Isaiah 34

1Nɛreba woo n boe teŋsɛka woo poan teŋa wa zuo, la sɛla woo n de bonvɔa bɔna teŋa wa zuo, wa'an ya na, la ya kelehe. 2Na'ayenɛ suunre n nyiin la teŋhe la ba pɛɛntɛɛnreba wa zan'an. A wan sagom ba woo. A maahom ba biŋe me te ba kɔrom ba. 3Ba iinhe la wan gan'an woo pon'ɛn ku'e tabɛ teŋa. Ba ziim wan ze'ele zɔya zuto zɔta sigera na. 4Ŋmarebila la kayena te me kan yee saŋgbanɛ wa zuo. Saŋgbanɛ la mɛŋa wan kilom de muŋa wo soŋɔ la mɛlom. Sɛla woo n boe saŋgbanɛ la zuo wan ku'e sɔe wo vɔntɔ n ku'e tia zuo zogora se'em na la. 5Na'ayenɛ so'a la nyu' n bote se'em saŋgbana la zuo na. Behɛ, a sige gankerɛ Edom teŋa, nɛresɛba n sagom la. 6Na'ayenɛ so'a la n bo la ziim la kaam. La dela piihe la boohe ziim la dunhe kaam la nɛnɔ sɛyiga kaam. Se'ere n sɔe la Na'ayenɛ la wan kɔrom nɛreba zo'e la kaanbɛ Bozra teŋa la poan, la Edom bɔbɔrɛ woo. 7Edom nɛŋadoma la dela yeonii. Ba dela lɔlehe n seke, ge la ba bala zan'an, ba wan lagom ki la basɛba la. Ziim ma'an n yeti bo buhege Edom teŋa, ge te nɛreba kaam dɛna bugulugo bo teŋa la. 8Na'ayenɛ mɛŋa n loe yuune la dabaherɛ se'ere te a wan lebehe yɔ, ge gu'ura Zion la. 9Edom kolehe la wan lebege sin'iro, ge te a tentɔnɔ la lebege yaarom. Te teŋa la zan'an nya taɛ bugum dita. 10Bugum la wan dita bala bolika la yu'uŋɔ, te zun'uhe la kan malom bahɛ gulugere Edom teŋa wan lebege pɔgɔtia, beere yelegere woo. Nɛnɛra kan malom doohe sateŋkana wa poan tole. 11Viinɔ la yeodunhe la selehe n wan sɔe kɛn'ɛra bini. Na'ayenɛ wan bahɛ Edom te ka lebege daboo, ka wan lebege taŋkorehe ma'an gan'an. 12Ba wan yi'ira Edom teŋa yeti, Ka zuodoma kan tare sɛsɛla te ba yi'ira sɔ'ɔlom la. Ka nadoma me wan mɛlom mɛ. 13Gɔn'ɔhe n wan perɛ naba yire la, la zaba yiya la poan. Sanhe, la dulo ma'an n wan sɔe kɛn'ɛra bini. 14Ge te mɔɔ poan sakɔɔhe, tuguro n sɔe ɛɛra la taaba bini. Bonbɛ'ɛhe wan tɔgɔra bɔ'ɔra taaba bini ge te yu'uŋɔ bonɛngela gan'an daboto la poan. 15Teŋa la poan wan ana gbarete, te viinɔ tɛ'ɛra ba tuguro bini wɛkera ba kɔma, ge te ziiro me perɛ mɛn'an ɛɛra kaara. 16Yenɛ gɔŋɔ la poan, ho ta'an ɛ nyɛ yele ana wan golehɛ bɔna zen'an. Na'ayenɛ dekɛ la a Sea paŋa la kan'ahɛ sɛla woo te a maalɛ la lagom taaba na. Zogɔ la ayena me ka bɔregɛ. 17Na'ayenɛ maahom sɛla woo bɔŋa zen'an la. A dekɛ a nu'o tɔnrɛ ayena ayena. Sɛla woo wan bɔna ba zen'enhe la bala ka malom tara ba'ahegɔ.

will be added

X\