Isaiah 13

1Babilon teŋa yelese'ere te Amoz dayɔa Isaiah nyɛ n wana: 2Ze'ele zoore beele wa zuo zɛnkɛ danlehom tanhɛ ba. Yebehɛ ba la nu'uhe te ba saaɛ nɛrezura la yiya. 3Mam bo n toolomdoma la sore. Mam lagahɛ n pɛɛntɛɛnreba mɛ. Mam nɛresɛba sɛba n nyeene la mam nyaŋerɛ la, te ba tom mam sunsunyiim n bote se'em la. 4Kelehe, voole n ze'ete zoore zuo na wo nɛrekooŋɔ voole la. Kelehe ganka wa n sigere se'em wo teŋhe kekeko nɛreba n lagom taaba gangera. Pɛɛntɛɛnreba Na'ayenɛ la lagahere la a pɛɛntɛɛnreba te ba zabɛ. 5Ba ze'ele la teŋhe n boe dapɔya bɔba la pooren pooren ha na. Ba dela Na'ayenɛ sunsunyiim zaba lɔgɔrɔ, te ba sagom teŋa la zan'an. 6Kaahɛ ya mɛ, Na'ayenɛ dabaherɛ la pɔnre. De dela sagaŋɔ dabaherɛ ze'ele Gaŋɛ Zan'an Yenɛ la mɛŋa zen'an na. 7Bala zuo, nu'o woo ki mɛ yula, te boraa wo suunre fɔlɔgera. 8Nɛra woo wan pabegɛ, te too la woŋerɛ kɛn' ba. Ba wan wola wo pɔka n virigere la. Ba wan limiha taaba nɛhe la dabeem. 9Behɛ, Na'ayenɛ dabaherɛ la kene na, de dela too dabaherɛ, dita la sunsunyiim bugum, te bo taɛ teŋparɛ wa piihe. A wan yehe be'emdoma la ka poan bahɛ. 10Ŋmarebibihe n boe saazuo ha kan nɛɛ se bugum. Wontɛɛŋa wan sobege, te ŋmarega bugum kan nɛɛ. 11Mam wan namehe teŋparɛ wa nɛreba be'em la te ba tom la se'em bala. Ge yɔ toonfɛn'ɛhadoma ba tuure, ge sagom nɛre wuruba pa'ale mɛŋa la, ge sagom sɛba nini en ku'e la toon pɔn'ɔha la. 12N wan eŋɛ te asaala kan ta parege wo sanlema. Asaala kan ta parege wo Opir sanlema. 13N wan eŋɛ te saazuo gbi'ira, te teŋparɛ wa miim, Pɛɛntɛɛnreba Na'ayenɛ la sunsunyiim la n wan dita wo bugum la daarɛ. 14De daarɛ, asaala wan ana wo walega te ba tɛn' te ka zɔta nyaanra la, bii piihe n ka tare dɔla te a kan'aha se la. Nɛra woo wan zɔ lebe a nɛreba zen'an. Ba woo wan zɔ lebe ba teŋa ba teŋa. 15Ban nyɛ se'em woo, ba wan aanhom en. Se'em woo te ba nyɔkɛ, ba wan kɔrɔgɛ en. 16Ba wan nyɔkɛ ba kɔmbibihe fɔnbɛ ba ko ba nini, fan' ba yiya, ge sagom ba pɔgɔba. 17Behɛ, n wan dekɛ Media teŋadoma tuunle ya na. Ba ka tare koŋkoma'ahom la sanlenpeelega bii sanlema. 18Ba pɛɛma wan ko boraahe. Ba kan zɔta kɔmbilɛɛhe ninbɔn'ɔn. 19Babilon teŋa wa n de teŋhe woo soŋa wa, dɛna Kaldeadoma nyɔn'ɔn ŋmɛ'a teŋa wa nya wan ana wo Yenɛ n wa sagom Sodom la Gomora te se ana se'em la. 20Nɛra kan le kɛn'ɛra teŋa wa poan buuri saŋa woo poan bii duŋkeema wa'ana tin' sogorɛ bini bii ba kaahom dunhe bini. 21Pɔgɔtia poan bonyooro ma'an n wan sɔe bɔna bini, te viinɔ la taataa doma la mɔen boyooro la bayooro sɔe ba yiya la poan bɔna. 22Sanhe wan sɔe ba pɛɛntɛɛnreba bɔŋa zen'kanra la wɔɔla, te bayooro to'e nabiihe yikanra la poan. A dabeha tooro saŋa la paɛ na, dabeha la kan go'om.

will be added

X\