Ebre 8

1Ge sɛla woo te to tɔgɔra la dela dena wa: Yesu se'em te to tara te a dɛna to malema nɛŋadaana wa, n de se'em n zin' Naba Yenɛ la zuɔ nu'o a na'am gɔŋɔ la poan saazuo ha. 2Enŋa n de se'em n tone toolom zen'an la poan, yelemɛŋɛrɛ sogorɛ la te Na'ayenɛ tin' ge dagɛ nɛresaala. 3Malema nɛŋadoma woo tara bo'olom la kaanbegɔ bɔ'ɔra Yenɛ. Bala, dene mea me tare sɛla te a me bo. 4Ge a daa han boe ne la teŋa wa zuo, a daa kan ta'an dene malemadaana. Se'ere n sɔe la, malemadoma la pon bɔna teŋa wa zuo tara bo'olom bɔ'ɔra Yenɛ wo pa'alegɔ la n yeti ba eta se'em la. 5Ge ba tooma la toolom zen'an poan ane wo yilinyiliŋɔ te te ba tɔgɔha saazuo ha wo Moses n yuun yeti a tin' sogorɛ la. Na'ayenɛ yuun kan' en te, Behɛ soŋa maalɛ ba wo mam n pa'alɛ ho se'em zoore wa zuo wa. 6Nananawa Yesu tooma la gane ba tooma la. Se'ere n sɔe la, nɔbiŋpaalega la a biŋe nɔɔrɛ yɛhera yelese'a la gane yelese'a te nɔbiŋkɛka la ba pon biŋe nɔɔrɛ yɛhera la. 7Ge yia pɔtɛ la yuun han ka tare ne la tuure, la ye ka le nare ne te to tara boyi' pɔtɛ. 8Yenɛ yuun nyɛ te nɛreba nya tare tuure. Bala te a yele ba te, Na'ayenɛ la yeti ya, Saŋa kene na te n wan biŋe nɔbiŋpaalega la Israel la Yuda yiredoma. 9De kan ana wo nɔbiŋere se'ere te n yuum biŋe la ba sɔyaabdoma saŋsɛka te mam yuum tare ba ze'ele Mizraim teŋa poan yehe na la n mɛŋa nu'o la. Ba ganlom yuum kɔ nɔbiŋere la bahɛ ge mam ka kelehɛ ba. Na'ayenɛ yele se'em n bala. 10Na'ayenɛ yeti, Saŋsɛka te n tɔgɔra wa han ta paɛ, nɔbiŋere paalɛ la te n wan biŋe la Israeldoma n wana. N wan golehɛ n pa'alegɔ la eŋɛ la ba sunya la ba potɛn'ɛra poan. N wan dɛna ba Yenɛ te bama me dɛna mam nɛreba. 11Nɛra kan le pa'alɛ a tadaana bii a sɔɔn yeti baŋɛ Na'ayenɛ. Se'ere n sɔe nɛra woo wan baŋɛ mam, pɔhera bonbila ta paara bonkotɛ. 12N wan bahɛ ba pototooma la woo bo ba ge ka le tɛnra ba be'em la boyenɛ me. 13Ge nɔbiŋpaalega wa te a tɔgɔra wa pa'alɛ mɛ soŋa soŋa te Na'ayenɛ dekɛ yia pɔtɛ la te de de'a bonkɛka. Bala, sɛla nya han ta de'a bonkɛka ge ka tare toonɛ, ka le bɔna.

will be added

X\