Hosea 13

1Epraim daa ne han tɔgɛ, nɛreba daa ne gbe'era mɛ, a dela zuodaana Israel poan, ge ganlom a mɛŋa la Baal baga, nya lu ki. 2Nananawa, ba kelom tona la be'em. Ba kure baga bo ba mɛŋa. Ba dekɛ la sanlenpeelega, bahɛ te kuta kure baga wo ban bote a se'em la bo ba. Kuta n nu'uhe n kure ba, te ba nya ne yele ba mɛhe yeti, Kaanbere ya baga ana wa. Te nɛreba donbeta teŋa gin'ira nagabila baga ana wa. 3Bala zuo la, ba wan ana wo bolika mɛgelom la. Ba wan ana wo mɛgelom n ka yuuhere ku'ure se'em la. Ba wan an wo urugo te ba tɔ ki yɛɛla te ko yɛhera se'em la. Ba wan yɛhera kalam kalam wo zun'uhe n dɔle yoko poan yɛhera se'em la. 4Ge la bala zan'an, mam n de Na'ayenɛ ya Yenɛ. Pɔhɛ Mizraim teŋa na, la zina, ya ka mi' Yenɛ gana mam. Han dagana mam, faanra ka le bɔna. 5Mam n daa behere ya pɔgɔtia la poan la, zen'sɛka te ko'om ka bɔna bini la. 6Mam yuun uge ba mɛ, te ba tegɛ. Ban tegɛ ba'ahɛ la, pa'alɛ n mɛŋa n nya kɛn' ba, te ba tamɛ mam yele. 7Bala, n wan ana wo gbegenɛ la pigira ba. N wan sogɛ wo yeobaa la, gan'an sore gura ba. 8N wan ginregɛ ba na wo dea te ba nyɔkɛ a kɔma te a ginregera na se'em la. N wan zabɛ aanhom ba zu gana. N wan larom ba, te ba sunsure gan'an yeŋa na, te n sagom ba, wo gbegenɛ n ko duŋa vagera se'em la. 9Israel, n wan sagom hɔ, ane n wan soŋɛ hɔ? 10Ho naba la bɛɛ wan fan' ho bahɛ la? Ho kpɛ'ɛndoma la n boe ho teŋkanra la poan la bɛɛ? Ho daa ka yeti, bo mam naba na, bo mam nɛra te a beha mam? 11Ho eŋɛ la bala te mam ze'ele n sunsunyiim la poan, bo ho naba, le ze'ele n sunsunyiim mea poan, yehe en bahɛ. 12Epraim tuure la lo' ta' en mɛ. A be'em la gan' mɛ. 13A namehegɔ la ane wo pɔka n virigere la, ge te sina kpa' toba wo bitobekawoŋa la. 14N fan' ba yɔɔ poan bahɛ? N fan' ba kum poan bahɛ? Kum, ho kpe'eŋo boe la bɛɛ? Sagaŋɔ, ho sagaŋɔ la bɛɛ? Ninbɔn'zɔrɛ ka boe mam ninin wa poan. 15La hom Epraim n pon tare zuo ho keendoma la wo poan la, Na'ayenɛ wan bahɛ te sabeeo toolegɔ ze'ele dapɔya pɔgɔtia la poan lobe na, te ho kolaahe la zan'an ku'e. Ko wan lobe degehɛ ho tarega la zan'an, la ho toolom lɔkɔ woo. 16Samaria teŋa wan zi ba tuure la yɔɔrɛ, la ban bire poore bahɛ ba Yenɛ la. So'a wan kɔrom ba. Ba wan nyɔkɛ a kɔmbibihe fonbɛ teŋa te ba tonhɛ zɔnra zɔnra, ge larom a pɔgepoohe.

will be added

X\