1 Bala, yi'ira ho keema la Ami! Ge yi'ira ho tanya la me Aruhama! 2 Kan'an ho ma. Kan'an en, la n pon dagana mam pɔga, te mam me dagana a sera la, te a bahɛ a yaalegɔ la. 3 Han dagana bala, n wan sengehɛ en beele wo ban yuun dɔgɛ en se'em bahɛ na la, ge eŋɛ en te a lebege pɔgɔtia zen'an, ki ko'nyuuro. 4 N kan zɔ a kɔma la ninbɔn'ɔn. Se'ere n sɔe la, ba dela yalom kɔma. 5 Ba ma dagɛ birikina, tom la yalomtooma dɔgɛ ba la nyanɛ, la n yele a mɛŋa yeti, N wan dɔla n zabadoma wa poore, la bama n bo'ore mam dia la ko'om la futo la dunhe kɔnberɔ la kaam la daam la. 6 Bala zuo, n wan dekɛ gɔn'ɔhe kpanrɛ a sore, n wan mɛ dangoone beŋe en, te a kan nyɛ a sɔya la. 7 A wan zɔta dɔla a zabadoma wa poore, ge a kan paɛ ba, a wan ɛ ba, ge kan nyɛ ba. Bilam te a nya wan yeti, N wan lebe n serakora la zen'an, la ane mam som bilam sona nananawa. 8 A ka mi' te mam n bala bɔ'ɔra en ki' la daam la kaam, ge golɛ en la sanlenpeelega la sanlema, te ba ton tara na'aha Baal bagarɛ la. 9 Bala zuo, n wan to'e n ki kɛ'a saŋa, ge to'e n daam la n kaam bo saŋa poan, ge to'e n dunhe konberɔ, la n sanlema la te n dekɛ bo en te a yɛɛra pin'ira a beele la. 10 N wan pilige a nyanɛ a zabadoma la ninin. Nɛra ka boe wan ta'an to'e en mam nu'uhen bahɛ. 11 N wan sagom a de'enɔ la bahɛ. N wan sagom a ŋmarepaalehe de'eŋɔ dabeha la a vo'ohogo de'eŋɔ dabeha la la a de'enɔ seto woo n boe bahɛ. 12 N wan bahɛ te a tiihe, la a kenkanhe se'ehe te bo a mɛŋa yeti, N yɔɔrɛ n wana te n zabadoma dekɛ yɔ mam la kpanrɛ wo mɔen la, te mɔen dunhe obe ba. 13 N wan namehe en, la n de'ene Baal baga de'eŋɔ la, ge nyɔ'anra zun'uhe bɔ'ɔra a la, la n ne Baal bagɛ a mɛŋa la sanlema dɔla a zabadoma poore, ge tamɛ mam yele la zuo. Na'ayenɛ yele se'em n bala. 14 Bala zuo, n wan pan'ahɛ en keŋɛ mɔen ha, la en ta kagɛ en. 15 Bilam pooren, n wan lebehe dekɛ a tiihe la bo en, ge te daaŋɔ zen'an wa som zen'an. Bilam te a wan kɛleha mam wo a bonbilome ha la. A wan kɛleha mam wo n yuun nan ze'ele Mizraim teŋa yehe na la. 16 Na'ayenɛ yeti, Daanden daarɛ, ho wan yi' mam yeti ho sera. Ho kan le yi' mam yeti Baal. 17 N wan foe Baal baga la yu'ura ho nɔɔrɛn, ho kan le porɛ ba yu'urɛ. 18 Dabeha aŋa poan, n wan biŋe nɔɔrɛ la bo ho, la mɔen dunhe, la niihe en ɛngere saazuo, la bonvɔɔhe woo n eere teŋa wa zuo. Ge n wan sagom tiini la so'ahe la zaba zan'an teŋa wa zuo bahɛ, ge te teŋa la bɔna fai. 19 N wan le di ho, te ho dɛna n pɔga, nananawa kɔ'ɔn yɛ'ɛha. Yelemɛŋɛrɛ la birikinte la narehom la zo'ohogɔ la ninbɔn'zɔrɛ wan bɔna hon zen'an. 20 N wan le di ho la birikinte, te ho baŋɛ Na'ayenɛ. 21 Na'ayenɛ yeti, Dabeha aŋa poan, n wan lebehe. N yi' saŋgbana wa, ge ba wan yi teŋa la. 22 Te teŋa wa me yi' ki' la daampaalega la kaam, Yezreel teŋa. 23 N wan borɛ en teŋa la poan bo n mɛŋa. N wan zɔ Lo Aruhama ninbɔn'ɔn, ge yele Lo Ami yeti, Ya dela mam nɛreba, te ba me yeti, Hom n de mam Yenɛ.
