Isaiah 24

1Behɛ, Na'ayenɛ sagom teŋparɛ wa bahɛ mɛ, a gbirige ka bahɛ mɛ, wɔnrɛ ka ge yeregɛ sɛla wo ka zuo bahɛ. 2Lan ete nɛreba se'em la, la ete malemadoma la bala, yamehe, denɛ en ete se daandoma, se'ere n ete pɔsɔɔ, bala denɛ en ete ko kpɛ'ɛma, se'ere n ete da'ara, denɛ en ete kɔɔha, se'ere n ete se'em n tare pɛmɛha, denɛ en ete se'em n peŋe, se'ere n ete se'em n pemehe ge dɔgɔla la, denɛ n ete se'em n peŋe. 3Teŋparɛ wa wan sagom, kɔ'ɔn sagom zan'an gan'an. Se'ere n sɔe la, Na'ayenɛ yele se'em n bala. 4Teŋparɛ wa wan kele ta ku'e. Teŋa wa zuo wan kele ta ku'e, te nɛresɛba n de ka poan nɛrezura sɔe. 5Teŋparɛ wa zuo nɛreba n ganlom ka. Ba zagahɛ pa'alegɔ la mɛ la malema la ge ganlom nɔbiŋere se'ere n wan bɔna wuuha la mɛ. 6Bala zuo, nɔpɔtɛ n sagom teŋparɛ wa ta ba'ahɛ. Sɛba n boe ka zuo la boe la tuure poan. Bala zuo, ba nyɔ' sɛba woo n boe ka zuo la mɛ, te ba fiin wa n yee. 7Daampaalom ka boe, te tia ku'e. Sunpeelom sagom ya. 8Senyagahe ŋmɛ'ɛra ka boe, te baambaandoma ka le baana, te kɔnlɔgɔ ŋmɛ'ɛra go'e. 9Ba ka le nyuura daam la yooma. Daam kpe'eŋo nya tɔe mɛ bo sɛba n nyuunre bɔ. 10Teŋkanra wɔnrɛ mɛ saalom saalom, te yiya woo nayahe yu', te se'em da nyaŋɛ kɛn' a poan. 11Kaahega n kaahere sɔya zuto, daaŋɔ n ka boe la zuo. Nyeema woo lebege la sunsagaŋɔ. Okorɛ ka le bɔna teŋparɛ wa zuo. 12Sagaŋɔ n boe teŋkanra poan, te nayaŋa la kɔ' bahɛ. 13Lan wan ana teŋparɛ wa zuo se'em n bala bo nɛresaaleba. La wan ana wo kaam tia te ba ne miim ka wɔla se'em la, la wan ana wo ba bum la dia ba'ahɛ te yi'ihigo dɔla la. 14Ba zɛnkɛ la ba koa. Ba voole mɛ ɛɛra nyeeŋɔ. Ba boe la zanɔya bɔba kaahe Na'ayenɛ na'am wa paŋa la yele. 15Bala dapɔya doma wa, pɛngɛ ya Na'ayenɛ. Pɛngɛ ya Na'ayenɛ n de Israel Yenɛ yu'urɛ. Ko'om nɔgbenɛ nɛreba wa, pɛngɛ ya en. 16To wone la pɛnka yooma n ze'ete teŋparɛ wa loga woo, pɛngera Tontɔɔdaana la. Ge mam, la daane mam mɛ. La dela daaŋɔ bo mam. La daane mam mɛ. Se'ere n sɔe la, pina kelom pina mɛ, ge faanreba malom faanra mɛ. 17Dabeem la bogoro wan dɛna bɛntɔ. Teŋparɛ zuodoma wa, bogelɛ ya ya mɛhe sunya. 18La wan eŋɛ te hom se'em n peɛn sagaŋɔ wa mɔɔlegɔ poan la wan lu bogoro la poan. Hom se'em n ban'ɛn boko la poan dɔɔra na, bɛnregɔ la wan nyɔkɛ hɔ. Se'ere n sɔe la saazuo ha yu'ɛ la namehegɔ baha na, te teŋparɛ wa zuo me miina. 19Teŋparɛ wa tanhɛ mɛ. Teŋparɛ wa tanhɛ mɛ poan ha tooɛ tole. Ka gbirigere mɛ la dabeem. 20Teŋparɛ wa gɛnte mɛ kena nɛŋa la pooren wa daambugura la. Ka ɛngere lebegere mɛ wo zinho la. Ka tuure la ba tebegɛ mɛ ka zuo. Ka wan lu, kan le malom ihege. 21De daarɛ, Na'ayenɛ wan namehe panhe se'ehe n boe saazuo ha la, la nadoma n boe teŋparɛ wa zuo wa. 22Ba wan kan'ahɛ ba lagom taaba wo ba nyɔkɛ ba mɛ pagɛ boko poan la, te ba bɔna paka zen'an la poan. Ba wan bɔna bilam te la yuue, te ba ta namehɛ ba pooren. 23Valom wan nyɔkɛ ŋmarega, te vi tara wontɛɛŋa. Se'ere n sɔe la, Pɛɛntɛɛnreba Na'ayenɛ la wan dɛna naba Zion Zoore la Yerusalem poan, te keendoma la nyɛ a paŋa n zone se'em.

will be added

X\