Hosea 11

1Israel n yuum de bia la, mam yuum nɔŋɛ en mɛ, yi n dayɔa wa ze'ele Mizraim poan yehe na. 2Ge mam n yi'ire Israel se'em la, ba foore ba mɛŋa la bala lɛbera pooren, ge baha mam. Ba kaanbere Baal baga la bala, ge nyɔ'anra zun'uhe bɔ'ɔra baga. 3Ge mam n zamehɛ Epraim kenɛ, mam n tare ba la n nu'o. Ge la bala zan'an, ba ka mi' te mam n tebɛ ba. 4Mam daa zanle etesoŋɔ, la nɔŋerɛ doore gu'ura ba. Mam daa ane mɛ wo sɛba n ne yɔkɛ yɔgɔhɔga kɔma zuo bahɛ la bo ba, ge lɛ'ɛra ba dia. 5Ban zagahɛ te ba kan lebe mam zen'an na la zuo, ba wan lebe Mizraim teŋa. Asiria teŋa wan le dɛna ba naba. 6So'ahe n boe ba teŋa la poan kɔrɔna. Ka wan kɔrom ba tendaandoma la, ba lika poan tooma la zuo. 7Mam nɛreba wa kɔ'ɔn lo la ba sunya te ba bire poore bahɛ mam. Ba wan yi' Gaŋɛ Zan'an Yenɛ wa, ge a kan le soŋɛ ba. 8Epraim, mam wan eŋɛ la wane bahɛ hɔ? Israel, mam wan eŋɛ la wane dekɛ ho tehɛ? Mam wan eŋɛ la wane, namehɛ hom wo mam eŋɛ Adma se'em la? Mam wan eŋɛ la wane, eŋɛ ho wo mam eŋɛ Zeboiim se'em la? Mam suunre ka sakɛ bala. 9N kan bahɛ te n sunsunyiim la sige ho zuo na. N kan le sagom Epraim. Se'ere n sɔe la mam dela Yenɛ, n dagɛ asaala. Mam n de fa'a bɔna la ya la. N kan wa'an ya zen'an na la sunsunya. 10Ba wan dɔla Na'ayenɛ se'ere n ne wuune wo gbegenɛ la poore. A han wuunlom, a kɔma wan ne ze'ele nɛŋa teŋhe wa poan ha kanbela na. 11Ba wan kanbela na wo Mizraim teŋa niihe la. Ba wan kanbela na wo Asiria teŋa dayɛma la, te n tare ba ta kɛn'ɛhɛ ba yiya poan. Na'ayenɛ yele se'em n bala. 12Epraim dekɛ la ponpɔrɔŋɔ kae mam, te Israel tara pan'ahegɔ, ge Yuda ma'an n kene la Yenɛ, ge dɛna birikina bo Na'ayenɛ.

will be added

X\