Isaiah 10

1Yele boe se'em n dekɛ be'em yɛla eŋɛ ze'elego, ge dekɛ muguhego yɛla eŋɛ ze'elego. 2Ba enŋa wana te ba pina la taromdoma boorɔ, ge lila mam nɛreba n boe muguhego poan yelemɛŋɛrɛ ge zuunra pɔkɔnpa ge faanra keebehe. 3Sokere daarɛ la, ba wan eŋɛ la wane? Nɔyalegerɛ daarɛ la n ze'ete zen'an n zaan na la han ta paɛ na, ane n wan soŋɛ ba? Ba wan bahɛ ba tarega la la bɛ? 4Ba kan ta nyaŋɛ eŋɛ se'ere gana ba pa'ahɛ sɛba te ba nyɔkɛ la poan, bii ba lagom kɔrom ba pa'ahɛ sɛba te ba ko la poan. Ge la wana wa woo la, Daana la suunre kan ma'ɛn, a kelom namehera ba mɛ. 5Yele boe Asiria teŋa wa n de mam sunsunyiim kpa'aherɛ wa zuo, hom n zanle mam sunsunyiim gulumagu'o. 6Enŋa te mam ne tom te a ta zabɛ la teŋse'ehe n ka dole Yenɛ. Enŋa te mam ne dekɛ to'ohɛ nɛresɛba n nyie mam suunre la, te a ta gin' fan', ge va lɔgɔrɔ, ge nɛ ba wo taalɛ wo bɛngerɔ n gan' sore zuo la. 7Ge dagɛ n bote se'ere n bala. La dagɛ a potɛn'ɛrɛ bala. A toonɛ dela a sagom, a saalom teŋhe zo'e zo'e bahɛ. 8Asiria teŋa wa yele ka mɛŋa yeti, Mam zaba nɛŋadoma dagɛ la nadoma? 9To ka nyaŋɛ Kalno teŋa wo Karkemis teŋa? Ge eŋɛ Hamat teŋa wo Arpad teŋa? Eŋɛ Samaria teŋa wo Damaskus teŋa la? 10Wo mam, Na'ayenɛ n sagom teŋse'ehe baga n nyɛ yu'urɛ gana Yerusalem la Samaria teŋhe baga se'em la. 11N da eŋɛ Yerusalem teŋa wa la ka baga wa wo mam eŋɛ Samaria teŋa la ka baga se'em la yoi? 12Daana la han ba'ahɛ n ete se'ere la Zion la Yerusalem teŋa la, a nya wan yeti, N wan namehɛ Asiria naba pa'alɛ mɛŋa wa, la a ninku'ure la. 13Se'ere n sɔe la, a yele a mɛŋa yeti, N mɛŋa paŋa n tom toon ana wa woo la n mɛŋa yam. Se'ere n sɔe la mam tare bɔkerɛ. N malom vuruhe teŋhe beena ge fan' se lɔgɔrɔ. Mam kpe'em la zuo te n sigehe nadoma mam bote se'em. 14Wo nɛra n tom teko poan se'em yɔle yɔle la, mam nu'o tom teŋhe lɔgɔrɔ poan la bala fan' tɔ. Wo gɛla n gan' yoo te nɛra vaara se'em la, mam vaara teŋparɛ wa zuo teŋhe la bala. Teŋa la kayena me ka ta'an zɛnkɛ nu'o bii lakɛ nɔɔrɛ yelese'ere. 15Lea kan ta'an zabera la se'em n zɛnka ka la bii sɔɔ ŋmɛ'ɛra ka nyɔn'ɔn la se'em n tare ka tare ka tona la. Kurugo wan tuluge kure nɛra se'em n zanle kɔ la, bii doore tuluge du'uhe nɛra se'em n zanle dɛ? 16Bala zuo, Daana la, Pɛɛntɛɛnreba Na'ayenɛ la wan tom too te bahɛ ho pɛɛntɛɛnreba la en kpe'em kaŋkaŋe la zuo na. Ko wan ze'ele Daana la zen'an na dita wo bugum la. 17Israel Nɛɛhom la wan lebege bugum. Fa'adaana la dɛna bugum peelom, di a gɔn'ɔhe la gɛnra la zan'an daanyenɛ. 