Isaiah 37

1Naba Hezekia n daa ta wom sɔnhega la ba'ahɛ la, a aanhom la a futo la te a yɛ la, ge dekɛ sunsagaŋɔ futo ye', kɛn' Na'ayenɛ Yire la poan. 2A nya tom a yire kpɛ'ɛma Eliakim la a gɔŋgoloha Sebna la malema kpɛ'ɛndoma Amoz dayɔa Isaiah zen'an. Te ba zan'an yɛ sunsagaŋɔ futo keŋɛ. 3Te ba paɛ yele Isaiah yeti, Naba Hezekia n yele se'em n wana. Dabaherɛ ana wa dela dabaherɛ tooro la nyanɛ dabeha bo to. Te teŋa la ane me woo pɔka n virige ge taregɛ kan ta'an unhe te bia la yehe na la. 4Sohɛ Na'ayenɛ ho Yenɛ bo tomam sɛba n vɔ wa. Ho daana Asiria teŋa naba tom Arabsake te a wa'ana to' Yenɛ Vɔa la. Enŋa n toorɛ ne la, Na'ayenɛ ya Yenɛ wom ya, bala ho han po'ohɛ, daanse'ere Na'ayenɛ wan eŋɛ sɛla. 5Yamehe wa n paɛ Isaiah zen'an na la, 6Isaiah yele ba yeti, Na'ayenɛ n tare yelese'ere te a yele Hezekia n wana: Mam n de Na'ayenɛ la yeti, Da fabela la toorɛ la te Asiria naba tom a yamehe la te ba wa'ana to' la. 7N wan bahɛ te a wom yelese'a n ete a teŋa la poan la te suunre nyie. A wan lebe kule a teŋa la poan te n bahɛ te a ki kum yoo. 8Ge bala ma'an Arabsake la wom ya te Asiria teŋa naba la bahɛ Lakis teŋa la me ge nya keŋɛ ta zabera la Libna teŋa. Te a me kɔ'ɔn kɔ doohe teŋa la poan. 9Saŋkaŋa mea poan te Asiria teŋa naba la me wom te Kus teŋa naba Tirhaka me boe la sore zuo yɛ'a na te a zabɛ la en. Bilam te Asiria teŋa naba tom nɛreba la gɔŋɔ te a golehɛ ko poan bɔ'ɔra Hezekia te, 10Da dekɛ ho mɛŋa delom yenɛ, bii ho tɛn'ɛha te a wan fan' Yerusalem teŋa mam mu'uhan. 11Ho mɛŋa la wom tomam Asiria teŋa nadoma n ko' piihe teŋhe sese'ehe se'em. Bane n ton bahɛ te hom kɔ'ɔn dɛla fai wa? 12Hom ka mi' te mam sɔyaabdoma sɛba n yuum de Asiria teŋa nadoma n yuum sagom Gozan la Haran la Arezep la sɛba woo n yuum ze'ele Eden teŋa poan ta kɛn'ɛra Tel Asar teŋa poan la? Ba yena la yuum ta'an eŋɛ la bane bo ba? 13Hamat la Arpad la Separvaim la Hena, la Iva teŋhe nadoma zan'an mɛlom mɛ tomam zuo. 14Hezekia n kaanlɛ Asiria teŋa naba gɔŋɔ la ba'ahɛ la, a tare kɔ kɛn' la Na'ayenɛ yire la poan ta yeregɛ gɔgɔ la giŋe te Na'ayenɛ nyɛ. 15Ge nya po'oha Na'ayenɛ nɛŋa yeti, 16Pɛɛntɛɛnreba Na'ayenɛ, hom n de Israel Yenɛ, sɛla n tare kelompagehedoma n ziire hom na'am koka la. Hom ma'an dela Yenɛ. Hom n maalɛ saazuo la teŋa, hom ma'an me n behere sɔ'ɔlom sebo woo n boe teŋa wa zuo. 17Na'ayenɛ, wom ya ge kelehe. Na'ayenɛ, behɛ n an se'em. Yeem behɛ Senakerib n to hom Na'ayenɛ Vɔa wa se'em wa. 18Na'ayenɛ, la dela sera te Asiria teŋa nadoma bahɛ te teŋkanra lebege daboto. 19Ba lobe ba yena bugum poan ge sagom ba. Se'ere n sɔe la ba dagɛ yena, ge ba dela dɔɔrɔ la kuga ma'an te nɛresɛba maalɛ ba. 20Ge Na'ayenɛ, hom n de tomam Yenɛ. Tomam sohore la hom te ho fan' tɔ tɔ Asiria naba wa nu'uhen bahɛ. Te nɛra woo n boe teŋa wa zuo zen'sɛka woe poan wan baŋɛ te hom Na'ayenɛ ma'an n de Yenɛ. 21Te Amoz dayɔa Isaiah tom sɔɔleŋa bo Hezekia yeti, Na'ayenɛ, Israel Yenɛ la n yele se'em n wana: Hom dekɛ Asiria naba Senakerib n