Isaiah 48

1Israel nɛreba wa, ya dela Yakob buuri, ze'ele Yuda buuri la poan na. Ya pɔ mɛ te yamam po'ohere la mam Na'ayenɛ Israel Yenɛ la, ge ya parone mɛ. 2Ya yeti Yerusalem n de yamam yire, te yamam dɛla la mam Pɛɛntɛɛnreba Na'ayenɛ, dɛna Israel Yenɛ wa. 3Yuuman yuuman ha la, ma yuun yele sɛla n yeti la eŋɛ, sɛla me yuun ka eŋɛ pa'alɛ te la wan seren eŋɛ. Ge te la seren wa'ana eŋɛ. 4Mam mi' te ya toba kpa' mɛ, te ya sunya ku'e. 5N yeti ya yele ana wa te a han ta eta ya da yeti, baga wa te to kaanbera wa en bahɛ te yɛla wa eta. 6Ya wom mam yelese'ere, ya nini nyɛ te la seren eŋɛ. Nananawa, sakɛ ya te la dela sera. N wan pa'ale ya yelese'a n sogɛ te ya ka tabelɛ mina. 7Zina n ete la yelepaalɛ, sɛla te ya kan ta'an yeti ya tabelɛ wom dɛ. 8Ya ka malom pon eŋɛ ya potɛn'ɛrɛ te ya kelehe mam yeti sɛla. Ya dɔgom poan ha te mam pon baŋɛ te ya wan bire poore bahɛ mam. 9Mam yu'urɛ la zuo te mam gu' en sunsunyiim la. Mam yu'urɛ la pɛnka zuo te mam gu' ge ka sagom ya. 10Behɛ ya, mam nyɛlegɛ ya mɛ da yelehɛ ya wo sanlenpeelega la. Mam dekɛ la n sunsunyiim yelehɛ ya te ya namehe ge dɛna ana soŋa. 11Mam mɛŋa zuo ma'an te n wan tom dɛ. Mam kan sakɛ te n yu'urɛ sagom mɛ. Mam kan dekɛ n soŋa bo ayema. 12Yakob, kelehe ya. Mam yi'i hon Israel. Mam de enŋa. Mam de pɔhega, ge dɛna ba'ahegɔ. 13Yelemɛŋɛrɛ, mam mɛŋa nu'o n naam teŋparɛ wa, ge yeregɛ saŋgbanɛ wa. Ba nane mam nɔɔrɛ n han ta yi'ire ba. 14Ya zan'an kan'ahɛ ya na ge kelehe. Ba ane n tabelɛ yele yele ana? Na'ayenɛ nɔŋɛ en. A wan wa'ana tom Na'ayenɛ n bote se'ere la Babilon poan. A nu'uhe wan zabɛ la Kaldeadoma wa. 15Mam yele bala. Mam loe en. Mam tare en na. A wan tom a toonɛ n de se'ere mɛ la nyaŋerɛ. 16Vuruge ya lɛm na kelehe soŋa. N ka tabelɛ dekɛ yelese'ere sogɛ ya. Mam boe yele wa pɔhega poan mɛ na. Daana Na'ayenɛ n la doohe la a Sea poan tom mam na. 17Na'ayenɛ la, Faanra la, Israel Fa'adaana la yeti, Mam de Na'ayenɛ ya Yenɛ la. Mam pa'ale ya la tontɔɔ sore, la sɛla n ane soŋa. 18Ya han nam ne mam nɔɔrɛ, som wan perɛ ne ya zote wo kolaa ko'om la. Te ya tontɔɔ bɔŋa ŋmɛ'ɛra wo ko'kantɛ poan ko'mi'inhe la. 19Ya teŋhe wan perɛ ne la nɛreba te ba zo'e wo kolaa tentɔnbin'ihegɔ la, ka tara kanlɛ. N kan bahɛ ne te se'em nyaŋɛ sagom ya teŋa wa. 20Nananawa, yehe ya Babilon teŋa wa poan. Zɔ' yehe Kaldea teŋa. Mɔɔla dɛ ge tare ya popeelom, la ya vɔɔla te nɛra woo wona. Voole ya yeti, Na'ayenɛ to'e a yameŋa Yakob bahɛ! 21Enŋa n daa behere tomam pɔgɔtia la poan ha, bahɛ te ko'om tanhɛ taŋa poan yehe na te to nyu' te ko'nyuuro ka tara tɔ. 22Na'ayenɛ yeti, Be'emdoma kan malom nyɛ sunma'ahom.

will be added

X\