Isaiah 46

1Bel la Nebo dela baga n ka tare paŋa. Ba maalɛ ba mɛ te dunhe ziira ba. 2Baga wa han nyɛ ne faanrɛ a bote, ge te nɛreba sina ge ziire baga wa kaara teŋhe n zaan poan. 3Yamam sɛba n kelom vɔna Israel teŋa wa poan wa, kelehe ya mam Na'ayenɛ wa. Pɔhɛ daanse'ere darɛ te ba dɔgɛ ya la, mam pɛnge ya la bala. 4Ya han pon ta korogɛ te ya zuto pelege n wan kelom eta ya la bala mea, n wan beha ya. Mam naam ya. N wan pɛnga ya, ge gu'ura ya te sɛla kan daana ya. 5Se'em boe wan ta'an dekɛ makɛ la mam? Mam la ane n zone? 6Nɛreba ne makɛ la sanlenpeelega la sanlema, ya yɔ kuta ge te a dekɛ kure yenɛ bo ba te ba po'oha. 7Ba mɛhe ne dekɛ yenɛ la buke, tare dɛ ta sugule zɛ'ɛlega zuo, ge yenɛ la mɛŋa ka tan' kena. Te daaŋɔ han ta paɛ ba, ba yi'ira yenɛ wa, ge de kan lerege ba, de kan ta'an soŋɛ ba. 8Be'emdoma wa, dekɛ ya yele dena wa eŋɛ ya sunya poan. Da malom tamɛ. 9Mam ma'an n de Yenɛ. Se'em ka boe han dagana mam. Mam de Yenɛ ge se'em ka boe ana wo mam. Tɛn'ɛhɛ ya behɛ sɛla woo n eŋɛ yuuman yuuman ha la. 10Mam pɔhɛ yele ya la n wan ta ana se'em. Mam maahom se'ere la wan tom. Mam wan eŋɛ n bote se'em la. 11Mam yeti n wan tare nɛra ze'ele zen'an n zaan na te a tom mam bote se'em la. A wan pɔhɛ dapɔya bɔba wa ha zabera kena na, suŋera na wo selega la. N wan kelom tɛnra n nɔbiŋere la, ge tom mam maahom te n tom se'em la. 12Yamam tobekperegadoma wa n zaan la faanrɛ wa, kelehe ya mam. 13N wan wa'an nananawa na fan' ya bahɛ. N ka zaan, n me kan go'om. Mam ŋmɛ'ɛre la n nyɔn'ɔn la Israel zuo. N wan fan' Zion bahɛ.

will be added

X\