Isaiah 26

1De daarɛ, ba wan yoon yoonɛ dena Yuda teŋa poan yeti, Tomam tare teŋa n kpe'em. Yenɛ dekɛ la faanrɛ te la dɛna ka dangɔɔma ka kura. 2Yu'ɛ ya nayahe la, te tontɔɔ teŋa la kɛn'. Teŋsɛka n tare sakerɛ sera la. 3Sɛba sunya n lo kaŋkaŋe la hom la te hom beha ba la ho sunma'ahom la. 4Dɛla Na'ayenɛ saŋa woo, ge Na'ayenɛ n de Na'ayenɛ la n de to Taŋa n ka bikiri. 5Enŋa n bahɛ te sɛba n yage saazuo lu teŋa na. Teŋsɛka n pon kanregɛ la, a tare ka sige la teŋa. A wɔnregɛ ka mɛ te ka lebege puuhugo. 6Na'ma wan nɛ ka. Sɛba n nyɛ namehegɔ, la taromdoma na'ma wan nɛ ka. 7Tontɔɔdoma sore ka tare bogoro. Birikina wa, maalɛ tontɔɔdoma sore la tontɔɔ. 8Yelemɛŋɛrɛ, Na'ayenɛ, hom pa'alegɔ la te tomam dɔla. Tomam gure la hom. Ho yu'urɛ la na'ahegɔ, la hom potɛn'ɛrɛ n de tomam sunboolom. 9Yu'uŋɔ, mam suunre eere la hom. Yelemɛŋɛrɛ, mam sea eere hom la ninmɔ'ɔrɛ. Teŋparɛ la han ta nyɛ namehegɔ ho zen'an, teŋa zuo nɛreba ne zamehɛ la tontɔɔ bɔŋa. 10La ban pon zɔ be'emdaana ninbɔn'ɔn la, a kan zamehɛ tontɔɔ bɔŋa. A ka bɔkere Na'ayenɛ n kpe'em se'em. 11Na'ayenɛ, hom zaberɛ mɛ la ba ge ba ka nyɛte. Ba nyɛ la hom nini n mɔ'ɛ la ho nɛreba la se'em la te nyanɛ di ba. Yelemɛŋɛrɛ, bugum n wan di ho diŋdoma. 12Na'ayenɛ, hom n sɛ' sunma'ahom bo tomam. Hom n eŋɛ tomam sɛla woo bo to. 13Na'ayenɛ to Yenɛ wa, daandoma basɛba pon tabelɛ sɔna tomam mɛ, la tomam n yi'ire hom ma'an yu'urɛ la zan'an. 14Kum ka le vɔna, ke'endoma sɛɛhe kan le ihege. Bala, hom namehɛ ba mɛ, ta sagom ba. Hom saalom ba sɛla woo bahɛ mɛ te ba ka tɛnra ba yele. 15Na'ayenɛ, hom n bahɛ te to teŋa wa le pa'ahɛ wa. Hom yalegɛ to teŋa wa pa'ahɛ wa. Bala, to pɛngere ho yu'urɛ la. Hom n yalegɛ to teŋa wa beena zan'an pa'ahɛ. 16Na'ayenɛ, ba eere hom mɛ namehegɔ poan. Ba kan ta'an sohɛ hom. Ba waahenɛ mɛ bɔ'ɔra hom. Ho tobedɔnlegerɛ n boe ba zuo gaŋɛ. 17Pɔgɔpoadaana n virigere dabeha la, a ne ɔbera la nu'uhe ge kaaha. Tomam daa ane la bala hom Na'ayenɛ nɛŋan. 18Tomam daa nyɔkɛ la poorɛ te la wona tɔ virigere poan. Te to ta yeti to dɔgɛ bia, dɔgɛ sabeeo. To ka nyɛ faanrɛ bo teŋparɛ wa, bii to tara yaahe teŋa wa zuo. 19Hom nɛreba n ki la wan vo'e. Ba iŋa la wan ihege. Yamam sɛba n gan' teŋa wa, ihege ya la voole la nyeema. Se'ere n sɔe la, ho mɛgelom la ane mɛ wo bolika mɛgelom la. Teŋparɛ wa wan bo sɛɛhe se'ehe n ki la woo vom. 20N nɛreba wa, wa'an ya na kɛn' ya bɔ'ɔrɔ poan. Yu' ya mɛhe bahɛ ha. Sogɛ ya mɛhe fiin. Gura te Na'ayenɛ sunsunyiim la ta ba'ahɛ. 21Behɛ, Na'ayenɛ wan ze'ele a zen'an yehe na, la a namehɛ teŋparɛ wa zuo nɛreba ba tuure la zuo. Teŋparɛ wa wan pa'alɛ ka ziim ka'ahegɔ tooma la zan'an.

will be added

X\