Isaiah 30

1Na'ayenɛ yeti, Yele boe tobekperega kɔma zuo. Ya ne maahom la yele tom dɛ ge te de dagana mam potɛn'ɛrɛ, naara nɔɔrɛ, te la dagana mam Sea n bote se'em la, tara be'em malom pa'aha be'em poan. 2Ba sigere la Mizraim teŋa te ba ta sogɛ Mizraim teŋa naba Faro som la poan, ge ɛ soka zen'an Mizraim sɔ'ɔlom la poan. Ge ka sɔkera mam behera. 3Bala, Naba Faro som la zen'an wan diihe ya nyanɛ. Ya soka zen'an Mizraim sɔ'ɔlom poan la wan dɛna ya namehegɔ zen'an. 4Ba nabiihe pon paɛ Zoan me na. Ba kpɛ'ɛndoma pon tole Hanes mɛ. 5Ge nyanɛ wan di ya zan'an la ban dekɛ yan mɛhe delom nɛresɛba n ka tare yɔɔrɔ, nɛresɛba n ka tare yɔɔrɔ bii soŋorɛ, ge ba dela nɛresɛba n di nyanɛ la toorɛ. 6Negev mɔen bonsɛla la yele n wana. Da'areba degehe ba tarega la ziire bonhe paalehe zuo dɔla ka poan tɔla ge pagelɛ la yogoma pɔya zuto ziira yɛ'a teŋsɛka nɛreba n kan tara yɔɔrɔ bo ba zen'an. Ba bo la ninbɔn'ɔn la sunkpɛnlega teŋa la, teŋsɛka te gbegenyan'ahe la gbegendɔɔrɔ bɔna, te zaŋkanhe la kanpɛɛnhe bɔna. 7Mizraim teŋa la soŋorɛ dela yoo, la dela zaŋa. Bala zuo te mam yi'ira Mizraim teŋa Arahab, teŋsɛka te ba ŋmaɛ bahɛ. 8Nananawa, keŋɛ ta ze'ele ba nɛŋan golehɛ a yele wa. Ta golehɛ yele wa eŋɛ gɔŋɔ poan biŋe te de ta dɛna seradaana daanse'ere ha. 9Nɛrebana wa dela tobekperegadoma. Ba dela kɔma n de ponpɔrɔŋdoma. Ba dela kɔma n zagahɛ te ba kan kelehe Na'ayenɛ pa'alegɔ. 10Ba yeti se'em n behere la yeti, Da le beha. Ge yele nɔtɔgɔheba yeti, Da tɔgɔre ya yelemɛŋɛrɛ bɔ'ɔra tɔ. Yeti ya tɔ sɛla te to bɔta te to wona. Yeti ya tɔ sɛla n de ponpɔrɔŋɔ. 11Bɔregɛ ya yehe sore la poan. Yehe ya mɛhe sore la poan. Da le bahɛ ya te to wona Israel Fa'adaana wa yele. 12Israel Fa'adaana n tare lebehegɔ seko n wana: Ya ka zagahɛ mam yelehom la me ge dekɛ ya mɛhe delom gbirigere, la ponpɔrɔŋɔ wa? 13Be'em bona wa ane me wo muluŋa n bahɛ te dangoonwoko luta kalom se'em la. 14Ponpɔrɔŋɔ kona wa taaba wɔnte ya la bura bura wo yɔgɔrɔ laa n lu wɔnrɛ se'em te sayɛɛŋa kan gee wan ta'an dekɛ mɔkɛ bugum bii kaanbegɛ ko'om la. 15Daana Na'ayenɛ la n de Israel Fa'adaana la yele yamam yeti, Ya han ŋmɛregɛ lebe mam zen'an na, ge sigehe ya mɛhe ana baanlam n wan fan' ya. Ya han seren dekɛ la ya mɛhe delom mam baanlam, n bahɛ te ya kpe'em Te ya kperɛ toba. 16Ya yeti, Aai, to wa peɛn yiri zuo. Bala la, ya wan peɛn. Ya yeti yamam wan dekɛ yiri se'a n korehe zɔ fan' ya mɛhe bahɛ. Sɛba n digere ya la korehe gana ya. 17Ba han pon dɛna banuu, bii ba dɛna nɛra yene ba wan dige yamam nɛre tuhure. Bala han eŋɛ, yamam fiin wa n yeti ya peɛn ya nya wan zɛ'a yɛɛ wo yire n sa'ɛ zan'an ge te bɔ'ɔ zenrɛ yee zɛ'a se'em la. 18Na'ayenɛ ane la baanlam ge gura te a pa'alɛ te enŋa n tare som la ninbɔn'ɔn bɔ'ɔra yamam. Na'ayenɛ n de Yenɛ la dela tontɔɔ. A kan'are la som baha sɛba n dekɛ ba mɛhe delom en la zuo. 19Yerusalem teŋa nɛreba wa, da kele ya. A eŋɛ som bo nɛreba. A han wom yan kaahe bɔta soŋorɛ wa a wan kelehe. 