daane ho se'em po'ohɛ bo mam la, 22Na'ayenɛ n tɔgɛ yetɔgom sebo bahɛ a zuo n wana. Yerusalem teŋa nɛreba yaɛ ho me. Ba dekɛ ho lebege la ba bonkɛhela, te ho kena te ba la'ara hɔ. 23Ane n hon sagom yu'urɛ? Ane n hon toora se'em? Hom tanhera mam ge ŋmɛ'ɛra nyɔn'ɔn. Se'emdaana n de Israel Fa'adaana la. 24Ho bahɛ te ho kpɛ'ɛndoma n wa'ana to' mam se'em n de to Daana la. Ge te ho mɛŋa nya ŋmɛ ho nyɔn'ɔn yeti hom mɛŋa n ne bɔna nɛŋa tare ho pɛɛntɛɛnreba keŋɛ zan'an n ka kalene Lebanon zɔya la zuo ha, yeti hom ta ŋmata mɔlɔsomɔ tiihe la peelesomɔ tiihe se'ehe te ho bɔta. 25Mam mɛŋa n bahɛ te Mizraim kolega woo ku'e, ge te n nyuura ko'om bulehe se'ehe te mam mɛŋa tun' la poan. 26Ya kɛleha mam se'em n de Daana la. Mam maahom yele ana wa me te yuuma ka yɔe na. Te hom pon ka mina te mam wa ma'an n bo fole te hom eŋɛ yele ana wa. Mam n bo ho paŋa te ho nyaŋɛ sagom teŋkanra. 27Mam n ne bahɛ te ba nɛreba la giinla kɔ'ɔhɛ, te ba tulum. Ba daa ne ana me wo tia sɛka puuro n ane soŋa n keŋɛ ta yehe samanɛ poan la, bii mɔ sonɔ n fuke gɔhɔgɔ zuo la, bii ki bula n ne nan bule va'am poan yehe na nan ana se'em la. 28Mam mi' ho zan'an me, mam mi' ho sunsunya n nyie la mam ta paɛ zan'an beene me. 29Mam nyɛ ho pa'ale mea la n zone se'em, la yaarɛ sɛka taaba te ho yaɛ mam la. N wan dekɛ baŋa tuhe ho nyonrɛ poan, ge dekɛ gariŋenɛ lɛ' ho, la n tare ho lebe hom n ze'ele zan'an na la. 30Hezekia, n wan yele ho sɛla n yeti la eŋɛ. Yuune dena wa poan, di yɛɛhe wan yehe samana zuto te ho kɛ'ɛra dita, yuunse'ere n tagalɛ la, dia sese'ehe me wan bule zen' se'ehe poan te di yɛɛhe la yuum bule yehe na la poan te ya lɛ bama me di. Yuuma atan' la poan, te ya mɛhe nya wa kɔ vatɔ, borɛ dia te ka maalɛ te ya nya dita ya samana zuo dia. 31Sɛba n wan vo'e Yuda teŋa poan wan ana tia nyɛga n soge teŋa teŋa ha, te ka ta'an wɔna dia soŋa se'em la. 32Mam, Pɛɛntɛɛnreba Na'ayenɛ la, wan bahɛ te Yerusalem doma basɛba vo'e. N wa bahɛ te Zion Zoore nɛreba basɛba n bɔna. 33Mam n yeti se'em biŋera dela, Asiria teŋa naba la kan ta'an kɛn' Yerusalem teŋa poan na bii a ve'e tanhɔ tɛn, bii a bahɛ te a pɛɛntɛɛnreba kae ka mum nya gan'an gura te ba zabɛ la Yerusalem teŋa wa. 34N yeti te Asiria teŋa naba la wan lebe dekɛ la sɔrɔɔ seko to te a doohe wa'ana le lebe. A kan ta'an kɛn' Yerusalem teŋa poan. Pɛɛntɛɛnreba Na'ayenɛ n yele se'ere. 35N wan gu' teŋa la n yu'urɛ na'ahegɔ zuo, la nɔbiŋere se'ere te mam biŋe la mam tontona David la zuo. 36Te Na'ayenɛ tom a soŋora te a keŋɛ Asiria teŋa pɛɛntɛɛnreba la n tiihom bɔna zan'an la ta ko ba nɛre tuhure kɔbega la pihinii la banuu. Beere n ta yiligɛ la, te ba tiiheŋɔ zan'an la kɔ'ɔn perɛ me la kum ma'an. 37Lan eŋɛ bala ba'ahɛ la, te naba Senakerib lebe kule keŋɛ Nineveh teŋa ta kɛn'ɛra bilam. 38Te daarɛ deyema te a nya bɔna a bagarɛ se'ere yu'urɛ n de Nisrok, a dayɔɔhe Adramelek la Sarezer kan na ko' en la ba so'ahe. Ge ba zɔ keŋɛ Ararat teŋa poan ge te a dayɔa Esarhadon tee dɛna naba.

will be added

X\