Ebre 9

1Ge yia nɔbiŋere la yuun tare la malema bo nɛreba n dɔla po'oha Na'ayenɛ se'em zɛn'sɛka te nɛresaala mɛŋa dekɛ a nu'uhen tom te ba kɛn'ɛra po'oha. 2Ba yuun tin' sogorɛ te butolela ze'elego la tebole la boroboro sebo te ba tara bɔ'ɔra Na'ayenɛ boe la pooren deo la. Pooren la dela toolom zen'an. 3Bɔseko me n yuun me tama yi'i nɛŋa ge la yu'urɛ dela Saraa. 4Bɔkona wa poan, ba yuun tare la sanlema ko'ɛnka daka la nɔbiŋere daka te sanlema pin' a zan'an. Sɛla la n yuun da boe daka la poan yuun dela sanlema dokɔ te manna bɔna bini la Aron dɔɔ se'ere te Na'ayenɛ yuun bahɛ te vɔnpaala yuun puhe bini la kuguse'a te Na'ayenɛ yuun dekɛ a pa'alegɔ golehɛ bo Moses la. 5Ge daka la zuo la, kelompagehedoma la yuun yeregɛ mɛ pin' be'em duuhego liŋa. Ge nananawa, to kan nyaŋɛ tɔgɛ yelehe yele ana wa woo yema yema. 6Te ban yuun ne han ta maahom sɛla woo ba'ahɛ, malemadoma la yuun ne kɛn' la pooren bɔseko te ba kɛn'ɛre yia la daarɛ woo tona ba tooma. 7Ge malema nɛŋadaana la ma'an n yuun de se'em n kɛn'ɛra Saraa poan ha la yuunɛ yuunɛ. A yuun ne dekɛ ziim bona wa bo Na'ayenɛ a mɛŋa yelebe'ero la nɛreba la yelebe'seto te ba eŋɛ ge ka mina la zuo. 8Na'ayenɛ Sea la pa'alɛ soŋa soŋa yɛhera maahom kona wa te Sogorɛ kɛka la n nan kelom ze'a la, fole ka boe yɛ'a kɛn'ɛra toolom zen'an la poan ha la. 9Yelese'a woo n yuun ete la wone la sɛla n pa'alɛ tɔ nananawa. Dena wa vɔnrɛ dela bo'olom la dunhe te ba yuun tara koora bɔ'ɔra Na'ayenɛ la kan ta'an tee sɛba n po'ohere la potɛn'ya te ba dɛna yelemɛŋɛrɛdoma. 10Ba koa la yuun dela diihom la daam la dɛngerɔ duuhego yɛla ma'an. Yele ana dagɛ sɛla n tone soŋora nɛra suunre poan ha ge a tona la bala gura te Na'ayenɛ ta tee sɛla woo. 11Krista n wa'ana dɛna malema nɛŋadaana la bɔ'ɔra yelese'a n ana soŋa bɔna kalam wa. Ge Sogorɛ te a kɛn'ɛra la gana ge me le de'a yelemɛŋɛrɛ zen'an, zen'an te nɛresaala ka tin'. Dena wa vɔnrɛ dela ka ka lagom dɛna teŋa wa zuo denɛ. 12N daa kɛn' Saraa la, a daa ka tare boohe la lɔlepaalehe ziim te a ko' bo Na'ayenɛ wo malemadaana n yuun eta se'em la. Ge a daa ton de'a la a mea ziim n kae la zuo te to tara vom sebo n ka tare ba'ahegɔ. 13Boohe la lɔlehe ziim la tampegelom gaam taaba miihe nɛresɛba han ton dɛngerɔtooma la te ba yuun yuun ne pee ba dɛngerɔ, 14behɛ ya Krista ziim n tom se'em bo to n gana bala. Na'ayenɛ Sea la poan a daa dekɛ a mɛŋa tehe mɛ te ba ko' en. A me daa ka tuure la fiin me a zen'en. A ziim la bahɛ te to potɛn'ɛra ana soŋa te to tona bɔ'ɔra na'ahegɔ bo Na'ayenɛ se'em n vɔe wa. 15Dene mea zuo, Krista n de se'em n ze'ele tona nɔbiŋpaalega wa tooma. Bala, nɛresɛba te Na'ayenɛ yi' la wan nyɛ' kan'somɔ la te a biŋe a nɔɔrɛ te a bo la wuuha. Se'ere n sɔe la, Yesu n ki' la fan' nɛrebana bahɛ te ba ka le tona be'em sebo te ba daa nan tona yia nɔbiŋere saŋa la. 16Ge nɛra ta'an bo a nɔɔrɛ te a han ki', se'em vaɛ a lɔgɔrɔ ge se'em n yete a vaɛ a lɔgɔrɔ han ka pa'alɛ soŋa soŋa te a seren ki' mɛ, 17a kan ta'an loe yelese'ere tom de poan. Se'ere n sɔe la, a han nan ka ki' ge kelom vɔna mɛ, n yele se'em la dela yoo. 18Bala n sɔe te ziim me yuun bahɛ te yia nɔbiŋere la yuun pɔhɛ tona. 19Yia poan, Moses n yuun yele nɛreba la pa'alegɔ la woo n boe Yenɛ gɔŋɔ poan la, a nya dekɛ la lɔlepaalehe ziim la ko'om la kɔnberɔ mɔlɔ la nyunhunyuŋa miihe gɔŋɔ la la nɛreba la woo, 20ge yeti, Ziim wa dela Na'ayenɛ nɔbiŋere la te a biŋe la ya la, maanɛ. 21A yuun me dekɛ ziim miihe Sogorɛ la lɔgɔseto woo te ba yuun da tara kaanbɛ la. 22Pa'alegɔ la yele te ba duuhe sɛla woo ziim la poan. Ba yuun ne han ka ko' dunhe te ziim yehe, Na'ayenɛ me ka bahere ba be'em bɔ'ɔra ba. 23Te teŋa wa zuo yelese'a dela saazuo yelese'a nyɛlom nyɛlom te la nare te ba pee ba la kaanbegɔ poan. Ge, la doohe te saazuo yelese'a la wan tara duuhugo gana bala. 24Krista daa ka keŋɛ kɛn' toolom zen'an la te asaala maalɛ la. Ge a kɛn' yelemɛŋɛrɛ toolom zen'an n bɔna saazuo ha. Ge a daa keŋɛ la saazuo mɛŋa ha te a sɔe to na'ma bɔna Na'ayenɛ nɛŋa. 25Malema nɛŋadaana la kɛn'ɛre toolom zen'an la poan la dunhe ziim la bɔ'ɔra Na'ayenɛ yuuma woo. Ge Krista daa ka kɛn' bɔ'ɔra a mɛŋa Na'ayenɛ yuuma woo. 26A daa han yete ne te a eta bala, a wan nyɛ' ne namehegɔ teŋa wa zuo naaŋɔ na yehe zina. Ge nananawa a ton daa wa'an la boyena na bo nɛra woo te a dekɛ la a mɛŋa bo boyena te a ki' zan'an zan'an te a dige be'emtooma. 27Te nɛra woo kiire la boyena te Na'ayenɛ nya gankere en. 28Bala, Krista me daa dekɛ a mɛŋa bo Na'ayenɛ te a ki' boyema zan'an zan'an la ta'an dekɛ nɛra woo be'em ze' a mɛŋa. Ge a wan le lebe na. Te a lebekaŋa poan na a ka ye'ehe na te a dekɛ la be'em bahɛ, ge a yeti a fan' la sɛba n gura en la bahɛ.

will be added

X\