Isaiah 14

1Na'ayenɛ wan ta zɔ Yakob la ninbɔn'ɔn, ge le loe Israeldoma wa, le sɛ ba ze'ele ba mɛŋa teŋa la poan. Saama wa'ana lagom la Yakob yire. 2Teŋhe nɛreba wan doohe Israeldoma kule Israel teŋa poan na, dɛna Israeldoma denɛ, Na'ayenɛ teŋa wa poan. Ba wan dɛna Israeldoma yamehe la pɔsɔɔrɔ. Israel wan tee sɔna teŋse'ehe woo n tabelɛ beha en la, te sɛba n tabelɛ muguha en la tee bɔna a nu'uhen. 3Daanse'ere daarɛ te Na'ayenɛ wan bo ya vo'ohogo ya namehegɔ la muguhego la toonkanrɛ se'a poan te ya wa dɛna yamehe la. 4Ya wan voole Babilon teŋa naba sakera yeti, Mugaha la nya koŋe ya! Sunsuntoolɛdaana la nya ba'ahɛ ya! 5Na'ayenɛ kɔ' be'emdaana doore la naba potɔpa la doore la 6n ne tare ŋmɛ'ɛra nɛreba la sunsunyiim ka malom gɔ'ɔra, ge diihira teŋhe la se nɛreba nyanɛ saŋa woo la bahɛ. 7Teŋparɛ wa zan'an nya boe la fai, te sunma'ahom bɔna. Teŋhe taɛ mɛ la yooma la nyeeŋɔ. 8Peelesonɔ tiihe la Lebanon mɔlɔsonɔ tiihe nyeene mɛ la yooma ho lua la zuo yeti, Hom paɛ teŋa daarɛ, so'a ka makɛ ŋmaɛ tɔ. 9Yɔɔ n gan' teŋa kerene mɛ te ko to'e ho. Ke'endoma sɛɛhe la sɛba woo n tabelɛ dɛna nɛŋadoma teŋparɛ wa zuo, la teŋhe nadoma woo n ki, ihegere mɛ te ba to'ohɛ hɔ. 10Ba woo wan lagom yele ho yeti, tɔrɔgɔ gin' ho mɛ wo tomam la, ho ane wo tomam la. 11Ho pa'ale mɛŋa, la ho yooma la ba'ahɛ la yɔɔ wa poan. Zunzunya n pin' ho, te dɛnlemadɛntɔ te'e ho teŋa. 12Ho eŋɛ la wane ze'ele saazuo lu na, bolika belomŋma'arɛ wa n de wontɛɛŋa nɛɛsoŋa wa? Ba sa'ɛ ho la saazuo ha bahɛ teŋparɛ wa zuo na. Hom se'em n daa ka behere te teŋhe wa dɛna sɛla bo ho la. 13Hom yele la ho suunre poan yeti, N wan zom saazuo ha. N wan zin'an n na'am gɔŋɔ zuo bilam ha, te n na'am gana Yenɛ nabiihe la. N wan zin'an n na'am gɔŋɔ la zuo lagaŋɔ zoore la zuo. N wan bɔna toolom zoore yeŋa ha n ma'an. 14N wan zom saŋgbana la zuin zuin ha. N wan ana wo Saazuo Daana la. 15Ge hom bala nya sige la teŋa na. Ho bo la yɔɔ poan, n de boko teŋa teŋa ha. 16Sɛba n nyɛ ho geenle ho mɛ, te la dɛna pakerɛ, la sɛla n eŋɛ ho la. Se'em n damɛ teŋparɛ wa, ge bahɛ te teŋhe miim la n bala? 17Se'em n bahɛ te teŋparɛ wa lebege ana wo mɔen la? Perɛ teŋhe la daaŋɔ, ge ka malom bahera a da'aba te ba lɛbera ba yiya la? 18Teŋhe nadoma han ki, ba ne pin' naba woo la ka yɔɔ poan. 19Ge ba kan pin' hom ho yɔɔ poan, ba eŋɛ hɔ wo teŋanpin'ire n ki la. Ba pin' ho mɛ lagom la sɛba te ba kɔrom, bii lo' ba la so'ahe ko la. Ho ane wo kum n gan' ka tara daana la. 20Ba kan pin' ho la nadoma. Se'ere n sɔe la ho sagom ho teŋa mɛ, ko ho teŋa la nɛreba. La eŋɛ te be'emdoma buuri yu'urɛ da le malom porɛ. 21Maahom a kɔma kɔrɔŋɔ zen'an, ba sɔyaaba tuure la zuo. Ba kan ihege na le sɔna teŋparɛ wa, bii ba le mɛ teŋkanra ka zuo. 22Pɛɛntɛɛnreba Na'ayenɛ la yeti, N mɛŋa wan zabɛ la Babilon teŋa, la n ŋmaɛ ka yu'urɛ, ka nɛreba, la kɔma ka poan bahɛ. Na'ayenɛ yele se'em n bala. 23N wan bahɛ te Babilon teŋa lebege viinɔ bɔŋa zen'an, la zen'an n kpanrɛ. N wan dekɛ sagaŋɔ sɔɔ piihe teŋa la. Pɛɛntɛɛnreba Na'ayenɛ yele se'em n bala. 24Pɛɛntɛɛnreba Na'ayenɛ la yeti, Mam n tɛn'ɛhere te la eŋɛ se'em la, la ete la bala, mam maahene te sɛla eŋɛ la, bala n ete. 25N wan wɔnregɛ Asiria n teŋa wa poan, n wan nɛ en n zoore wa zuo. Asiria yɔgɔhɔga la wan pakɛ mam nɛreba wa zuo, te a zeero pakɛ mam nɛreba wa bɔgɔrɔ zuo. 26Mam Na'ayenɛ n maahom se'em bo teŋa woo n bala, mam mɛŋa n zaberɛ la teŋhe wa. 27Pɛɛntɛɛnreba Na'ayenɛ la n maahom yele ana wa, ane n wan nyaŋɛ? Ane n wan go' a? 28Naba Ahaz kum yoonɛ, te yele dena wa yehe na: 29Pilistidoma wa, da nyeene ya te kuruseko n namehere ya la kɔ' ya. Bonsɛla kaŋa mea nyɛgerɛ wan yehe kanpɛn'a te ka yabega tɔna. 30Se'em n ba' dɛna taroma ba poan wan nyɛta dita, te naha bɔna fai. Ge n wan dekɛ kom ŋmaɛ hom bahɛ. Ho nɛresɛba n yee la wan vibe. 31Nayahe wa, kele ya mɛ, teŋkantɛ wa, kele mɛ. Pilistidoma wa, nyɛlegɛ ya. Zun'uhe n ze'ele zuɔ gulugera na la, pɛɛntɛɛnreba la zan'an maahom mɛ. 32Bene lebehegɔ n wan lebehe bo teŋkana wa n tom nɛresɛba na la? Na'ayenɛ mɛŋa n sɛ Zion teŋa la ze'ele, te ka poan nɛreba la n nyɛ pogoleŋɔ la wan bɔna fai.

will be added

X\