Hosea 1

1Saŋsɛka poan te nadoma Uzia la Yotam la Ahaz la Hezekia dɛna Yuda teŋa nadoma, te Yehoas dayɔa Yeroboam me dɛna Israel naba la te Na'ayenɛ dekɛ a yelehom doohe Beeri dayɔa Hosea poan. 2Na'ayenɛ n pɔhɛ te a tɔgɛ bo Hosea la, Na'ayenɛ yele Hosea yeti, Keŋɛ ta di pɔgɔyaalega, la ho dɔgɛ kɔma n de kɔmyaalehe la ka, teŋa la tom la be'emkantɛ, la ban zagahɛ Na'ayenɛ la. 3Bala te Hosea di Diblaim pɔyɔa Gomer, te ka nyɔkɛ poorɛ dɔgɛ bodibila bo en. 4Te Na'ayenɛ yele Hosea yeti, Segɛ ka yu'urɛ Yezreel. Se'ere n sɔe la, la kan yuue, te n namehɛ Yehu yire wa la n ko Yezreel paberɛ la poan la, la n sagom Israel sɔ'ɔlom la bahɛ. 5De daarɛ, n wan kɔ' Israel tiini Yezreel Bɔn'en la bahɛ. 6Te Gomer le nyɔkɛ poorɛ dɔgɛ pugula, te Na'ayenɛ yele Hosea yeti, segɛ ka yu'urɛ Lo Aruhama. Se'ere n sɔe la, n kan le zɔ Israel yire wa ninbɔn'ɔn bii n di suguru bo ba. 7Ge n wan zɔ Yuda yiredoma ninbɔn'ɔn, la n dekɛ mam yu'urɛ wa n de Na'ayenɛ ba Yenɛ wa fan' ba bahɛ. N kan dekɛ la tanhɔ bii so'a bii zaberɛ bii yiri bii yiri ban'areba fan' ba bahɛ. 8Te Lo Aruhama ta sige, te Gomer le nyɔkɛ poorɛ dɔgɛ bodibila. 9Te Na'ayenɛ yele Hosea yeti, Segɛ ka yu'urɛ Lo Ami. Se'ere n sɔe la, ya dagɛ mam nɛreba, mam me dagɛ ya Yenɛ. 10Ge bala zan'an Israel buuri wa wan kelom yi'ɛ ana wo ko'kantɛ nɔɔrɛn tentɔnɔ n kan ta'an kaanlɛ, bii magahɛ se'em la. Zen'sɛka te ba daa yele ba yeti, Ya dagɛ mam nɛreba la, ba wan yele ya bilam mea te Na'ayenɛ mɛŋa kɔma. 11Yuda, la Israel teŋhe nɛreba wan dɛna boyena, loe nɛŋadaana ayena, ge to'e teŋa la sɔna. Se'ere n sɔe la Yezreel dabaherɛ la yeti de dɛna la dabaherɛ kantɛ.

will be added

X\