Isaiah 42

1Mam yameŋa n wana te mam bo en paŋa. Mam mɛŋa n loe en. Mam nini n tegɛ se'em n bala. Mam sea n kɛn' se'em n bala, mam sea boe mɛ la en. A wan tare yelemɛŋɛrɛ wa'an teŋhe poan teŋparɛ wa zuo na. 2A kan nyabera, bii a dɔla sɔya zuto vɔɔla. 3A kan kɔ'ɛ mɔseko n pon nyure la bahɛ bii a kiŋɛ bugum sebo n dite finfiinhe bahɛ, a wan lo' a suunre poan te yelemɛŋɛrɛ tona. 4A kan bahɛ bii a tarege han dagana a ta tom la yelemɛŋɛrɛ teŋparɛ wa zuo woo ba'ahɛ. Nɛresɛba teŋhe n zaan ma'ɛn ba mɛhe gura la enŋa pa'alegɔ. 5Yenɛ n de Na'ayenɛ la, naam saazuo, yeregɛ en wo soŋɔ la. Se'em naam teŋparɛ wa, la sɛla woo n zo'ore ka poan, se'em n de vom nyɛgerɛ bo vɔpa woo teŋparɛ wa zuo la yeti, 6Mam de Na'ayenɛ. Mam loe ho te ho tare yelemɛŋɛrɛ na. N wan gorɛ hɔ la en nu'o, ge behera hɔ. Mam loe ho tom hɔ, te ho tare nɛɛhom na bo sɛba n dagɛ Israel buuri la, ge tare mam nɔbiŋere la na bo en nɛreba te ba tara potɛn'ɛrɛ mam poan. 7Hom n wan pegehɛ fɔɔhe nini. Hom n wan fan' sɛba n boe paka deo poan la sɛba n boe lika yoko poan bahɛ. 8Mam ma'an yu'urɛ n de Na'ayenɛ. N kan dekɛ n soŋa, la n pɛnka tɔnrɛ la baga, bii nɛresaala. 9Behɛ, sɛla woo eŋɛ mɛ wo mam yeti la eŋɛ se'em la. Nananawa, n wan le yele sɛla n wan eŋɛ pooren. 10Yele teŋparɛ wa zan'an te ba yoon yoonpaalɛ bo Na'ayenɛ. Sɛba n boe ko'kantɛ nɔɔrɛn, la sɛla woo n boe bo poan la ɔɔnrɔnɔ wa la teŋse'ehe n boe ko'om teŋasoka wa, yoon ya yoonpaalɛ pɛngɛ Na'ayenɛ. 11Bahɛ te pɔgɔtia, la teŋse'ehe woo n boe ka poan la vɔɔla, Bahɛ te Kedar buuri teŋhe la yɛɛna. Bahɛ te Sela teŋa nɛreba yoona la popeelom. Bahɛ te vɔɔla zɔya la zuto na la. 12Ba pɛngɛ Na'ayenɛ, ge mɔɔlɛ a pɛngɛ la ko'kantɛ nɔɔrɛn teŋhe la poan. 13Na'ayenɛ maahom yehe mɛ na wo pɛɛntɛɛnra sunsunya n nyie la, kaahɛ tagurega ge zabera la diŋdoma la. 14Mam din'inhe n suunre te la yuue mɛ. Nananawa, n wan kaahɛ, ge unhura wo pɔka n boe dɔgom poan la. 15N wan sagom zɔya, la sɛla woo n boe a zuto. N wan bahɛ te kolaahe, la bɔgɔhe ko'om keenhɛ. 16N wan tare fɔɔhe doohe sɔrɔtɔ seto te ba ka tabelɛ mina. N wan tare ba doohe zen'se'ehe te ba ka tabelɛ doohe. Lika, la bɔgɔrɔ ma'an n boe ba sore la poan, ge n wan bo ba nɛɛhom te ba da ge palehɛ bogoro la tu'una. Mam biŋere nɔse'ere la ba en bala. N kan zagahɛ ba. 17Vi kantɛ wan di sɛba woo n dele baga, yɛta ba te ba dela yenɛ la, te ba kan veehe na. 18Waŋa wa, wona. Fɔa wa, pekɛ nyɛta. 19Se'em ka boe fɔ, bii wam gana Na'ayenɛ mɛŋa yameŋa Israel wa te mam mɛŋa loe wa. 20A behere ge ka nyɛta, wona ge ka bɔkera. 21Na'ayenɛ nini tegɛ mɛ la a mɛŋa tontɔɔ vom la, te a bahɛ te a pa'alegɔ la kpe'em ge tara soŋa. 22Ge ba bɛnrɛ a nɛreba la mɛ, nyɔkɛ ba pagɛ yogoro poan te nɛra ka bɔna wan fan' ba bahɛ. Ba fan' ba sɛla woo mɛ ka bɔta te ba lebehe bo ba. 23Bene zuo te mam nɛreba wa kelom ka bɔta te ma'ɛn ba mɛhe ba kelehe mam? 24Na'ayenɛ bahɛ te ba fan' Yakob ge te ba zun' Israel. Se'ere n sɔe, ba tona la be'em ge ka nam a nɔɔrɛ bii dɔla a pa'alegɔ. 25A suunre nyie mɛ te a bahɛ te zaba taɛ teŋa la. Ge la bala zan'an, Israel kelom kan kelehe. Bugum la en pon kae ba bahɛ dita la yele pon kelom ka pakɛ ba.

will be added

X\