Ebre 7

1Salem naba Melkizedek yuun dɛna malemadaana tona bɔ'ɔra Na'ayenɛ Gane Zan'an la. Te Abraham n yuun ze'ele zabe se'ere te a nyaŋɛ nadoma la ge lɛbera, te Melkizedek to'ohɛ en kan' kan'somɔ bo en mɛ. 2Te Abraham yuun yehe la pia porogerɛ bo'olom sɛla woo te a to'ohe nadoma la zen'en la bo en. Melkizedek vɔnrɛ yia dela tontɔɔ naba ge Salem naba vɔnrɛ dela sunma'ahom naba. 3Zen'an ka boe pa'ala te a sɔ' dela ena, bii a ma' dela ena bii a sɔyaaba dela ena. Zen'an me ka le bɔna pa'ala ban dɔgɛ en daanse'ere daarɛ bii pa'ala daanse'ere daarɛ te a ki'. A ane wo Na'ayenɛ Dayɔa ge en de malemadaana wuuha. 4Dene poan, behɛ ya en yuun de nɛrekantɛ se'em. Abraham n yuun de Israel teŋa nɛreba sɔyaaba. Ge bala zan'an, a yuun kelom yehe la pia porogerɛ bo'olom sɛla woo te a yuun nyɛ' zaberɛ la poan bo en. 5Levidoma sɛba n de malemadoma la to'ohe pia porogerɛ bo'olom Israel nɛreba zen'en mɛ pa'alegɔ la zuo. Te bama mɛhe me la dɛna Abraham yaahe. 6Melkizedek ka yehe la Levi, ge bala mea zan'an, a yuun to'e pia porogerɛ bo'olom mɛ Abraham zen'en ge kan' kan'somɔ bo en se'em te Na'ayenɛ yuun biŋe a nɔɔrɛ bo en la. 7La dela yelemɛŋɛrɛ te nɛra se'em n kan' kan'somɔ bo nɛra se'em me, n de se'em n gane se'em te a kan' bo la. 8La han dɛna malemadoma n to'ohe pia porogerɛ bo'olom la, ba wan ba'ahom ki'. Ge la han dɛna Melkizedek n yuun to'ohe pia porogerɛ bo'olom la mɛ, enŋa vɔe mɛ. 9Ge Abraham n yuun yɔ' Melkizedek pia porogerɛ bo'olom la, Levi n de a yaaŋa la me yɔ mɛ. 10Se'ere n sɔe la, ba na ka dɔgɛ Levi ge a boe la a yaaba Abraham iŋa poan ge te a to'ohɛ Melkizedek. 11La dela Levi yizuo poan te pa'alegɔ la yuun paara Israel nɛreba. Ge nɛra ka de tontɔɔdaana yɛhera la n dole Levi malema tooma la zuo. Bala n sɔe te la nara te malemadaana la ana wo Melkizedek ge dagɛ Aron wa'ana. 12Te malema tooma la han tee, pa'alegɔ la me ne tee mɛ. 13Se'em te yele ana wa tɔgɔra yɛhera a yele wa yehe la yizuo deyema me na. Nɛra la ayena me a yizuo la poan daa ka wa'ana tona malema tooma la kaanbegɔ daka zen'an. 14Ge to mi' soŋa soŋa te ba dogɛ to Daana la Yuda yizuo poan, ge Moses yuun daa pon ka porɛ Yuda yizuo yele n yuun ta tɔgɔra yɛhera malema yɛla la. 15Yetɔgom la te to tɔgɔra wa nɛreba nya malom mina de mɛ soŋa soŋa la malemadaana se'em n ane wo Melkizedek wa'an na. 16A dagɛ malemadaana wo bama n yuun de malemadoma ban yehe Levi yizuo poan la zuo. A de malemadaana yɛhera la paŋsɛka n vɔe te sɛla ka bɔna wan ta'an sagom ka. 17Yenɛ gɔŋɔ la yeti, Ho dela malemadaana n ka tara ba'ahegɔ wo Melkizedek la. 18Ge yelekɛka n yuun boe wonse'eren ha la nan ka seke. Se'ere n sɔe la de kan ta'an soŋɛ nɛreba nananawa ge me ka tara vɔnrɛ. 19Pa'alegɔ la yuun ka ta'an bahɛ te nɛra se'em de'a yelemɛŋɛrɛdaana. Ge Yenɛ nya dekɛ la yelepaalega la yelese'a n gane bala te to sakɛ to suunre poan gura la te a behɛ te to ta'an lɛm en. 20Le pa'ahɛ yɛ'ɛha, Yenɛ me pɔ' pɔtɛ mɛ dena mea poan, ge a ka pɔ' pɔtɛ dena wa bo Levi yizuo malemadoma la. 21Yesu de malemadaana yɛhera Yenɛ n pɔ' pɔtɛ yele te, Na'ayenɛ pɔ mɛ, a me kan loke a nɔɔrɛ la. Ho dela malemadaana ka tara ba'ahegɔ. 22Te la dela pɔdena wa zuo te Yesu de se'em bahɛ te to mina soŋa soŋa te Na'ayenɛ n biŋe a nɔɔrɛ se'em bo to la nyana n yuun segɛ se'em ba la. 23Le yɛ'ɛha, malemadoma kekeko bo wonse'ere ha mɛ. Ban da kiire te sɛba sɔe tona la n yuun sɔe te ba zo'e bala la. 24Ge Yesu kɔ'ɔn vɔe mɛ wuuha ge me toona a malemadaana tooma wuuha la. 25Dene poan, nananawa kɔ'ɔn yɛ'ɛha, a tare paŋsɛka te a wan ta'an fan' nɛresɛba n wan doohe enŋa zen'en paɛ Yenɛ zen'en. Se'ere n sɔe la, a dela se'em n vɔe wuuha sohora Yenɛ bɔ'ɔra ba. 26Bala, Yesu n nya de malema nɛŋadaana soŋora tɔ. A dela fa'a. A ka tare tuure bii be'em. A daa yehe a mɛŋa toonse'a te be'emdoma tona teŋa wa zuo mɛ la. Ge a me dela se'em n boe Yenɛ zen'en saazuo ha. 27A ka ane wo malemadoma bana la n ane se'em la. A ka nare a koora dunhe daarɛ woo bɔ'ɔra a mɛŋa be'em zuo yia ge me nya bo nɛresɛba me be'em n bo la. A daa ki' la kiyeŋɔ ma'an ge ki'kana me n ba'ahɛ koa zan'an zan'an. 28Pa'alegɔ la yuun bo sore te ba lɔɔra la saaleba n de be'emdoma la te ba dɛna malema nɛŋadoma. Ge dena wa pooren la, Yenɛ pɔ' pɔtɛ loe a Dayɔsɛka n de fa'a bɔna wuuha.

will be added

X\