Isaiah 3

1Behɛ, to Daana, Pɛɛntɛɛnreba Na'ayenɛ la yeti a go' sɛla woo n de soŋorɛ la bɔ'a Yuda la Yerusalem teŋhe poan bahɛ mɛ. A yeti a go' la dia la ko'om la 2panhedoma la pɛɛntɛɛnreba la gankereba la nɔtɔgɔheba la behereba la kema la 3kpɛ'ɛndoma n behere nɛreba pihinuu nuu, la zutodoma, la kan'aneba la tiimdoma la bakolodoma zan'an. 4Na'ayenɛ yeti a wan bahɛ te bilɛɛhe dɛna ba naditeba, ge te kɔmbibihe sɔna ba behera. 5Nɛreba mɛŋa wan muguha taaba. Nɛra wan tuluge muguha a sɔɔn. Bonbilipaalehe kan nana bonkoroba, te taromdoma ka nana birikindoma. 6Nɛra wan gin' a sɔɔn a sɔ yire poan yeti, Hom n kelom tara fuo yɛɛra wa, dɛna to naba. Sɔna to daboto wa behera. 7Ge a wan kaahɛ bahɛ na yeti, Mam dagɛ teba. Mam ka tare dia bii futo n yire ha. Da bobe ya mam ya naba. 8Yerusalem gɛnte mɛ, te Yuda teŋa lu. Se'ere n sɔe la, ba tɔgom la ba etegɔ dela sɛla te Na'ayenɛ ka bɔta. Ba ka nane Na'ayenɛ na'am paŋa la. 9Ba behega pon pa'alɛ mɛ. Ba zoolom ba be'em la mɛ wo Sodom teŋadoma la. Ba ka sogore bɔ. Yele boe ba zuo. Ba tare la nɔyalegerɛ na pagelɛ ba mɛhe zuto. 10Yele tontɔɔdoma la yeti, La wan ana ba som. Ba wan di ba toonsoma la nyɛlom. 11Yele boe toonfɛn'ɛhadoma zuo. Nɔyalegerɛ n boe ba zuo. Ba wan to'e sɛla n nare ba. 12Mam nɛreba wa, kɔma n tare ya muguhera. Pɔgɔhe n sɔe ya behere. Sɛba n boe ya nɛŋa la bahɛ te ya bɔregɛ mɛ. 13Na'ayenɛ maahom ya. A zin'ire te a gankɛ mɛ. A yeti a kɛɛ la a nɛreba ba tuure. 14Na'ayenɛ zin'ire te a gankɛ la a kema la, la ba nɛŋadoma la. A yele ba yeti, yamam wa n sagom mam tiihe wɔla va'am wa. Ya zun' la nahadoma lɔgɔrɔ perɛ ya yiya. 15Wane te yamam wɔnrɛ mam nɛreba wa bala, ge sagom nahadoma wa sunya bala? To Daana Pɛɛntɛɛnreba Na'ayenɛ yele se'em n bala. 16Na'ayenɛ yeti, Zion teŋa pɔgɔhe wa pa'ale se mɛŋa. Ba kena gbɛgɛra mɛ, tara pan'ahegɔ nini. Ba kena ge nɔna te nonɔm banhe pire ba kegela damena. 17Bala zuo, Daana la wan bahɛ te nɔten kɛ'ɛhe to'e Zion pɔgɔhe wa zuto. Na'ayenɛ wan bahɛ te ba zuto kɔn. 18De daarɛ, Daana la wan fan' se nonɔm banhe la te se pita nu'uhen la zutin la yugulehen la 19tobekayulehe la se nyɔn'ɔn zuo futo, la nyɔya banhe, la banhe se'ehe n dekɛ yule ba futo poan la 20vuguhe se sapiba la, ge pirihe se na'ma banhe la, lorom se sɛgana la bahɛ, ge sagom sanba, la nyuŋo kaam la, 21ge sagom se danlehom, la nyɔya poan banhe la, 22la lɔgɔrɔ, kuruhe la fuwogorɔ sonɔ la, se danhe, 23la behenhe, la fupɛɛle soma, la ba nonɔm lɔgɔnyalema la futo. 24Ya kaam soŋo wan lebege kaam pon'oha, te ya sɛganɛ wan lebege mi'an. Ya zonto maalegɔ la wan lebege zubeela. Ya fuosoŋo wan lebege sunsagaŋɔ futo. Ya soŋa wan lebege be'ero. 25So'a wan kɔrom ya boraahe, te ya pɛɛntɛɛnreba ki pɛɛnbɔn'ɔn la poan. 26Koonɔ wan bɔna Zion teŋa wa nayahe poan, Zion wan kele a nɛreba wa bilom.

will be added

X\