Hosea 9

1Israel, da nyeena. Da zɛnkera ho mɛŋa wo teŋhe sese'ehe n ete se'em la. Se'ere n sɔe la, ho kabonhe la yelege hom mɛ Yenɛ zen'an. Ban tɔɔre dia zen'an woo, ba ne paɛ bini mɛ eta wo pɔgɔyalega la. Se'ere zuo, ya ton la yalomtooma lɔgɔrɔ to'ohego. 2Ge dia tɔa zen'enhe la, la daam la wan ta pɔ'ɛ ya. 3Ya kan bɔna Na'ayenɛ teŋa wa poan. Epraim wan zɔ keŋɛ Mizraim. Ba wan ta bɔna Asiria teŋa, dita di sɛka n wan ganlom ya. 4Ba kan nyɛ sore tare daam bo'olom na bo Na'ayenɛ, bii ba kaanbegɔ la pee Na'ayenɛ poorɛ. Ba kaanbegɔ la zan'an wan ana wo koonɛ dia la, se'em woo n di ka wan ganlom a mɛŋa. Dia kana wan dɛna la ba mɛhe dia, ka kan kɛn' Na'ayenɛ Toolom Yire la poan na. 5Ya wan eŋɛ la wane de'eŋɔ daarɛ wa? Na'ayenɛ de'eŋɔ daarɛ wa, ya wan eŋɛ la wane? 6Ba han pon peɛn sagaŋɔ la, Mizraim wan kan'ahɛ ba na. Ba wan pin' ba Mempis teŋa poan. Mɔɔ to'e ba sanlenpeelega la. Gɔn'ɔhe wan sɔe yehe ba sogora la poan. 7Israel teŋhe wa, namehegɔ dabeha la paɛ na. Yɔɔrɛ dabeha la paɛ na. Israel kele mɛ. Yamam yi'ire nɔtɔgɔha la la gɔɔnɔ. Na'ayenɛ tontona la me dɛna zɔlɔ yamam nɛŋan. Ya be'em la gaŋɛ mɛ, te ya puurɛ nyɔ' la bugum. 8Nɔtɔgɔha la soŋɛ Na'ayenɛ gura Epraim, ge la bala zan'an, ya bɛnrɛ en mɛ sɔya woo zuto, ge tona pototooma a Na'ayenɛ yire la poan. 9Ba ba' ganlom tole mɛ wo Gibea dabeha poan ha la. Na'ayenɛ wan tɛɛn ba tuure la, ge namehe ba ba be'em la zuo. 10Mam daa nyɛ Israel wa la. La daa ane me woo nɛra n nyɛ tiihe wɔla tia n boe mɔen ha la. Mam daa nyɛ ho yaabdoma te ba ana mɛ wo kenkandeenɛ n wom kenkaŋa zuo ka wɔŋa saŋa la, bo mam. Ge ba daa ta paɛ Baal Peor teŋa na, dekɛ ba mɛŋa bo zufagahom lɔkɔ koyema, me lebege zufagahom doma, wo lɔkɔ la te ba nɔŋɛ la n de zufagahom lɔkɔ se'em la. 11Epraim na'ahegɔ la wan ɛnkɛ wo niiŋa la. Dɔgom kan bɔna. Poorɛ nyɔkerɛ kan bɔna. Peere kan bɔna. 12Ba ha pon uge kɔma, n wan fan' ba, te bia kan yee. Mam han bahɛ ba, yele seren wan sige ba zuo. 13Mam ta nyɛ Epraim te a ane mɛ wo kpa'kpa' tia n sɛ samanɛ sonɛ poan la. Ge nananawa, Epraim wan vɛ' a kɔma yehe na tehɛ te ba kɔrom ba. 14Na'ayenɛ, bo ba. Ho wan bo la bem? Bo ba pose'a n dɔgɔre baha, ge bo ba bin'iha n ka tare bin'ihom. 15Ba be'em toonɛ woo pɔhɛ la Gilgal teŋan na. Mam pɔhɛ yaɛ ba la bilam. Ba be'em la n tare potoseko la zuo, n dige ba n yire la poan bahɛ. N kan le nɔŋɛ ba. Ba kpɛ'ɛndoma la zan'an dela pobiregadoma. 16Epraim lu ya. Ba nyɛga la ku'e mɛ. Ba kan le ta'an wom wɔla. Ba han pon wan dɔgɛ kɔma, n wan doohe ko ba kɔma la te ba nini tegɛ ba la. 17Ban ka kelehe en la zuo, mam Yenɛ la me zagahɛ ba mɛ. Ba wan lebege eereba tuuna teŋhe zo'e zo'e poan.

will be added

X\