabeha aŋa poan, ge ho han na'aha dɛ ge ka eta ho mɛŋa n bote se'em bii tɔgɔra yelese'a te ho mɛŋa bɔta, 14ho wan nyɛ popeelom Na'ayenɛ poan. N wan zɛnkɛ hɔ te ho yaga saazuo, ge dɛ'ɛna ge dita ho sɔyaaba Yakob sɔ'ɔlom la poan. Na'ayenɛ yele se'em n bala.

will be added

X\