Isaiah 57

1Tontɔɔdoma mɛlom mɛ te nɛra ka bɔna sɔkera ba yele. Nɛra n dekɛ ba mɛhe kaanbɛ mɛlom mɛ te nɛnɛra ka bɔkɛ, be'em paare tontɔɔdoma mɛ. 2Nɛresɛba n ze tontɔɔ la Na'ayenɛ han ne ki, ba ne bɔna la sunma'ahom poan, la ne dɛna la vo'ohogo bo ba, la ban pon ki la. 3Yamam sɛba n de bakolo bogoreba kɔma wa, wa'an ya na. Yalomdoma la pɔgɔyaalehe kɔma wa vuruhe ya du' na. 4Yamam kɛhere la ane? Ane te ya sɛn'ɛha ge me'era? Ya dagɛ la pobiregadoma kɔma, dagɛ ponpɔrɔŋdoma yaahe n de ya? 5Dagɛ yalomtooma ma'an koŋkoma'ahom te ya tɛn'ɛha ya tiihe la tilain? Dagɛ ya kɔma te ya kɔrɔna ba kaanbera bon'orɔ poan, la tahe lane la? 6Ya loe la ya po'ohera baga se'a n de kuga. Bama te ya tara ya daam, boom bo'olom bɔ'ɔra ba. Ya bote mam poorɛ kelom pee la ya la yan ete wana wa woo la? 7Ya maalɛ ya gan'ahegɔ zen'enhe la zɔya zuto ha, nya zɔna bilam kaanbera ya baga. 8Baga ma'an n boe ya yiya la paan. Ya kɔ'ɔn zagahɛ mam me, ge koohe ya mɛhe bo ya zabadoma la te ya nya ne zom ya gɔre kanra la zuto nyɛta taaba beela. 9Ya ne sɔn' la tiihe kaam, la nyuŋo kaam yema yema nya keŋɛ ta po'oha Molek bagarɛ. Ya tom ya nɛreba ge dɔla ke'endoma sɛɛhe poore bɔta kan'aŋɔ ba zan'an. 10La yan pon doohe baga la poore ta taregɛ la, ya ka sakɛ te ya bahɛ. Ya sunya n ton ba kɛn' a gaŋɛ me te ya kan ta'an bahɛ. 11Ya ne parom ge ka tɛnra mam yele la ane te ya ne zote ya paleŋa ne ɛngera mɛ la ane? Mam sini wuuha la zuo te ya ka zɔta mam? 12Ya tɛn'ɛhe te ya dela nɛre tontɔɔdoma, ge n wan lilige yan ane se'em pa'ale ya. 13Ya nya han ta bɔna daaŋɔ poan, ya yele ya baga la te a soŋɛ ya. Ge mini ya soŋa te sabeeo wan pe'e bama zan'an keŋɛ. Ge nɛra se'em n dekɛ mam eŋɛ a sokazen'en, enŋa daana n sɔe teŋa la sɔna ge sɔna mam fa'a zoore la. 14Daana la yeti ya, Maalɛ ya sore la, von ya sɛla woo n boe sore la zuo bahɛ. 15Gaŋɛ Zan'an Daana la n boe saazuo ha la a tare toolom yu'urɛ n yele se'em n wana. La mam n pon bɔna saazuin ha la, n boe me la sɛbadoma n sigehe ba mɛhe, ge dekɛ ba mɛhe delom mam la, te n soŋɛ ba. 16N nɛreba wa, n sunsunya kɔ'ɔn kan nyie la ya te n zɛrɛgera ya daarɛ woo. N han yeti n eŋɛ bala, nɛresaala sea la n de vo'ohom te mam maalɛ eŋɛ a poan la wan taregɛ. 17Yinka tooma la n boe ho poan la zuo te mam sunsunya nyie la hɔ te mam namehɛ hɔ, ge ŋmɛregɛ n nɛŋa ho zan'an. Ge la bala zan'an ha, ho kelom sina me ge tuta kɛn'ɛra ho be'em la poan. 18N nyɛ hom n ane se'em, ge la bala zan'an, n wan kelom tebɛ hɔ. N wan gura en, ge bo en sunbogohom. 19N wan dekɛ pɛka yooma eŋɛ sɛba n kele Israel teŋa la poan la nɔɔrɛn. Na'ayenɛ la yeti, Sunma'ahom, sunma'ahom wan bɔna bo sɛbadoma n zaaɛ la sɛbadoma n lɛm. N me wan tebɛ ba. 20Ge potɔpa la ane wo ko'om n ŋmɛ'ɛre ko'mi'inhe gbirigera dɛngerɔ se'em la, ba ka malom tara vo'ohogo. 21Ge mam, se'em n de Daana la biŋe la n nɔɔrɛ, te potɔya kan malom tara sunma'ahom.

will be added

X\