Isaiah 33

1Yele boe hom se'emdaana n sagom mam nɛreba la. Ho ka tabelɛ nyɛ sagaŋɔ. Ge nananawa, sagaŋɔ wan paɛ hɔ. Yele bo hom koohe nɛreba. Ba ka tabelɛ dekɛ ho koohe. Ho han go' sagaŋɔ, ho wan nyɛ sagaŋɔ. Ho han go' koohe nɛreba, ba wan koohe hɔ. 2Na'ayenɛ, zɔ' to ninbɔn'ɔn, tomam dele la hom. Bɔ'ɔra to paŋa bolika woo, ge dɛna to faanra to daaŋɔ saŋa. 3Ho han ne tanhɛ ge pa'alɛ ho paŋa, nɛre woo peɛn. Ho han ihegɛ, teŋhe ne yerom me. 4Tomam ne gilige te diŋdoma me wo sim la, faanra lɔgɔseko woo n de ba bonɔ. 5Na'ayenɛ gane sɛla woo, te a boe la saazuo ha. Enŋa n de se'em n bahɛ te yelemɛŋɛrɛ la narehom bɔna Zion teŋa wa poan. 6Enŋa wan de ho ɛnberɛ te ho yaga zina wa. Enŋa n de to faanra daarɛ woo bɔ'ɔra to yam la bɔkerɛ. A dekɛ bana la woo bo nɛreba n zote la en. 7Kelehe, ba boraahe sɛba n kpe'em la n bala zɔta dɔla sɔya zuo kaaha ɛɛra se'em n wan soŋɛ ba wa. Nɛresɛba la tɛn'ɛhe ne te ba wan nyɛ ne la iŋma'ahom, ge ban bala zɔ lebe na la nintam la. 8Nɛra ka le zɛnkera na'arɛ yɛhɛra zen'an. Sɔrɔtɔ la woo gan me te nɛra ka nɛɛra to poan. Nɔse'a woo te to eŋɛ la nɛreba la woo la kɔ' ya, ge te se'em woo n dole n biŋe nɔɔrɛ se'em la ka tare vɔnrɛ. Ba ka bo narehom bo nɛnɛra. 9Samana kɔ'e me te sɛla ka bɔna a zuto Lebanon zoore la pelege me gan'an la nyanɛ, ge te Saron bɔn'man'aha la lebege pɔgɔtia teŋa gan'an, ge Basan la Karmel goto la ku'e te vɔntɔ sɔe zan'an. 10Ge Na'ayenɛ la yeti ya, Nananawa, n wan eŋɛ sɛla, te pɛnka kantɛ paɛ n yu'urɛ la. 11Ya tooma la dela sɔgɔrɔ te bugum wan di. 12Ya wan di kanbɛ lebege tampegelom wo gɔn'ɔhe n boe bugum poan ne di kanbɛ se'em la. 13Nɛra woo n boe zen'an, wa'ana la ba behɛ mam n eŋɛ se'em. Wa'an ya na la ya nyɛ mam paŋa wa n ane se'em. 14Dabeem n kɛn' potoyelebe'eteba la n boe Zion yeti. Te wan eŋɛ la wane vɔna zen'sɛka poan te bugum dita ka malom kiŋira wa. 15Ge yɔɔrɛ wan bɔna bo sɛba n vɔe soŋa ge yɛta yelemɛŋɛrɛ la. Yɔɔrɛ boe bo sɛba n daa ka faanre nɛreba ligiri, bii ka sakera tɔ'ɔha beloŋo bo'olom la. Yɔɔrɛ boe bo sɛba n ka bote fɛn'ɛha la. 16Bamadoma wan bɔna la paŋa yiya se'a te ba mɛ a tanhe n wɔgɛ zuo ha. Ba wan kɛn'ɛra la bilam ge nyɛta dia la ko'om ban bote se'em. 17Ya nini wan nyɛ naba la soŋa la. Ya wan nyɛ a sɔ'ɔlom la n yalegɛ se'em. 18Bilam te ya wan soke ya mɛhe yeti, Panhedoma sɛba n daa ne pɛnregɛ to te to yɔɔra lampookanra la bɔ'ɔra ba la bɛɛ? 19Ya kan le malom nyɛ pa'ale n mea nɛresɛba n daa tɔgɔra yetɔgom sebo n boe botɔka te ya ka bɔkera bo la le yɛ'ɛha. 20Behere ya Zion teŋa ta te to dita te de'enɔ la. Bala ma'an la ya wan nyɛ te Yerusalem teŋa boe fai, ge zɛ'a kaŋe wo sogorɛ te ba ta'an de dɛ kpa'ahe kpa'ahe verɛ te se kan ta'an vɔɔɛ, ge nya dekɛ mim kpe'em lo sogorɛ la ta' kpa'ahe la te de zɛ'a se'em. 21Bilam Na'ayenɛ wan de'a tomam Paŋadaana. Mɔgɔ kanra, la kolaa kanra wan gan la tɔ, te diŋdoma ɔɔnrɔnɔ kanra ka bɔna bini. 22Na'ayenɛ la n de tomam gankera, ge dekɛ a nɔze'elego bo tomam. Na'ayenɛ n de tomam naba, ge wan fan' tomam. 23Ge hom teŋa wa ane me wo ɔɔnrɔŋɔ kantɛ te ba ka lo' ko tanɛ soŋa la, sagom kantɛ ma'an n wan wa'an ko zuo na. Wɔbehe wan fan' sɛla woo te ya bɔta ya diŋdoma zen'an. 24Na'ayenɛ wan bahɛ ya be'em bo ya, te nɛra kan bɔna Zion poan yeti a bɛn'ɛnre mɛ.

will be added

X\