Isaiah 36

1Naba Hezekia yuum pia la anaahe poan, Asiria naba Senakerib ihege zabɛ Yuda teŋse'ehe woo te ba mɛ dangɔɔma kae se la woo ge nyaŋɛ fan' ba zan'an. 2Bala te Asiria naba la bo Arabsake te a bahɛ Lakis teŋa la, ge la a dekɛ pɛɛntɛɛnreba kekeko te ba keŋɛ Yerusalem teŋa. Bala te kpɛ'ɛma la seren ze'elege Lakis teŋa poan yehe keŋɛ ta paɛ ze'ele futo wogora la deo la, bɔka sɛka n ze'ele Yerusalem teŋa la zuin ha zɔta na, 3te Yerusalem naba kpɛ'ɛndoma batan' ze'ele Yerusalem teŋa poan yele na te ba to'ohɛ en. Ba dela Hilkia dayɔa Eliakim se'em n daa de kpe'eŋkantɛ ayema, te ayema me dɛna Sebna se'em dena Asap dayɔa Yoa se'em me n de kpɛ'ɛn sɛka me n biŋere Yerusalem teŋa yɛla gɔnɔ. 4Te Arabsake yele ba yeti, Yele Hezekia te Asiria teŋa naba la n gane zan'an yeti, bene n sɔe te ho kɔ'ɔn ba' nam ho mɛŋa wana wa? 5Ho yeti ho wan nyaŋɛ maahom zabɛ zaberɛ nyaŋɛ la yetɔgom ma'an ge te sɛla ka paahɛ bini? Ane n boe wan ta'an soŋɛ hɔ? 6Behɛ, ho dekɛ ho mɛŋa delom la Mizraim teŋa naba wa. Bala ana me wo a dekɛ la a mɛŋa delom la dibe kɛ'ɛŋa, ka wan kɔ saregɛ a nu'o. Faro Mizraim teŋa naba ana wo bala la. 7Ge ho han yele mam te hom delom ya Na'ayenɛ to Yenɛ, dagɛ enŋa mɛŋa te Hezekia n daa gbirige kaanbegɔ zen'enhe la woo la po'ohegɔ zen'enhe la woo ge yele Yuda la Yerusalem teŋa nɛreba te ba kena zen'yeŋa po'oha la? 8Wa'an ya eŋɛ ya nɔɔrɛ la mam daana Asiria naba, mam wan bo ya yiri tuha ayi' la a behɛ nya ya han wan nyaŋɛ tara pɛɛntɛɛnreba n zo'e wan ta'an ban' yiri la. 9Hom n dekɛ ho mɛŋa delom Mizraim teŋa te ba bo ho zaba toroto la pɛɛntɛɛnreba wa, hom yeti ho eŋɛ la wane zabɛ nyaŋɛ tomam mam daana wa pɛɛntɛɛnra sɛka n pon ka tara paŋa tomam nɛŋan? 10Mam wa'ana zabɛ sagom teŋkana la han dagana Na'ayenɛ tom mam mɛ? Da tamɛ te la dela Na'ayenɛ mea la n tom mam te n wa'ana la n sagom ya teŋa wa. 11Te Eliakim la Sebna la Yoa lebehe yele Arabsake yeti, Gaafara ya, tomam ka bote to to nɛreba la vɛ dangoone wa poan wona hom n tɔgɔre se'em la, bala, tɔgɛ Aramaik yetɔgom poan bo to ge bahɛ Hebru yetɔgom la. 12Te Arabsake lebehe yele ba yeti, Mam daana tom mam te n wa'ana tɔgɛ bo la nɛra woo ge dagɛ ya daana la la yamam ma'an. Nɛresɛba woo n boe ya teŋa wa poan wan, la kan yue la ba wan gan'ara ba mɛhe bino, ge nyuura ba mɛhe dundu'urom. Bala mea te yamam sɛba n ze' ka'lam ya ba tan wan wan ta eŋɛ. 13Ge Arabsake nya ze'ele zɛnkɛ a konkore nyabera Hebru yetɔgom poan yɛta te, Kelehe ya Asiria teŋa nakantɛ yele n wana. 14Naba la yele yeti, da bahɛ ya te Hezekia pan'ahe ya, A kan ta'an fan' ya bahɛ. 15Da bahɛ te Hekekia yele ya te ya nam Na'ayenɛ te ne yele yeti, Na'ayenɛ wan seren fan' ya bahɛ. Teŋkana la kan lu' bo Asiria naba nu'uhen. 16Bahɛ ya Hezekia kelehego bala. Kelehe ya Asiria teŋa naba la. Dekɛ ya mɛhe bo en. Te a bahɛ te ya mɛhe sɔna ya vatɔ behera, ge sɔna ya tan'ahe pin'ihera, ge sɔna ya bulehe angera ya ko'om. 17Nyu' dabeha ayi' ge te a nya wa'ana vaɛ ya keŋa teŋsɛka n ane wo ya zeŋa wa poan ta bahɛ ya bilam ha. La dela teŋa te ya bɔna bilam bota ya tiihe, ge kɔɔra ya dia dita. 18Hezekia yeti ya yeti, Na'ayenɛ wan fan' ya bahɛ. Ge mam yeti ya da bahɛ te a pan'ahɛ ya. Yena boe teŋsɛka poan nyaŋɛ gu' teŋa la Asiria naba nu'uhen? 19Hamat, la Arpad, Separvaim teŋa yena la? Samaria teŋa baga la daa nyaŋɛ fan' ba teŋa la Asiria teŋa pɛɛntɛɛnreba la nu'uhen? 20Yenɛ ana wa woo daa ka nyaŋɛ fan' ba nɛreba la Asiria teŋa naba nu'uhen bahɛ. Yamam tɛn'ɛhe te Na'ayenɛ la wan nyana yenɛ aŋa me bii? 21Ge en tɔgɛ bala ba'ahɛ la, kpɛ'ɛndoma la woo sini me digi digi. Se'ere n sɔe la, naba la daa yele ba yeti, da ta lebehe ya se'ere. 22Bala te naba yire zuodaana Eliakim n de Hilkia dayɔa, la gɔŋgoloha Sebna, la Asap dayɔa Yoa n goleha yɛla biŋera aanhom ba futo la ninbɔn'ɔn keŋɛ lebe Hezekia ta yele en, Arabsake la n yele ba se'em la woo.

will be added

X\