Isaiah 40

1To Yenɛ la yeti, Kpemehe ya mam nɛreba wa. Bogolɛ ba suunre. 2Tɔgɛ la sunma'ahom bo Yerusalem teŋa wa, mɔɔlɛ yeti, Yerusalem, ho da'aberɛ saŋa la tole ya, ho namehegɔ saŋa la ba'ahɛ ya. Mam Na'ayenɛ mɛŋa n bahɛ te ho yɔ ho tuure la sugumnɔɔren boyi'. 3Nɛra n mɔɔle yeti, Maalɛ sore pɔgɔtia la poan bo Na'ayenɛ. Maalɛ sore pɔgɔtia la poan te de gan'an tontɔɔ bo to Yenɛ la. 4Bahɛ te boko woo palehɛ, te zoore la zobila woo sirige. Palehɛ bogorɔ woo, te zen'ɛrema lebe saalom. 5Ge te Na'ayenɛ soŋa la nɛɛ na, te nɛra woo nyɛ. Na'ayenɛ yele se'em n bala. 6Te nɛra konkore yele mam yeti, Voole paŋa! Te ayema soke yeti, N voole yeti bo? Yeti asaala woo dela mɔɔ, te ba soŋa dɛna puuro. 7Na'ayenɛ han tanhɛ, mɔɔ wan ku'e, te puuro me sɔe. Saaleba seren dela mɔɔ. 8Mɔɔ wan ku'e, te puuro sɔe, ge Na'ayenɛ yelehom boe la wuuha. 9Yelesonɛ n ze'ele Zion teŋa na. Zom zoore zuo mɔɔlɛ dɛ paŋa paŋa. Da zɔta dabeem, mɔɔlɛ yele Yuda teŋhe yeti, Ya Yenɛ n wana. 10Behɛ, Na'ayenɛ n de to Daana la mɛŋa n ye'ehe na te a behera la a paŋa. Behɛ, a tare enŋa zabɛ ge fan' sɛla woo la mɛ. A tare yɔɔrɛ te a wan yɔ a nɛreba mɛ. 11Wo ugura en behere a dunhe se'em la, a wan behera a nɛreba la la bala. A wan ɔnbera pebibihe la buga, ge pɛ'ɛra peyan'ahe la banla banla. 12Ane wan ta'an makɛ ko'kantɛ wa n zone se'em? Bii yeregɛ saŋgbanɛ wa la a mɛŋa nu'o? Ane wan ta'an makɛ teŋparɛ wa tentɔnɔ wa n zone se'em? Ane wan ta'an magahɛ zoore tebehom n zone se'em? 13Ane n tare sore te a pa'alɛ Na'ayenɛ Sea la. Ane wan ta'an kan'an Na'ayenɛ? 14Na'ayenɛ tabelɛ soke la ane te a pa'ale n yam bii sɛla n de tontɔɔ? Ane n bo Na'ayenɛ yam la bɔkerɛ? 15Behɛ, teŋkanra wa woo ane Na'ayenɛ nɛŋan mɛ wo ko'om fiin wa n ze'ele lɔkɔ poan tɔkɛ la. Se ane mɛ wo puuhugo en sige lɔgɔ magahegɔ poan ka tara vɔnrɛ se'em la. Behɛ Na'ayenɛ yaare teŋse'ehe woo n boe ko'om teŋasoka la wo bɛngerɔ la. 16Lebanon zɔya zuo nii la zan'an ka zo'e seke ba dekɛ kaanbɛ bo Na'ayenɛ. Bii ka poan tiihe la zan'an seke Na'ayenɛ kaanbegɔ lɔgɔrɔ la nyɔ'an. 17Teŋhe wa zan'an dagɛ sɛsɛla Na'ayenɛ nɛŋan. Se ka tare vɔnrɛ Na'ayenɛ nɛŋan. 18Ane n wɔne la Yenɛ? Ho wan dekɛ Yenɛ makɛ mɛ la bene? 19Bagarɛ wɔne mɛ la Yenɛ? Dagɛ kuta en kure en, dekɛ sanlema fiin wa paanrom en, dekɛ sanlenpeelega golɛ en. 20Bii naha n keŋɛ ta ba behɛ dɔɔseko n ka pɔn'ɔre ŋmaɛ, te se'em n tare dɔɔrɔ maala lɔgɔrɔ peehe ko, maalɛ bagarɛ te de zɛ'a ge ka luta la bii. 21Ho ka mi'? Ho ka wom? La ka nɛɛ peelomen te Na'ayenɛ n naam teŋparɛ wa? 22Yenɛ ma'an en behere teŋparɛ wa zan'an, tomam sɛba woo n boe ka poan wa ane wo sonwa'ara la. Enŋa n yeregɛ saŋgbanɛ wa wo mɔ pile la pile a bɔŋa zen'an la. 23Yenɛ ne yɛɛ nadoma na'am te ba ka le dɛna sɛsɛla. 24Ba ne ihegera mɛ na wo mɔpɔlɔgɔ n bule na zɔ'ɔra la. Te Yenɛ han tanhɛ ba, ba ne ku'e mɛ kalam te sabekantɛ vaara ba wo sɔgɔrɔ la. 25Fa'adaana la soke yeti, Ane n zone la mam? Se'em boe wan dekɛ a mɛŋa makɛ la mam? 26Behɛ saŋgbanɛ wa zuo, ane n maalɛ ŋmarebibihe la? Na'ayenɛ n mi' ŋmarebibihe wa woo yu'ura. Enŋa n kanregɛ la, ge me kpe'em gana zan'an la zuo, ŋmarebila kan malom bɔregɛ. 27Yamam Israeldoma wa yeti, Na'ayenɛ pon ka behera tɔ. Ban ete to sɛla woo, la ka daana en. 28Ya ka mi'? Ya ka wom? Na'ayenɛ n de Yenɛ n ka tare ba'ahegɔ la, enŋa n naam teŋparɛ wa. A ka bii a taregerɛ, a yam ka tare ba'ahegɔ. 29Na'ayenɛ n bo'ore sɛba n taregɛ paŋa. 30Bonbilipaalehe ne ta taregɛ mɛ gɛntarɛ ta lu. 31Ge sɛba n dekɛ ba mɛhe delom Na'ayenɛ nyɛte la paŋpaalega daarɛ woo. Ba wan kpe'em koreha wo tuguro n korehe saazuo se'em la. Ba wan kena, zɔta, ge kan malom taregɛ.

will be added

X\