20To Daana la mɛŋa n dekɛ daaŋɔ, la ninbɔn'ɔn bo ya te la dɛna ya dia la ko'om. Ge la kan yue te ya wan le nyɛ ya pa'aleba la ya gura. 21Ya ŋmɛregere yɛ'a la zuɔ bii gɔbega wo, ya wan wom te konkore yɛta yeti, Sore n wana, nya dole ya dɛ. 22Bilam te ya nya wan sagom ya baga la te ya dekɛ sanlema la sanlenpeelega takɛ a la bahɛ. Ya wan va ba lobe bahɛ wo tanzana n de ba la, ge yele ba yeti, Keŋɛ ya ha! 23A wan bahɛ te saa ni bahɛ ya borega zuo, te ya samana maalɛ dia te la gaŋɛ yan bote ne se'em la, ge te yaama gan'an zen'an woo te ya nii la ya boohe wan ɔbera. 24Ya wan tara di soŋa bɔ'ɔra nii, la bonhe se'ehe te ya dekɛ kɔ ya samana la te ba me dita tegera. 25Dabeha ba han kɔrom nɛreba ge yire woko n lu bahɛ, ko'om wan ze'ele zɔya la zowogoro zuo tanhɛ zɔta na. 26Na'ayenɛ mɛŋa wan din'inhe a nɛreba nɔra la pogoleŋɔ seko te a mɛŋa dekɛ pɔgɔlom ba la. Ŋmarega wan nɛɛ yu'uŋɔ wo wontɛɛŋa n ne nɛɛ se'em la, ge te wontɛɛŋa nɛɛhom la me wan nɛɛ gana ka ne pon nɛɛra se'em la sugumnɔɔren boyopɔe. Nɛɛhom la wan ana wo dabeha ayopɔe nɛɛhom n dekɛ ta' bo daanyenɛ la. 27Na'ayenɛ ze'ele la zen'an n zaan kena na la sunsunyiim saŋgbanɛ sɔbelegɔ poan. A suunre n nyii, te a yetɔgom dite sagona me wo bugum n dite sagona se'em la. 28A vo'ohe la ko'om bahɛ na te bo libera nɛreba. A gbite teŋhe la mɛ sagom na se. Ge dekɛ gariŋenɛ lɛ saana won nɔɔrɛn ve'e ba ta bahɛ lika poan. 29Na'ayenɛ nɛreba la wan yoona popeelom yooma wo ya ne dɛ'ɛna de'eŋɔ ge yoona popeelom yooma yu'uŋɔ se'em la. Ya wan tara popeelom ge yoona ge pɛɛbera yiihe zɔna Na'ayenɛ zoore la zuo, Israel Taŋa la zen'an. 30Na'ayenɛ wan bahɛ te ba wom enŋa n tɔgɔre la kpe'eŋo se'em ba wan nyɛ en zɛnkɛ a nu'o la maahenɛ te a damɛ se'em. A sunsunyiim la wan di sagom wo bugum n dite bii saakuga luta na sagona. 31Asiriadoma la han wom Na'ayenɛ konkore, ge nyɛ enŋa n tare a kuto doore la ŋmɛ'ɛra se'em la, dabeem wan kɛn' ba. 32Na'ayenɛ wan zabɛ la ba pɛɛn bɔn'ɔn poan, te saŋa woo te a wan zabɛ la ba la a wan ko ba zo'e zo'e te la dɛna yoonɛ bo senyagahe la kɔnlɔ ŋmɛ'ɛreba. 33Pin'an zen'an pon bona mɛ maahom gura naba la. Ka nyɔ'an zen'an la sige me ge yalegɛ, te dɔɔrɔ wuge zom saazuo, Na'ayenɛ vo'ohom n ane wo bugum kolaa la bugum a nɔɔrɛn bahɛ na te bo taa.

will be added

X\