Isaiah 16

1Tare ya piihe te se dɛna ya bo'olom ta bo teŋa la daana. Tare ya se ze'ele Sela, doohe pɔgɔtia la poan ta paɛ Zion Zoore la. 2Wo niihe n ɛngere se'em sai la, bii niiŋbibihe n yeregɛ se'em sai la, Moab teŋa pɔyɔɔhe wan ana la bala mea sai yakere Arnon kolaa la. 3Bo' to kan'aŋɔ na. Bo to potɛn'ɛrɛ. Pin' to te wontɛɛŋtoolega wa da ŋmɛ' tɔ. Sogɛ to sɛba te ba dige bahɛ wa. Da koohe sɛba n zote wa. 4Bahɛ te Moab teŋa nɛresɛba te ba dige bahɛ wa bɔna la ya. Dene ya soka zen'an bo ba te sagona la da paɛ ba. Se'em n wɔnregɛ la ka le bɔna. Sagaŋɔ ka le bɔna. Sɛba n muguhere nɛreba la mɛlom la zan'an teŋa la poan. 5Nɔŋerɛ la etesoŋɔ na'am gɔŋɔ n wan sɔe. Te gankera zin'ire ko zuo la birikinte bɔna naba David sogorɛ la poan. Gankera wa wan ɛɛra la yelemɛŋɛrɛ, ge ka dɛ'ɛna la tontɔɔ vom. 6To wom Moab teŋa pa'ale mɛŋa wa yele. Ka pa'ale mɛŋa la ba' gaŋɛ mɛ. Ka pa'alɛ a mɛŋa la a sunsunyiim. Ge a nyɔn'ɔn ŋmɛ'a la woo dela ponpɔrɔŋɔ. 7Bala zuo, Moab teŋa wan kele. Se'em woo n boe Moab teŋa wan kele. Ba wan kele bo Kir Hareset tiihe wɔla n ku'e wama la. Ba wan kele wo nɛreba te la ba' muguhe ba te ba kɛla se'em la. 8Se'ere n sɔe la, Hesbon teŋa samana kɔ'e mɛ, te Sibma dia tiihe va'am ku'e. Vatɔ tona wa poan te teŋhe nadoma ne wa'ana nyu' daam buge. Vatɔ wa keŋɛ la bala ta paɛ Yazer, yakera pɔgɔtia la, tɔla ko'kantɛ la. 9Bala, mam kele la nintam bɔ'ɔra Yazer. Kele bo Sibma dia tiihe vatɔ la. N wan ma'alɛ Hesbon la Eleale la n nintam. Se'ere n sɔe la, ho tiihe dideena go'ohego de'eŋɔ la kan le bɔna. 10Kereŋɔ la nyeeŋɔ ka le bɔna ho dia tiihe wɔla go'ohego la poan. Popeelom kaahega la nyeema la de'eŋɔ ka le bɔna ho dia tiihe va'am la poan. Se'em n ŋmɛkere daam kan le ŋmɛkɛ daam daam ŋmɛkerɛ zen'an la. Se'ere n sɔe la, mam go' voole aŋa woo. 11Bala, mam suunre kele mɛ wo kɔnlɔgɔ la Moab zuo. Mam potɛn'ɛrɛ zan'an boe la Kir Hareset teŋa poan. 12La kene na te Moab wan ta baŋɛ te enŋa a namehere la a mɛŋa la a baga la dela yoo enŋa n kenɛ a baga zonɔ la poan kaanbera la dela yoo. 13Na'ayenɛ n pon deŋɛ tɔgɛ Moab teŋa yele se'em n bala. 14Ge nananawa, Na'ayenɛ yeti, Yuuma atan' poan, wo tontona n wan kaanla a se'em nima nima la, Moab teŋa soŋa, la ka nɛrekooŋɔ la wan sigera, ta gee fiin wa, ka le ta tara toolom.

will be added

X\