18Bugum la wan di sagom Asiria teŋa tiihe soŋa la, la ka pɔn'ɔhegɔ zen'enhe la sagona finfiinhe wo ban'ara n vute se'em finfiinhe yɛ'a kum la. 19Tiihe se'ehe n wan yee teŋa la wan ana fiin wa, te bia wan ta'an kaanlɛ se. 20De daarɛ, Israel nɛresɛba n yee fiin la, Yakob yiredoma sɛba n peɛn la, kan le dekɛ ba mɛhe delom se'em n zabɛ nyaŋɛ ba la, ge ba wan delom la Na'ayenɛ, n de Israel Fa'adaana la. 21Sɛba n yee fiin wa la wan lebe na. Yakob yiredoma la n yee fiin wa la wan lebe Yenɛ Kanrɛ la zen'an na. 22La hom Israel teŋa wa nɛreba n zo'e wo kolaa tentɔnbin'ihegɔ wa, ba fiin wa n wan lebe na. Sagaŋɔ n ze' te ko sagom tontɔɔ teŋa wa. 23Sagaŋɔ kantɛ n ze'. Ko maahom ba'ahɛ mɛ. Daana la, Pɛɛntɛɛnreba Na'ayenɛ la mɛŋa wan bahɛ te ko sige teŋparɛ wa zuo na. 24Bala zuo, Daana la Pɛɛntɛɛnreba Na'ayenɛ la yeti, N nɛreba wa n boe Zion wa, da zote ya dabeem la Asiriadoma wa en ŋmɛ'ɛre ya la kpa'aha, ge buga dɔya zɛ'a ya zuo wo Mizraimdoma wa. 25La kan yuue la n sunsunyiim wa n ma'ɛn la ya, ge te n tee ŋmɛregɛ n sunsunyiim la tɔ ba, sagom ba. 26Pɛɛntɛɛnreba Na'ayenɛ la wan ka'ɛ tuluga uue ba wo n yuun ko Midiandoma se'em Oreb taŋa zuo la, a wan zɛnkɛ a doore pa'alɛ ko'kantɛ wa wo n yuun eŋɛ se'em Mizraim teŋa la. 27De daarɛ, Asiria zeero la woo n page ya zuo la wan pakɛ, te ba yɔgɔhɔga la me pakɛ ya nyugela zuo. Ya wan kanregɛ te ka kɔ'. 28Ba zaberɛ mɛ la Aiat teŋa. Ba doohe Migron teŋa tole. Ba biŋe ba lɔgɔrɔ la Mikmas teŋa. 29Ge ba zom zɔya la zuto doohe dɔlɔga zen'enhe la tole ta gan'arɛ Geba teŋa. Aramah teŋa gbe'ere mɛ, ge te Saul teŋa Gibea zɔta. 30Kaahe dɔɔrɔ n sigere Galim la Laisa teŋhe poan. Ninbɔn'ɔn n kɛn' Anatot teŋa. 31Madmena teŋa nɛreba zan'an zɔ yeregɛ mɛ, te Gebim teŋa nɛreba zɔ sogɛ. 32De daarɛ, a ze' la Nob teŋa, ge'era nyɛna Zion n de Yerusalem zoore la zuo. 33Behɛ, Daana la, Pɛɛntɛɛnreba Na'ayenɛ la wan ŋma tikanra la woo bahɛ na, ku'uhe se yila zan'an, la a paŋsɛka n tare dabeem la. 34A wan ŋma Lebanon teŋa mɔen tikanra la woo la lea bahɛ. Lebanon teŋa wan lu Paŋa Daana la nɛŋan.

will be added

X\