Hosea 5

1Malemadoma wa, wom ya, Israeldoma wa, kɛleha ya. Naba yiredoma wa, yamam me wom. Gankerɛ boe ya zuo, la yamam n bɛnrɛ Mizpa teŋadoma, ge dɛna yoka pin' Tabor teŋadoma la, 2ge dɛna boko Sitim teŋa poan bɔ'ɔra nɛreba la. N wan namehɛ ba zan'an. 3Mam mi' Epraim fehega, Israel me gan' la mam ninin. Hom Epraim kɛn' la kabonhe poan, te Israel me ganlom. 4Ba etegɔ la kan bo ba sore te ba lebe ba Yenɛ la zen'an na. Yaalegɔ se'a te ba ka mina Na'ayenɛ. 5Israel pa'ale mɛŋa la n lobere en, te Epraim gɛnta a be'em la poan, te Yuda lagom gɛnta la en. 6Ba wan tare ba piihe, la ba nii keŋɛ te ba sohɛ Na'ayenɛ, ge ba kan nyɛ en, a foe a mɛŋa ba poan mɛ. 7Ba dagɛ birikindoma bo Na'ayenɛ, ba dɔgɔre la yaalegɔkɔma. Ba ŋmarepaalehe de'eŋɔ la wan sagom bama, la ba samana la. 8Peebe tentanɛ la Gibea teŋa poan. Peebe tentanɛ la Aramah teŋa poan. Sake ya pɛɛma sakerɛ Bet Aven teŋa poan. Benyamin, behɛ ho pooren. 9Namehegɔ daarɛ la, Epraim teŋa wan lebege daboo Israel buuri wa teŋhe la poan. Sɛla n wan eŋɛ n bala te n yele wa. 10Yuda teŋa nɛŋadoma wa ane mɛ wo nɛresɛba n malom vuta nɛreba teŋai beena kuga la. N wan ka'ɛ n sunsunyiim la wo bugum la, bahɛ nɛrebanadoma zuto na. 11Gankerɛ n bobege Epraim, wɔnregɛ en. Se'ere n sɔe la, a kɔ'ɔn lo' la a suunre te a doohe sɛla n de zaŋa. 12Bala zuo, mam Na'ayenɛ ane mɛ wo mɔka la, bo Epraim, ge pon'ɛn Yuda teŋa. 13Epraim baŋɛ te enŋa bɛn'ɛnre mɛ la, te Yuda me nyɛ a mɛŋa pogoleŋɔ la, Epraim ihege mɛ tom Asiria nakantɛ la zen'an, ge naba la ka nyaŋɛ tebɛ hɔ, bii ho nɔtɛ la. 14Se'ere n sɔe la, mam yeti n ana me wo gbegenɛ la, bo Epraim, ge ana wo gbegenpaalega la bo Yudadoma. Mam mɛŋa wan aanhom ba zɔnra zɔnra, ge keŋɛ. N wan vu ba keŋɛ, te sɛla ka bɔna wan nyaŋɛ to'e ba bahɛ. 15N wan lebe n bɔŋa zen'an la poan, gura te ba baŋɛ ba tuure, ge nya ɛɛra mam. Ba wan ta ze'ele la ba sunsagaŋɔ la poan ɛ mam.

will be added

X\