Hosea 10

1Israel ane mɛ wo tia soŋa n wom wɔla zo'e zo'e la, ge n wone zɔ'ɔra se'em la. A mɛte Baal bimbina zɔ'ɔra la bala mea. Teŋa la n pa'ahere se'em, a toolom kuga la me pa'ahere la bala mea. 2Ba parone mɛ. Bala, ba zi ba be'em la. Na'ayenɛ wan gbi' ba bimbina la, ge wɔnrɛ ba ba toolom kuga la. 3Ba wan yele ba mɛhe yeti, To ka tare naba. Se'ere n sɔe la, to ka nane Na'ayenɛ. Ge naba, pon wan eŋɛ la bem bo to? 4Ba yetɔgom dela zaŋa, ba pɔa dela yoo, ban biŋere nɔse'a la dela yoo. Bala ponpɔrɔŋɔ n to'e zen'an la wo mɔ be'o n to'e samanɛ se'em la. 5Dabeem wan kɛn' Samaria teŋa nɛreba, la ba nagabila bagarɛ la n boe Bet Aven poan n wan bɔregɛ la. De nɛreba wan kaahɛ de zuo, te de tendaandoma sɛba n kaanbere dela, kele, la de soŋa la n yehe de poan la. 6Ba wan zi de keŋɛ Asiria teŋa, te de ta dɛna Asiria teŋa nakantɛ la yɔɔrɛ. Yanɛ wan di Epraim teŋa, te vi di Israel teŋa, a baga la zuo. 7Samaria teŋa naba wan kpilom tole wo dɔɔpɔkɔ pagɛ ko'om zuo la. 8Aven kuŋkuma la n de Israel be'em toonɛ zen'an la wan sagom. Gɔn'ɔhe, la genra wan sɔe yehe ba kaanbegɔ zen'enhe la zuto. Ba wan yele zobibihe la yeti, Lile ya to na, ge yele zɔya kanra la yeti, Lu ya din' to na. 9Hom Israel wa, pɔhɛ Gibea daarɛ la, ya kɔ'ɔn tona be'em la bala tara tara la zina. Zaberɛ da sige ba zuo Gibea teŋa poan yoi? 10Mam wan zabɛ la nɛre ŋmɛlemadoma wa, la n namehɛ ba. N han ta nameha ba ba be'emtooma la te ba tom tagehɛ la zuo, teŋhe wan lagahɛ taaba bobege ba. 11Epraim dela nagasarega te ba zamehe en te a nɔŋɛ a ŋmɛtena ki te i tɔɔra. Bala te mam ka yɔgɛ en, ge nananawa, n wan yɔgɛ en te a ne buge teŋa la. Yuda nya wan kɔ. Yakob mɛŋa nya wan uuha samanɛ bɔ'ɔra a mɛŋa. 12Borɛ ya tontɔɔ biila bo ya mɛhe, la ya kɛ' nɔŋerɛ se'ere n ka tare ba'ahegɔ la. Kɔ ya samana digila la, ge saŋa la paɛ ya te ya ɛ Na'ayenɛ, te a wa'ana ne tontɔɔ vom bahɛ ya zuo. 13Yamam borɛ la potɔɔ, kɛ' fan'. Ya di la ponpɔrɔŋɔ wɔla. Yamam n dekɛ ya mɛhe delom ya mɛŋa paŋa, la ya pɛɛntɛɛnreba n zo'e se'em la zuo. 14Zaba wan sige ya zuo na, sagom ya teŋkpɛ'ɛma la zan'an wo Salman n yuun sagom Bet Arbel se'em ba zaberɛ la, yuun ŋma madoma, la ba kɔma zɔnra zɔnra la. 15Lan wan eŋɛ hom Betel se'em bala, ho potɔɔ la zuo. Ta yɛ'a zanɔɔrɛ, daarɛ zanɔɔrɛ, ba wan ko' Israel teŋa naba.

will be added

X\