Isaiah 52

1Zion, ihege. Kpemehe ho mɛŋa. Yɛ ho na'am futo. Yerusalem n de toolom teŋa la. Dɛngerɔdoma wa kan le kɛn' ho teŋa wa. Dɛngerɔdoma la nɛreba kan nam Na'ayenɛ kan le malom daane hɔ. 2Piihe puuhugo seko n puke ho wa bahɛ. Yɛɛ min'sɛka n lo ho nyugela wa. 3Na'ayenɛ yeti, N nɛreba wa, ba koohe ya mɛ, ge dagɛ ligiri. Nananawa wa, ba wan yɔ to'e ya, ge dagɛ ligiri. 4Daana Na'ayenɛ yeti, Mam nɛreba wa yuun nɔgɛ keŋɛ la Mizraim teŋa ta bɔna. Asiria teŋa tabelɛ muguhe ya mɛ. 5Na'ayenɛ yeti, Nananawa, beni te n tare kala? Teŋa kayema n bala le pɛnregɛ mam nɛreba wa keŋɛ te ba dɛna da'aba yoo. Te ya nɛŋadoma kɛla te la dɛna kɛhega daarɛ woo bo mam yu'urɛ la. 6N nɛreba wa, ya wan baŋɛ mam de se'em, ge baŋɛ se'em n de mam tɔgɔra wa. Sɛla woo te n yele wa wan tom. 7Behɛ lan som se'em. Yele mɔɔla n ze'ele zoore zuo tara yelesonɛ yɛ'a Yerusalem na. A mɔɔle la sunma'ahom yɛla. A mɔɔle faanrɛ yɛla. A yele Zion yeti ho Yenɛ n sɔna. 8Sɛba n gure ho teŋa la n bala yoona la popeelom la. Behɛ, Na'ayenɛ n lebere Zion poan na. 9Yerusalem, ihege ho daboo wa poan lagom yoon la popeelom. Na'ayenɛ bogolɛ a nɛreba wa suunre. A yɔ' to'e Yerusalem teŋa bahɛ. 10Na'ayenɛ wan zɛnkɛ a fa'a nu'o la te teŋa woo teŋparɛ wa zuo nyɛ to Yenɛ faanrɛ la. 11Yehe ya, yehe ya bini! Yamam sɛba n ziire Na'ayenɛ toolom lɔgɔrɔ ya poan la, da kalom ya sɛla n de dɛngerɔ. Yehe ya na. Da ganlom ya. 12Ge ya da kanbele ya. Na'ayenɛ mɛŋa wan bɔna ya nɛŋa. Israel Yenɛ la wan dɛna ya gura. 13Behɛ, mam yameŋa la yeti a tona mɛ la yam. A wan nyɛ pɛnka la na'ahegɔ seko n gane zan'an. 14La wan pakɛ nɛreba, la sɛla n eŋɛ en la. A ba' namehe gaŋɛ mɛ. Nɛresaala iŋa kan ta'an to'e a woŋerɛ la taaba 15Mam yameŋa la wan pee teŋhe te se ta'an po'ohɛ mam. Nadoma wan mum ba nɔya enŋa zuo. Ban ka tabelɛ yele ba sɛla la, ba nini wan nyɛ la. Ban ka tabelɛ yele ba se'ere la, ba wan pon bɔkɛ dɛ.

will be added

X\