Isaiah 5

1Mam wan yoon yoonɛ bo n nɔŋerɛdaana wa, doohe a tiihe va'am wa. Mam nɔŋerɛdaana wa sɛ la a tiihe va'am zoore n tare pɔn'ɔhegɔ zuo. 2A bugulom zen'an la mɛ, yehe kuga ka poan, ge nya luguhe tiihe se'ehe n wom wɔla n ane nyɛlom sɛ va'am la poan. A beŋe bo kae, ge maalɛ daam ŋmɛkerɛ boko bini, ge nya gura te a wan nyɛ wɔla soma. Ge va'am la wom wɔla pɔn'ɔha ma'an. 3Yerusalem la Yuda teŋa nɛreba wa, gankɛ ya mam la n va'am wa teŋasoka. 4Bene n de n eŋɛ va'am wa te n ka eŋɛ? Ge wane te n ta ɛɛra wɔla n ane soŋa, te va'am wa wom wɔla pɔn'ɔha? 5N wan yele mam yeti, N eŋɛ n va'am wa se'em. N wan voen sɛla n beŋe bo kae la bahɛ, ge bahɛ bɔ te bo sagom. N wan gbi' dangoone se'ere n kae bɔ la bahɛ ge te ba nɛɛra bo poan tɔla. 6N wan bahɛ te bo kpanrɛ gan'an. Bo kan yɔrɔha, bii bo kɔ. Gɛnra la gɔn'ɔhe wan to'e bo. N wan go' saa saŋgbana te a kan ni saa bahɛ bo poan. 7Pɛɛntɛɛnreba Na'ayenɛ la tiihe va'am wa dela yamam Israel yiredoma, te Yudadoma dɛna tiihe la te a yam kɛn' la. Te a behera te a wan nyɛ yelemɛŋɛrɛ ya poan, ge behɛ, ziim ka'ahegɔ ma'an te a nyɛta. A eere la tontɔɔ vom ya poan, ge behɛ muguhego koonɔ ma'an te a wona. 8Yele boe sɛba n malom mɛta yiya pa'aha yiya poan, malom tɔ'ɔha samana pa'aha, te fole ka le ta bɔna, te ba ma'an nya ne bɔna teŋa la poan la. 9Pɛɛntɛɛnreba Na'ayenɛ la n yele se'em mam tobaen n wana, yiya kekeko wan ta zɛ'a vɔya. Yikanrɛ soma wan ta zɛ'a te nɛra ka bɔna a poan. 10Tiihe va'am pia wɔla wan ŋmɛkɛ la daam yoore ma'an, te bonbuula la dokɔ han dekɛ borɛ, ho ta kɛ'ɛra la wanɛ ma'an. 11Yele boe sɛba ne ihege bolika yu'uŋyu'uŋɔ digera daam kpe'eŋo la, la sɛba n ne yee daam poan tara tara la yu'uŋsunsua ta buge la. 12Ba de'enɔ zan'an dole mɛ la kɔnlɔ la duurenhe la yiihe la daam. Ge ba ka behere Na'ayenɛ n bote se'em, bii Na'ayenɛ n wan eŋɛ se'em. 13Bala zuo, ba wan pɛnregɛ Na'ayenɛ nɛreba wa loŋe teŋa, ban ka bɔkere la zuo. Ba nɛrezura wan vibe, te ko'nyuuro woŋɛ ba nɛrekooŋɔ la. 14Bala zuo, yɔɔ maahom la vɔlɔga, te ya'ɛ nɔɔrɛ zan'an zan'an gura. Ba dela Yerusalem nɛrekanreba, la a nɛrekooŋɔ la sige ko poan, la sɛba n ŋmɛ'ɛre nyɔ'ɔrɔ, la sɛba woo n dite nyɛlom ka poan la zan'an. 15Nɛreba wan sigehe teŋa. Nyanɛ wan di nɛrekanreba. Nyanɛ wan di pa'alɛ n mɛŋa doma. 16Ge Pɛɛntɛɛnreba Na'ayenɛ wa ma'an n wan nyɛ pɛnka a gankerɛ la poan. Fa'a Yenɛ wa han ta gankɛ, a na'am paŋa la wan nɛɛ na. 17Te a piihe la bɔna se mɛŋa bɔn'ɔrɔ poan ɔbera. Pebibihe la, la saama wan dɔla daboto la poan ɔbera. 