Isaiah 20

1Na'ayenɛ lilige yele ana wa la yuun se'ere te Asiria teŋa naba Sargon tom a zaba nɛŋadaana Asdod teŋa na la, te ba wa'ana zabɛ nyaŋɛ Asdod teŋa la. 2Saŋkana poan te Na'ayenɛ tɔgɛ bo Amoz dayɔa Isaiah yeti, Yɛɛ sunsagaŋɔ fuo wa, ge pirihe ho tagara. Te mam eŋɛ bala, ge ɛɛra beele, kena na'beela. 3Te Na'ayenɛ yeti, Mam yameŋa Isaiah n ɛ beele, ge kena na'beela yuuma atan' te la dɛna danlehom bo Mizraim la Kus teŋhe wa. 4Bala mea te Asiria teŋa naba wan nyɔkɛ Mizraim la Kus teŋhe nɛreba, bonbibihe la bonkoroba zan'an, te ba kena beela la na'beela. Ba wan kena la fehe beela te la dɛna nyanɛ bo Mizraim teŋa. 5Bala te ba sunya wan sagom, te vi di ba, la bama n dekɛ ba mɛŋa delom Kus teŋa la, ge tare Mizraim teŋa ŋmɛ'ɛra ba nyɔn'ɔn la. 6Wana te sɛba n kɛn'ɛre ko'kantɛ nɔgbenɛ teŋhe wa wan yeti, Behɛ ya yelese'ere n eŋɛ sɛba te tomam daa dekɛ to mɛhe delom ba la. Sɛba te to daa zɔ paɛ ba te ba fan' tɔ Asiria teŋa naba nu'uhen bahɛ la en bala. Tomam nya wan eŋɛ la wane peɛn?

will be added

X\