Isaiah 27

1De daarɛ, Na'ayenɛ wan namehɛ ko'om poan bonsɛla la yu'urɛ n yi'ira Leviatan la. Ka wan kaahɛ ge zegera te ka peɛn, ge Na'ayenɛ wan ko' n la so'a n tɔe, gankera, ge kpe'em. 2De daarɛ, ya yoon tiihe wɔla va'am yoonɛ la yeti, 3Mam Na'ayenɛ n sɔe va'am la, bahera bo ko'om saŋa woo, te se'em da sagom bɔ. Mam gure bo mɛ yu'uŋɔ la wontɛɛŋa zan'an. 4Ge va'am la han yehe mɔyooro la gɔn'ɔhe, la dagɛ yele. N wan nɛ ba wɔnrɛ nyɔ' ba. 5Bii n bahɛ te bo delom mam te n gura bɔ. N wan bahɛ te bo naɛ la mam la sunma'ahom. Bo wan le naɛ la mam la sunma'ahom. 6Dabeha kene na, te Yakob wan nyɛ' yega. Israel wan puue wɔna. Ka wan wom perɛ teŋparɛ wa zan'an la ka wɔla la. 7Wo Na'ayenɛ la n ŋmɛ' bana la se'em la, a ŋmɛ' Israeldoma la bala yoi? Bii en kɔrom bana la se'em la a kɔrom Israeldoma la la bala? 8Hom dekɛ la sunsunyiim la zaba dige ba bahɛ. Dapɔya sabeeo saŋa la, ho dekɛ la sunsunyiim doohe ko yeregɛ ba bahɛ. 9Wana zuo, Na'ayenɛ wan bahɛ Yakob be'em bo en. Wana n wa dɛna ba be'em la yɔɔrɛ zan'an zan'an. A bahɛ te baga kaanbegɔ zen'enhe kuga la dɛna yɔgɔrɔ te a wɔnrɛ ba, ge da bahɛ te Aserah bagarɛ la zun'uhe nyɔ'an zen'enhe la zɛ'a. 10Teŋkantɛ la gan' la voore. Teŋsɛka n ne perɛ la nɛreba la gan' la beele wo pɔgɔtia zen'an la. Nii obere la bilam, bilam te nii kaahena, ge gbiriha a yile ginra la. 11A yila la han ku'e, a wan kɔ', te pɔgɔhe wa'ana vaɛ a ta toorɛ bugum. Se'ere n sɔe la, ba dagɛ nɛreba n tare bɔkerɛ. Bala ba Maala la kan tara ba ninbɔn'ɔn ge ba Naana ka bo ba som. 12De daarɛ, Na'ayenɛ wan pɔhɛ a tɔa la Euprates Kolaa la poan na paɛ Mizraim teŋa Kolaa la poan. Yamam Israel kɔma wa wan lagaha taa ba ayena ayena na. 13De daarɛ, tentanɛ wan peebe paŋa paŋa. Israel nɛreba sɛba n tuune Asiria teŋa poan la, la sɛba n yeregɛ bɔna Mizraim teŋa poan la wan kule na na'aha Na'ayenɛ toolom zoore wa zuo Yerusalem poan.

will be added

X\