18Yele boe sɛba n dekɛ be'em lo la pan'ahegɔ mi'an vuura la zuo, la sɛba n lo toonbe'ero wo mi'an n lo toroko vɛ'ɛra 19ge yeti, Yenɛ eŋɛ kalam. A tom n wan tom se'em la kalam te to nini nyɛ. Israel Fa'adaana wa n maahom sɛla la wa'ana tom te to baŋɛ la. 20Yele boe sɛba n tare som yi'ira be'em, ge tara be'em yi'ira som la zuo, la sɛba n tare lika yi'ira nɛɛhom, ge tara nɛɛhom yi'ira lika la, la sɛba n tare sɛla n tɔe yi'ira nyɛlegɔ, ge tara sɛla n ane nyɛlegɔ yi'ira too la. 21Yele boe sɛba n tɛn'ɛhe te ba dela yamdoma la zuo, la sɛba n tɛn'ɛhe ba wakɛ mɛ la. 22Yele boe sɛba n de daam bugureba la zuo, la sɛba n de agaam daam nyu' kpɛ'ɛndoma la, 23la sɛba n to'ohere mu'ure ge lila be'em, ge pina yelemɛŋɛrɛdoma boorɔ la. 24Bala zuo, wo bugum zɛleŋa n zɛɛre sɔgɔrɔ se'em la, la te mɔɔ kɛ'ɛhe mɛŋa luta bugum poan se'em la, bala mea te ba iŋhe wan pɔn'ɛn berege, te ba wɔla kanra yɛ'a wo puuhugo la. Se'ere n sɔe la, ba zagahɛ Pɛɛntɛɛnreba Na'ayenɛ la pa'alegɔ la mɛ. Ba ka nam Israel Fa'adaana la yelehom la. 25Bala zuo te Na'ayenɛ sunsunyiim taɛ bahɛ a nɛreba la zuo, te a zabera ba. A mɛŋa nu'o n zaberɛ ba, ge ŋmɛ ba lobɛ teŋa. Zɔya miine mɛ, te kum ki gan'an wo sɔgɔrɔ n gan' sɔrɔtɔ zuo la. Ge la bala zan'an, a suunre nan kelom ka ma'ɛn. A kelom zabera mɛ. 26A zɛnkɛ a danlehom yebehɛ teŋse'ehe n zaan. A peebe yi' te se ze'ele teŋparɛ zen'an n ka yɔe na. Behɛ, se yeti se kanbele mɛ na, suŋera na. 27Ba se'em ka loe taregera, bii gɛnta. Ba se'em ka zɔgɔre, bii ginha. Ba se'em sɛganɛ ka loregere, bii ba se'em tagatɛ mi'an kɔ'. 28Ba pɛɛma ane la sɔnpe sɔnpe, te ba tiini ba' soŋa gura. Ba yiri to'feenna kpe'em mɛ wo keberɛ la, te ba zaba toroto na'ma viliŋera wo saabeeokeŋɔ la. 29Ba tanhere wo gbegenyan'aŋa la. Ba wuunluna wo gbegenpaalega la, Ba pɔnta ba dima la wo gbegenɛ n nyɔkɛ nɛŋɔ pɔnta ko se'em ta ɔnbegɛ keŋɛ la. 30Ba wan uue ba diŋdoma la wo ko'kantɛ n uure se'em la de daarɛ. Behɛ, teŋa la poan de daarɛ wan dɛna la lika la sunsagaŋɔ ma'an. Saŋgbanɛ wan pin' te nɛɛhom kan bɔna.

will be added

X\