Hosea 7

1N han tebɛ Israel ba'ahɛ, Epraim be'em la wan nɛɛ na, te Samaria toonbe'ero la me nɛɛ na. Ba zan'an dela ponpan'ahedoma, zuunra yiya poan, te sɛba me faanra sɔya zuto. 2Ge ba ka mi' te mam tɛnre ba be'emtooma la woo. Ba be'em la n bala kae bahɛ teŋasoka mam ninin wa. 3Ge ba tare la ba toonbe'ero tona, te ba naba la poa pɛɛra, te ba kpɛ'ɛndoma la me nɔŋɛ ba be'em la. 4Ba zan'an dela kabonhedoma, te kabonhe koŋkoma'ahom dita ba wo bugum n taɛ dite boroboro deo poan se'em la. Bo ka le bɔta maalegɔ, bo boe la bala gura hon ta nɔm boroboro zom la ba'ahɛ se'em ma'an, gura bo ihegere saŋa. 5Te naba la daarɛ la, daam nyuŋo ma'an n bahɛ te a kpɛ'ɛndoma la bɛn', te a mɛŋa dekɛ a mɛŋa naɛ la nɛreyooro. 6Ba taɛ la bugum wo boroboro deo la, tuluga n boe ba poan ha, te yu'uŋɔ, te ba sunya la nyiira, te beere ta yelegɛ, te bo dita na wo bugum peelom la. 7Ba zan'an tulugɛ mɛ wo boroboro deo poan la, nya taɛ ba nɛŋadoma la dita. Ba nadoma zan'an lu mɛ. Ba se'em ka yi' bo mam na. 8Epraim dekɛ a mɛŋa naɛ me la nɛreba la. Epraim dela man'aherɛ n ka lebege. 9Saama n to'e a paŋa la, ge te a ka mina. A zuo pɔnrehe mɛ la zom peela, ge te a ka mina. 10Israel pa'alɛ n mɛŋa la n sagone en mɛ, ge ba kan ŋmɛregɛ lebe Na'ayenɛ la ba Yenɛ la zen'an na, bii ba ɛ en yele ana wa woo n ete en wa zuo. 11Epraim ane wo dayene la, gerego ka tara yam. Ba behere la Mizraimdoma, ge dɔla Asiriadoma poore. 12Ba han yɛ'a, n wan dekɛ n yoka lobe pin' ba. N wa vɛ' ba wo niihe n ɛngere saazuo la, bahɛ teŋa na. N wan namehɛ ba, doohe la ban lebe na yele ba nɛreba la se'em la. 13Yele boe ba zuo, la ban bɔregɛ ge bahɛ mam la. Sagaŋɔ wan sige ba zuo, la ban bire poore bahɛ mam la. N wan fan' ne ba, ge ba parone mɛ bɔ'ɔra mam. 14Ba ka dekere ba sunya kaahera bɔ'ɔra mam, ba ton ne gan'an la ba gɔtɔ zuo vɔɔla. Ba bire la ba pɔya bahɛ mam, ge ton keŋɛ ŋmata ba iŋhe, te ba nyɛ ki kɛ, ge nyɛ daam paalom. 15Mam n kpemehe ba, ge bo ba paŋa, ge ba ton bire la poore bahɛ mam na. 16Ba ton ŋmɛregɛ keŋɛ la sɛla n ka tare vɔnrɛ poan. Ba ane mɛ wo pɛɛnɛ n tɛn' nyɔhegɛ la. So'a wan kɔrom ba nabiihe la. Ba zɛlehe n tɔgɛ yetɔgɔyooro seto woo la. Mizraimdoma wan la' ba.

will be added

X\