Isaiah 38

1Saŋkana mea poan te ban'an nyɔkɛ Hezekia, te a gee la a ki te Amoz dayɔa Isaiah kɛn' a zen'an te yele en yeti, Na'ayenɛ la yeti ho ban'an la kan malom eŋɛ som. Ho yeti ho ki mɛ. Bala la, tom sɛla n nare ho tom. 2Te Hezekia ŋmɛregɛ a mɛŋa tɔ dangoone sohɛ Na'ayenɛ yeti, 3Na'ayenɛ, da tamɛ yeti mam dela se'em n tare sakerɛ sera bo ho. Mam kɔ'ɔn nana hom bala n suunre wa poan, ge tona la sɛla te hom bɔta ge pa'ale mam te n tom. En po'ohɛ wana ba'ahɛ la, a a nya daa kaahɛ supe. 4Te Na'ayenɛ tom Isaiah yeti, 5Yele Hezekia te, Na'ayenɛ ho sɔyaaba David Yenɛ yeti, Mam wom ho po'ohegɔ la, ge le nyɛ hom n kaahɛ la. N wan bahɛ te ho vɔna yuuma pia la anuu pa'ahɛ. 6N wan gu'ura hom, la ho teŋa la Asiria teŋa naba nu'uhen. 7N wan eŋɛ yele dena wa, te ho baŋɛ yeti mam n yele se'em la, denɛ mea n tone: 8Ho nyɛte naba Ahaz kura la te a mɛ ze'ele woko woko la, ho nyɛ wontɛɛŋa n ne sigera te kura la yilinyiliŋɔ vuruge lebe pooren na'ma kaanlegɔ pia. 9Hezekia ban'an la n ta bahɛ en la, sɛla te a golehɛ n wana: 10Mam tɛn'ɛhe te n wan ki me n yuum soma la poan, la n bɔna kum paka deo la poan ke'endoma teŋa la poan kɔ'ɔn yɛ'a la. 11Mam tɛn'ɛhe te mam pon kan le nyɛ Na'ayenɛ, Na'ayenɛ n bo sɛba n vɔe teŋa. N nini kan le nyɛ nɛresaaleba bii nɛresɛba n bɔe teŋa wa zuo wa. 12Mam vom daa ka le bɔna mam poan, bo daa dekɛ me wo duŋkeena n voen a sogorɛ keŋɛ ge bahɛ zan'an la se'em Ho daa tonhegɛ mam bahɛ me wo pɛ'ɛra n tonhegɛ guŋo pɛ'a nɔɔrɛn bahɛ se'em la. Ho daa wɔnte mam me bolika la yu'uŋɔ zan'an. 13Mam daa ne mina te ho wan nwonrɛ mam koba wo gbegenɛ sunsunya n nyie te a nwonta koba se'em la ge te beere nyaŋɛ yelegɛ. Bolika la yu'uŋɔ zan'an ho wɔnte mam la bala. 14Te mam kɛla ninbɔn'ɔn kaahega ma'an. Mam deŋere kaahe me wo dayene la. Te mam limihe n Daana te n nini ta mɔ'ɛ zan'an. La woŋɛ mam me te la ka tana eta. N belone ho me, wa'ana soŋɛ mam. 15Mam ka tare se'ere te mam wan yele te la dɛna lebehegɔ bo ho, la hom mɛŋa n dekɛ yele dena wa eŋɛ mam wa. Mam vom nya dila too ma'an, mam wan zugum la bala ta ki. 16N Daana, hom yetɔgom la ho tooma tare la vom kana na bɔ'ɔra nɛra woo, la mam mɛŋa. N belone ho mɛ bahɛ te n nyɛ iŋma'ahom, lan tara paŋa. 17Yele toore seto woo n paɛ mam na la dela la, la sɛla n nare te la eŋɛ n bala. Ge hom nɔŋerɛ la n fan' sagaŋɔ boko la poan bahɛ na, hom ka behe mam be'em la. 18Nɛresɛba woo n boe ke'endoma teŋa la poan la, nɛra ka boe boko la poan tara potɛn'ɛrɛ te hom wan pa'ale en ho sake sera n ane se'em la ba. 19Vɔpa ma'an n wan ta'an pɛngɛ hom wo mam n ete se'em zina wa. Zamaaŋa wo yeti hom sakerɛ sera la n ane se'em me bɔ'ɔra zamaaŋsɛka n tagalɛ la. 20Hom, Na'ayenɛ mea n wan fan' mam bahɛ, ge te han vɔna, daarɛ woo te wan yoona yooma la kɔlɔ Yenɛ yire la poan. 21Te Isaiah nya yele Hezekia tontoneba la yeti, Ba tɔ kenkama la ba dekɛ ma naba la nɔra la ge a wan nyɛ a tebegɔ. 22Te Hezekia le soke yelese'ere n wan pa'ale te a wan ta'an le kɛn' Yenɛ yire la poan le po'ohɛ.

will be added

X\