Isaiah 28

1Yele boe Epraim teŋa daambugureba wa n de pa'alɛ n mɛhe doma wa zuo, la ka soŋa la n ane wo puuro la, bɔna pɔn'ɔhegɔ teŋsɛka nɛreba n de daambugureba ma'an la. 2Behɛ, Daana la tare la a bitonoŋa n kpe'em ge dɛna paŋadaana. A tom ka mɛ wo saakuga sabeeo la, ka ane wo ko'sebego seko n sagone la, ka uure mɛ wo ko'om n perɛ gaŋɛ uura se'em na la, te Na'ayenɛ tom ka bahɛ teŋparɛ wa zuo na. 3Ba nɛɛre Epraim teŋa daambugureba pa'alɛ mɛŋa la mɛ la na'ma teŋa. 4A soŋa la n ane wo buuro yɛhera a bugulugo la poan la wan zo'e wo kenkandeena mu'uro n zogere te ba nyɛta tɔ se'em la. Se'em han ne nyɛ tɔ pin'e, a ne le'ehɛ mɛ. 5De daarɛ, Pɛɛntɛɛnreba Na'ayenɛ la wan dɛna muŋa soŋa, ge dɛna sapibire sonɛ bo a nɛreba la n yee fiin la. 6A wan bɔ'ɔra se'em n gankere ba la yelemɛŋɛrɛ paŋa, ge dɛna paŋa bo se'em n ze' teŋa la nayaŋan gu'ura zaberɛ lɛbeha la. 7Bana me kiilinɛ mɛ la daam, nyu daam kpe'eŋo buge gɛnta. Malemadoma, la nɔtɔgɔheba la nyu la daam kpe'eŋo gɛnta. Daam bahɛ te ba tuluna mɛ, ɛɛra lɔ'ɔha daam kpe'eŋo kaara. Ba ne gɛnta mɛ ge nyɛta liligere. Ba bo'ore mɛ ba yɛla gankerɛ poan. 8Tiinro ma'an n tin lerom ba tebola la zan'an, te zen'an ka bɔna ana filam de zuo. 9A yeti a pa'alɛ la ane yam? A yeti a pa'alɛ yelehom la vɔnrɛ bo la ane? Sɛba n nan go'e bin'ihom la bii? Bii sɛba te ba nan kɔ'ɔn pɔnhegɛ ba bin'ihom poan la? 10La dela nɔɔrɛ n dole nɔɔrɛ, te nɔɔrɛ dɔla nɔɔrɛ. Ka'lam n boe nɛŋa, te ka'lam dɔla, te ka'lam bɔna nɛŋa te ka'lam dɔla. Fiin wa ka'lam, fiin wa ke ha. 11Bala zuo, Yenɛ wan dekɛ la yetɔgom sebo te ya ka wɔna, sateŋzaanrɛ yetɔgom tɔgɛ bo a nɛrebana wa. 12A yuun yele ya yeti, Iŋma'ahom n wana. Vo'ohogo n wana, ge ya kan kelehe en. 13Bala zuo, Na'ayenɛ yelehom n de sebo bo ba dela, nɔɔrɛ n dole nɔɔrɛ, nɔɔrɛ n dole nɔɔrɛ. Ka'lam n boe nɛŋa te ka'lam dɔla, te ka'lam bɔna nɛŋa te ka'lam dɔla. Fiin wa ka'lam, fiin wa ke' ha. Bala te ya wan gɛnta kena nɛŋa ge lɛbera pooren, te ba bɛnrɛ nyɔkɛ ya pɛnregɛ ya loŋe teŋa. 14Bala, wom ya Na'ayenɛ yelehom wa, yamam nadoma sɛba n kɛhere nɛreba ge beha Yerusalem teŋa nɛreba wa. 15Yamam yeti, Tomam eŋɛ la nɔɔrɛ la kum, ge sugulom yɔɔ. Te kpa'aherɛ n yeti de ŋmɛ' wa han ta paɛ na, de kan daane tɔ. Se'ere n sɔe la tomam parom to soka yele la mɛ, ge pan'ahɛ to mɛhe. 16Bala, Daana Na'ayenɛ yeti, Behɛ ya, n biŋere la ɛnberɛ Zion poan, ɛnberɛ n de kugukɛ'ɛŋa ɛnberɛ, te hom se'em n dekɛ ho mɛŋa delom dɛ, sɛla kan daam hɔ. 17N wan tara yelemɛŋɛrɛ, te la dɛna n magahegɔ mi'an te n tara magaha mɛta, ge tara tontɔɔ vom te enŋa dɛna n saahegɔ lɔkɔ. Saakuga wan piie ponpɔrɔŋɔ seko n sogɛ la keŋɛ, te ko'om puke zen'se'ehe woo n sogɛ la. 18Nɔse'ere te ya eŋɛ la kum la yɔɔ la wan kɔ'. Te kpa'aherɛ la en ye' na la han ta paɛ na, yamam zen'an n wan dɛna de sika zen'an. 19Saŋsɛka woo te de dɔla tɔla, de wan nyɔkɛ ya. Bolika tulugera bolika woo, de dole tɔla mɛ. Wontɛɛŋa la yu'uŋɔ saŋsɛka woo poan, de dole tɔla mɛ. La wan ba' dɛna too n tare dabeem, te ya kan bɔkɛ lan de sɛla. 20Gɔrɔgɔ wan pɔ'ɛ bo ya te ya tɛɛn ya mɛhe. Fugɔbega wan ana giriga bo ya te ya pin' ya mɛhe. 21Na'ayenɛ mɛŋa wan ihege saazuo Perazim Zoore zuo. A wan gbirige wo en wa eŋɛ se'em Gibeon Bɔn'ɔn poan la. A wan tom a toonɛ n dela nyalematooma la. A wan tom a toonse'a n boe a tɔka la. 22Bala, bahɛ ya kɛhega la, ge han dagana bala, nyanɛ kantɛ wan di ya. Mam wom to Daana, Pɛɛntɛɛnreba Na'ayenɛ la n maahom sagaŋɔ seko te a sagom teŋparɛ wa zan'an. 23Be'e ya toba kelehe n yelehom wa. 24Kaareba ne kɔ'ɔn kɔɔra biŋera mɛ ge ka buta? A ne kɔ'ɔn yeen bugura la teŋa biŋera yɛ'ɛha? 25A ne ka maalɛ zen'an la mɛ lobege naŋgena, ge yuue bɛrom buuri, ge borɛ naara ba zen'an, kemɔlega ba zen'an kerega me ba zen'an? 26A Yenɛ n pa'alɛ en soŋa. 27Ba ka tɔɔre naŋgena biile la tanduŋa, bii ba va' bɛrom buuri la gambana. Ba ne va' ba mɛ la dibega, ge kpa'ahɛ bɛrom buuri la dibega. 28Ba ne nɛɛm ki mɛ nyaŋɛ dekɛ mɔm sagabɔ. Bala, se'em kɔ'ɔn kan yee tɔa ma'an poan yɛ'ɛha. La hom n pon sigeha i zuo la tanduŋa la se'em me, i kan malom lebege zom. 29Yam kerega kana wa ze'ele la Pɛɛntɛɛnreba Na'ayenɛ n de kan'aŋɔ kerega daana la n de yam zan'an daana la zen'an na.

will be added

X\