Isaiah 41

1Na'ayenɛ yeti, Teŋse'ehe woo n boe ko'om teŋasoka wa, ane ya baanlam ge kɛleha. Teŋhe wa, woo n boe wa, tare ya potɛn'ɛrɛ, ge vuruge lɛm na te to tɔgɛ ya yele la. 2Mam de tontɔɔdaana se'em n loe kpɛ'ɛma se'em ze'ele en dapɔya kena na wa? Ane n bo en paŋa? Ane n bahɛ en te a dɛna naba beha teŋhe sese'ehe la se nadoma. A so'a la a pɛɛnɛ bahɛ te ba lebege la puuhugo te sabeeo kanra ba ɛɛra. 3A ne digera ba mɛ, dɔla sose'a te a ka tabelɛ doohe ge ka pogolena a mɛŋa. 4Ane n bahere te yele ana eta? Ane n tan' yelese'a woo n ete wa? Mam Na'ayenɛ, mam n de pɔhega, ge wan bɔna ba'ahegɔ poan. 5Teŋse'ehe woo n boe ko'om nɔɔrɛn, la teŋse'ehe n zaan ha n nyɛ' mam eŋɛ se'em ge te ba lɛna mam na la, ba gbe'ere mɛ la dabeem. 6Bagakaanbereba pan'ahe taaba yeti, Da fabele se'ere. 7Te dɔkagereba, kuteba sɛba n saahere ge tara zaanre maalɛ la sɛba woo n tona toon aŋa taaba yɛta taaba yeti, to tone la toonkanra. Ge nya ne kpa' bagarɛ ze'ele te de da ta'an lu. 8Mam yameŋa Yakob wa, Mam loe n zɔ Abraham yaahe la. 9Mam tare ho ze'ele la teŋparɛ wa zanzaanrɛ na, tare hɔ wa'an kalam na, ge yele ho yeti, Ho dela mam yameŋa sɛka te mam mɛŋa loe. N kan tamɛ ho yele. 10Da zɔta dabeem. Mam boe mɛ la hɔ. Da gbe'era. Mam n de ho Yenɛ. N wan eŋɛ te ho kpe'em, n wan tara hɔ la n yelemɛŋɛrɛ paŋa ge bɔ'ɔra hɔ nyaŋerɛ. 11Nyanɛ wan di sɛba n yaɛ hɔ, te sɛba n zaberɛ la hɔ bahɛ yoo ho nɛŋan. 12Ho wan ta ɛɛra potɔpa la en zaberɛ la ho la, ge ho kan nyɛ ba, ba zɔ mɛlom mɛ. 13Mam de Na'ayenɛ ho Yenɛ la. N gorɛ la ho nu'o, da tara dabeem, n wan gura hɔ. 14Yakob buuri wa dela bem? Zunzunre la bii. Mam de Na'ayenɛ, Israel Fa'adaana la mam de ya soŋora n wan soŋɛ ya. 15Behɛ, mam eŋɛ hɔ te ho dɛna la tanduŋa kantɛ n tare zuto toyi'. Ho wan tɔ zɔya kanra la zobibihe bugulom te ba lebege sɔgɔrɔ. 16Ho wan yeele ba te sabeeo kantɛ wan vaɛ ba yeregɛ. Te yamam de'em, ge pɛngɛ Na'ayenɛ n de Israel Fa'adaana la. 17Taromdoma la han kan nyɛ ko'om nyu ge kiira la ko'nyuuro, mam Na'ayenɛ Israel Yenɛ wa wan soŋɛ ba. N kan tamɛ ba yele. 18N wan bahɛ te kolaahe ze'ele tanhɛ poan zɔta na. N wan bahɛ te paberɛ woo lebege bɛɛŋɔ. N wan bahɛ te teŋkɛ'ɛŋa la zan'an perɛ la bɔgɔhe. 19N wan sɛ' te mɔlɔsomɔ tiihe la zaaŋa la ta'aŋa la peelesomɔ tiihe la sabelesoma tiihe la tiihe se'ehe n ane soŋa yema yema pɔgɔtia poan. 20Nɛra woo wan nyɛ wana ge baŋɛ yeti, Mam Na'ayenɛ n de Israel Fa'adaana la nu'o n naam la zan'an. 21Mam de Na'ayenɛ, Yakob buuri naba la. Tare ya yele la na te to tɔgɛ. Tare yamam mi' se'ere la na. 22Baga wa, wa'an ya na yele to sɛla n kene na, te to mina, ge yele ya tɔ sɛla n pon tabelɛ eŋɛ, te to baŋɛ, ge mina la vɔnrɛ. 23Yele ya tɔ sɛla n yeti la eŋɛ, te to baŋɛ te ya dela yena. Tom ya toonsonɛ, bii toonbe'o, te la pakɛ tɔ, ge kɛn'ɛhɛ to dabeem. 24Baga ka tare vɔnrɛ, ya ka tare paŋɛ. Se'em n kaanbere ya ganlom mɛ. 25Mam Na'ayenɛ n loe naba zuɔ bɔba teŋhe la poan, a wan ze'ele dapɔya na na'ahɛ mam yu'urɛ. A nɛɛre nadoma mɛ wo tɔnɔ la, nɛɛre ba wo yagombaha en nɛɛre yɔgɔrɔ la. 26Bagarɛ boe wan ta'an yele sɛla n wan eŋɛ? Bagarɛ boe yelese'ere te la dɛna sera? Bagarɛ ka boe yele yele ana wa, bii pon nyaŋɛ ya'ɛ nɔɔrɛ. 27Mam n deŋɛ yia yele Yerusalem teŋadoma se'ere. Behɛ, bama bala. Mam dekɛ yelesone wa yele Zion. 28Bagarɛ ka boe bɔ'ɔra kan'aŋɔ, bii ba soke sɛla te de lerege. 29Ba dela zaŋa, ba kan ta'an eŋɛ sɛla, ba ka tare vɔnrɛ, sabeeo en yeen lɔbera tɔla nyane ba.

will be added

X\