Isaiah 56

1Na'ayenɛ yeti, Ete ya sɛla n nare, ge dɛna tontɔɔ. La kan yuue la mam wa'ana fan' ya bahɛ, mam faanrɛ paŋa wan paɛ teŋa woo teŋparɛ wa zuo. 2Sɛba n ete bala, Na'ayenɛ wan kan' som bahɛ ba zuo. Kan'somɔ wan bɔna nɛresɛba n zagahɛ be'em. 3Sɛba n de saama ge lagom po'oha mam la da yele ba mɛhe yeti, Tomam ka lagom pa'ahɛ Na'ayenɛ nɛreba la kanlɛ poan. Boraa se'em n ka dɔgɛ kɔma da yele se mɛhe yeti, Mam dela tiihe n ku'e zɛ'a. 4Na'ayenɛ n yeti, Boraahe sena n tɛnre mam Vo'ohogo Dabeha ge nana mam soŋa, 5n wan bahɛ te mam Yire la poan mam nɛreba poan, n wan bo en yu'urɛ te ba tɛnra a yele gana en dɔgɛ ne dayɔɔhe la pɔyɔɔhe. N wan bo en yu'urɛ n ka tare ba'ahegɔ. 6Saama sɛba woo n dekɛ ba mɛhe tabelɛ Na'ayenɛ la, nɔŋɛ Na'ayenɛ yu'urɛ, ge po'ohera en la, sɛba woo n na'ahere vo'ohogo la ge ka galena ko la, la sɛba n gorɛ mam nɔɔrɛ yele hom la kaŋkaŋe la. 7Bana te n wan tare zom n toolom zoore la zuo na, bo ba nyeeŋɔ n Yire la n de po'ohegɔ ma'an zen'an la poan. N wan to'e ba nyɔ'an la kaanbegɔ bo'olom sebo woo te ba wan kaanbɛ n kaanbegɔ zen'an la zuo. Mam Yire la yu'urɛ wan yi'ira la po'ohegɔ yire bo teŋa woo. 8Daana Na'ayenɛ yeti, Mam lagahɛ Israeldoma wa na, n wan lagahɛ ba taaba la na pa'ahɛ ba poan. 9Mɔɔen dunhe wa, ze'ele ya mɔen la na sagom nɛnɔ wa. 10Yamam Israel nɛŋadoma wa n de guruba gura n nɛreba wa la fɔ mɛ. Ba ka tare yam. Ba dele baahe n ginhe. Ba ka ta'an wɛha. Ba gan' ginha mɛ zaanhena. Ba nɔŋɛ la gɔɔm. 11Ba dela baahe n tare koŋkoma'ahom, sɛla ka malom sekera ba. Ba dela duŋkeema n ka tare bɔkerɛ. Ba zan'an ŋmɛregɛ dɔla la ba sore ba sore, nɛra woo eere la a mɛŋa bonɔ. 12Ba yeti taaba yeti, Wa'an ya na te to nyu daam buge. Beere to wan nyu' buge gaŋɛ bala.

will be added

X\