Isaiah 45

1Na'ayenɛ yele Kirus se'em te a loe yɛɛhɛ nadoma logoro mɛ, ge bo sore te a zabɛ zabɛ nyaŋɛ teŋhe, sa'ahɛ nadoma ba teŋhe poan te teŋkanra mɛhe wan yu'uhɛ se nayahe ge teŋa ka boe kan yu'ɛ ka nayaŋa. 2Mam wan bɔna ho nɛŋa gbirigera zɔya, kɔ'ɔra teŋhe kuto nayahe bahɛ te ho dɔla. 3N wan dekɛ lɔgɔseto woo n sogɛ zen'se'ehe woo poan bo ho. Bala te ho wan baŋɛ te mam Na'ayenɛ Israel Yenɛ la n mi' ho yu'urɛ. 4N yi'ire hom yu'urɛ. Mam mɛŋa n tare ho na, ge ho ka mi' mam. Mam zɛnkɛ ho saazuo, n yameŋa Yakob la Israel se'em te mam mɛŋa loe la zuo. 5Mam ma'an n de Na'ayenɛ. Han yehe mam, Yenɛ ka boe. N wan pin' ho, la hom pon ka mina mam la. 6Nananawa, dapɔya bɔba, ta'ara nɛŋa bɔba zan'an wan baŋɛ te mam de Na'ayenɛ. Yenɛ ka boe dɛna sera. 7Mam maalɛ nɛɛhom la lika. Mam bahɛ te nɛra nyɛ popeelom la sunsagaŋɔ. Mam de Na'ayenɛ eta yele ana wa zan'an. 8Saazuo te a ni yelemɛŋɛrɛ bahɛ na wo sigisaa la. Bahɛ te teŋparɛ wa maahom to'e mam faanrɛ paŋa faanrɛ wa te ka bule yelemɛŋɛrɛ se'ere te mam Na'ayenɛ naam wa. 9Ho ka tare sore te ho ŋmɛ'ɛra nɔkpe'ene la ho naana. Ho dela dokɔ te yagombaha yagom. Yɔgɔrɔ ka sokere yagombaha la te, Bene te ho yagom mam wana? Bii to soke yeti n gotehe bɛɛ? 10Yele bo nɛreba te ba soke ba dɔgɔreba te, Ya dɔgom la vɔnrɛ dela dene? Bii ba doma soke madoma la, Ya eŋɛ la wane to ya virigera la? 11Mam Na'ayenɛ, Israel Fa'adaana la a Naana la yeti, Ya tare sore te ya soke mam n mɛŋa nɛreba wa yele? Bii ya soke mam nu'uhe eŋɛ sɛla yele? 12Mam naam teŋparɛ wa, perɛ ka la nɛreba. Mam yeregɛ saŋgbanɛ wa, perɛ dɛ la ŋmarebibihe. 13N bahɛ en te a dela yelemɛŋɛrɛdaana nɛra. N wan maalɛ a sɔya zan'an te ba dela tuntɔɔ bo en. Enŋa wan malom mɛ' mam teŋa wa, ge fan' mam nɛreba wa bahɛ ge kan to'e yɔɔrɛ. Pɛɛntɛɛnreba Na'ayenɛ yele se'em n bala. 14Na'ayenɛ yeti, Mizraim la Kus teŋhe tarega la zan'an zan'an wan dɛna ya denɛ. Ya wan pɛnregɛ Sheba teŋa nɛre dareba la zan'an te ba lebege ya da'aba. Ba wan pɔnta nam ya nɛŋan, ge yɛta ya yeti, yelemɛŋɛrɛ Na'ayenɛ n boe la ya, yena ka boe zen'an. 15Yelemɛŋɛrɛ, hon dela Yenɛ n sogɛ ho mɛŋa. Hon dela Yenɛ n de faanra. 16Tuluŋɔ, la vikantɛ wan di se'em n maale bagarɛ. 17Ge Na'ayenɛ fan' Israeldoma la a faanra bɔna wuuha. Na'ayenɛ wa wan gu'ura hɔ saŋa woo, ge yɛhera hɔ nyanɛ woo poan. 18Na'ayenɛ ma'an n de Yenɛ. Enŋa n naam saazuo la teŋparɛ wa te nɛreba wan ta'an bɔna ka poan. A ka maalɛ ka te ka dɛna pɔgɔtia. Na'ayenɛ ma'an n de Yenɛ, se'em ka le bɔna. 19Na'ayenɛ ka boe lika poan tɔgɔra, bii bo Yakob yaahe la nɔɔrɛ te ba ɛ en yoo. Mam Na'ayenɛ tɔgɔre la yelemɛŋɛrɛ, n yeti la yelese'a n de tontɔɔ. 20Se'em woo n vɔe teŋsɛka woo poan, lagahɛ ya n Zan'an na baŋɛ lan ka tare vɔnrɛ se'em te ya kaanbera dɔɔrɔ baga, bii baga en ka tare ba mɛŋa paŋa. 21Bene zuo te ya ka bɔta te ya lagahɛ taaba te mam, la yamam tɔgɛ? N daa pon ka te'ele yele ya sɛla n wan eŋɛ? Mam ma'an n de Na'ayenɛ. Se'a ka le bɔna. Mam tare yelemɛŋɛrɛ, ge dɛna faanrɛ. 22N yi'ire la nɛra woo te ba ŋmɛregɛ lebe mam zen'an na nyɛ faanrɛ. Mam ma'an n de Yenɛ. Se'em ka boe wɔna la mam. 23Mam pɔ mɛ, mam nɔɔrɛ n ya'ɛ yele, de me wan tom. Nɛra woo wan pɔnrɛ na'ma na'ahɛ mam. 24Ba wan sakɛ te tontɔɔ la paŋa boe la Na'ayenɛ ma'an zen'an. Nɛreba wan wa'an a zen'an na, ge vikantɛ wan di sɛba suunre n nyiin la mam. 25Na'ayenɛ wan dekɛ yelemɛŋɛrɛ, la na'ahegɔ kantɛ la bahɛ bo Israel yaahe zan'an.

will be added

X\