Isaiah 18

1Yele boe teŋsɛka n tare kelompagehe bɔna Kus teŋa kolaa nɔɔrɛn wa zuo. 2Ka tone la nɛreba te ba dɔla ko'kantɛ poan kena, te sɛba dɔla kenkanya ɔɔnrɔnɔ kena. Ka ne tom ba yeti, keŋɛ kalam kalam paɛ teŋsɛka te ka nɛreba dɛna nɛre dareba, te ba iŋhe saalom, te nɛreba zɔta ba zen'an woo la zen'an. La dela teŋsɛka n kpe'em ge muguhera teŋhe te ka yetɔgom bɔna boyema, te kolaahe bemehe ka poan la. 3Ba han ta zɛnkɛ danlehom zɔya wa zuto ha, teŋa zuodoma wa, yamam sɛba n boe teŋparɛ wa zuo wa, wan nyɛ dɛ. Ba han ta peebe tentanɛ, ba wan wom. 4Na'ayenɛ yele mam yeti, N wan bɔna n bɔŋa zen'an la ha baanlam ge beha na. N wan ana baanlam wo wontɛɛŋa la, la ana digi digi wo sakotego saŋgbana n ziire tɔla se'em digi digi la. 5Bi'ire saŋa la, se'em ma'an te tiihe ta puura, ta bɔna bini wɔna wɔla kanha la, n wan dekɛ n lea ŋma' se yila la bahɛ. N wan kagɛ tile la la so'a, ge ŋma yila la bahɛ. 6Ba wan yee zoore zuo dɛna niihe dia, ge dɛna nɛnɔ bo mɔen dunhe. Ba wan dɛna niihe dia se'a, te mɔen dunhe la me kɛɛra ba wo dia kɛ'a saŋa la. 7Saŋkaŋa poan, bo'olom wan tare na bo Pɛɛntɛɛnreba Na'ayenɛ la. Ba dela nɛre dareba n wɔgɛ te ba iŋhe saalom, te nɛra woo zɔta ba la. La dela teŋsɛka n kpe'em ge muguhera teŋhe te ka yetɔgom bɔna boyema, te kolaahe bemehe ka poan la. Ba wan tare bo'olom wa'an Zion Zoore, zen'an te Pɛɛntɛɛnreba Na'ayenɛ yu'urɛ ze'ele la.

will be added

X\